1 ጉ ታክሽን፥ ዛርጋ ጫክያ ዎደ፥ ሳምሶን ባረ ማቻቶ በአናዉ እት አንቃራ ዴሻ አኪደ ቤዳ፤ እ አዉዋ፥ "ታን ታ ማቻታ ደእያ ክፍልያ ገላናዉ ኮያድ" ያጌዳ።

ሽን እ ገለናዳን፥ እዝ አዉ ድጌዳ። 2 እዝ አዉ ሳምሶና፥ "ኔን እዞ ኡባ እጼዳዋ ማላትና፥ ነ ሚዝያዉ እማድ። ሽን እ ቴፋ ምቻታ ኢፐካ አ ሎአ፤ እዝ ድራዉ እዞ አካ" ያጌዳ።

3 ሄዋፐ ጉየ ሳምሶን ኡንቱንቶ፥ "ሀእ ስም ፕልስጼማ ጋድያ አሳ ቦላ ታን ኢታባ ኦፐ፥ ባይዛንቻ ግድከ" ያጌዳ። 4 ቢደ፥ ሄዙ ጼቱ ዎራካናቱዋ ኦይቂደ ላኡዋ ላኡዋ ዱፍያ እትፐ ጋደ፥ ዱፈቱዋፐ ግዱዋን ዪጨቴዳ ጾምፕያ ዎደ ቃቼዳ። 5 ሄዋፐ ጉይያን፥ ቃሸቴዳ ጾምፕያን ታማ ኦይደ፥ ብሮ ጫከትቤና ፕልስጼማ አሳ ካ ግዶ ዎራካናቱዋ የዴዳ፤ ጫከቴዳ ካ፥ ኤቁዋን ደእያ ካ፥ ዎይንያ ቱራቱዋነ ዎጋራ ጹጌዳ።

6 ፕልስጼማቱ፥ "ሀዋ ኦዳዌ ኦኔ?" ያጊደ ኦቼድኖ።

ሽን አሳይ፥ "ሳምሶን ኦዳ፤ አያዉ ጎፐ፥ ትምና አሳ ግድያ አ ቦሉ፥ አ ማቻቶ አ ሚዝያዉ እሜዳ ድራሳ" ያጌዳ። ፕልስጼማቱ ቢደ፥ ኦዉነ እ አዉዋ ታማን ጹጌድኖ።

7 ሳምሶን ኡንቱንቶ፥ "ህንተንቱ ሄዋ ኦዳ ድራዉ፥ ሀሉዋ ከሰናን አግከ" ያጌዳ። 8 ኡንቱንታ ዎልቃማ ሾቻ ሾጪደ፥ ዳሮቱዋ ዎዳ። ሄዋፐ ጉይያን ቢደ፥ ኤጻማ ጌተትያ ኮሽያን ደእያ ዛላ ጎንጎሉዋ ግዶን ጋምኤዳ።

9 ሄዋፐ ጉይያን፥ ፕልስጼማ አሳይ ዪደ፥ ይሁዳን ዱንካኒደ ሌሀ ጌተትያ ካታማ ኦሌዳ። 10 ይሁዳ አሳይ ኡንቱንታ፥ "አያዉ ኑና ኦላናዉ ዬድቴ?" ያጊደ ኦቼዳ።

ሽን ኡንቱንቱ፥ "ኑን ሳምሶና ኦይክ ቃቻናዉነ እ ኑ ቦላ ኦዳዋዳን አ ቦላ ኦናዉ ዬዶ" ያጊደ ዛሬድኖ። 11 ያትና፥ ይሁዳፐ ሄዙ ሻአ አሳቱ ኤጻማ ጌተትያ ሳኣን ደእያ ዛላ ጎንጎሉዋ ቢደ ሳምሶና፥ "ኑና ሞድያዋንቱ ፕልስጼማ አሳቱዋ ግድያዋ ኤርኪየ? ያትና፥ ኑ ቦላ ሀዋ አያ ኢታባ ኦይ?" ያጌድኖ።

ሄዋፐ ጉየ እ ዛሪደ፥ "ኡንቱንቱ ታ ቦላ ኦዳዋዳን፥ ታንካ ኡንቱንቱ ቦላ ኦድ" ያጌዳ።

12 ኡንቱንቱካ ዛረደ፥ "ኑን ሀዋ ዬዳዌ ኔና ቃቺደ፥ ፕልስጼማቶ አደ እማናሳ" ያጌድኖ።

ሳምሶን ኡንቱንታ፥ "ህንተንቱ ህንተንቱ ሁጲያዉ ታና ዎናዳን ጫቂተ" ያጌዳ።

13 ኡንቱንቱ፥ "ኤኖ፥ ኑን ኔና ቃቺደ፥ ኡንቱንቶ አደ እማናፐ አትና፥ ዎኮ" ያጊደ አዉ ዛሬድኖ። ሄዋፐ ጉይያን፥ ላኡ ኦራ ዎዶሩዋን ቃቺደ፥ ዛላ ጎንጎሉዋፐ ከሲደ አፌድኖ።

14 ሳምሶን ሌሀ ቤዳ ዎደ፥ ፕልስጼማ አሳቱ ናሸቻን ዋሲደ፥ አናና ጋከታናዉ ዬድኖ። መና ጎዳ አያናይ አ ቦላ ዎልቃፐ ዎዳ፤ አ ኩሽያ ቃች ዎዳ ዎዶሩዋ፥ ሻሉ ታማ በኢደ ዱጽያዋዳን፥ ዱሰረ የጌዳ። 15 ያቲደ ማታ ዎደ ሀይቄዳ እት ሀርያ ጎጎጩዋ ደም አኪደ፥ አን ሻአ አሳ ዎዳ።

16 ሳምሶን ሀዋዳን ያጌዳ፤

"ሀርያ ጎጎጩዋን፥

ታን አሃ ቦላን አሃ ዶራድ።

ሀርያ ጎጎጩዋን ሻአ አሳ ዎድ" ያጌዳ።

17 ሃሳይያዋ ዉርሴዳዋፐ ጉይያን፥ ባረ ኦይቄዳ ጎጎጩዋ ኩሽያፐ ኦሊደ ሄ ሳኣ ራማት-ሌሀ* ያጊደ ሱንዳ።

18 ሄዋፐ ጉይያን፥ ሳምሶን ሎይ ሳመቲደ፥ መና ጎዳዉ ዋሲደ፥ "ኔን ሀዋ ማላ ዎልቃማ ጾኑዋ ታዉ ነ ቆማዉ እማዳ። ያትና፥ ታን ሀእ ሳሙዋን ሀይቆ? ቃይ ሀ ቃጻረትቤናዋንቱ ኩሽያን ኩንዶ?" ያጊደ ዋሴዳ። 19 ያግና ጾሳይ ሌሀን ደእያ ጋድያ ጳልቂና፥ አፐ ሃይ ከሴዳ። ሳምሶን ሄ ሃፐ ኡሺደ አሌዳ ድራዉ፥ አዉ ሸምፑ ስሜዳ። ያትና፥ ሄ ሳኣ አይን-ሀቆረ* ያጊደ ሱንዳ። ሄዌ ሀቼ ጋካናዉ ሌሀን ደኤ።

20 ፕልስጼማ አሳይ ጋድያ ሞዴዳ ዎደ፥ ሳምሶን እስራኤላን ላታሙ ላይዉ ፕርድያ ዳና ግዴዳ።