ዳናቱዋ 8

ሚድያማቱ ዉርሰ ጾኑዋ ጾነቴድኖ

1 ሄዋፐ ጉይያን፥ ኤፍሬማ አሳይ ጌዶና፥ "ሚድያማቱዋ ኦላናዉ ባደ ኑና አያዉ ጼሳበይኪ? ኑና አያዉ ሀዋዳን ኦዲ?" ያጊደ ሎይ ፓሉመቴድኖ።

2 ሽን ጌዶን ዛሪደ፥ "ታን ኦዳዋፐ ህንተንቱ ኦዳዌ አነየ? ታ ያራቱ አብኤዘራቱ ሺሼዳ ሙለ ካፐ ህንተንቱ ኤፍሬማ ዛራቱ ቆሬዳ ቃርሚ ኬከነየ? 3 ሚድያማቱዋ ካፓቱዋ፥ ኦሬባነ ዛኤባ ጾሳይ ህንተንቱ ኩሽያን አደ እሜዳ። ህንተንቱ ኦዳዋ ማላ፥ ታን አይ ኦናዉ ዳንዳያይታ?" ያጌዳ። እ ሄዋዳን ጊና፥ ኡንቱንቱ ሀንቁዋፐ ዛርቤድኖ።✝8:3-5 ማዝ. 83:11

4 ጌዶንነ አናና ደእያ ሄዙ ጼቱ አሳይ ዮርዳኖሳ ሻፋ ዪደ ፕኔድኖ፤ ኡንቱንቱ አይ ዳቡሮፐካ፥ ባረንቱ ሞርከቱዋ የደርስያዋ አግበይክኖ። 5 የደርሲደ ሱኮታ ጋኬዳ ዎደ፥ ጌዶን ካታማ አሳ፥ "ታ አሳይ ዳቡሬዳ ድራዉ፥ ሀያና አማሬዳ ኡክ እሜርክቴ። ታን ሚድያማቱዋ ካተቱዋ ዘባሀነ ጻልሙናአ የደርሳደ ደአይ" ያጌዳ።

6 ሄዋፐ ጉየ ሱኮታ ካታማ ካፓቱ፥ "ዘባሀነ ጻልሙናአ ኔን ኦሞዳበይካሽን፥ ነ ኦላንቻቶ አያዉ ኡክ እማኔ?" ያጌድኖ።

7 ያትና፥ ጌዶን፥ "ሎአ አይነ ባዋ! መና ጎዳይ ዘባሀነ ጻልሙናአ ታ ኩሽያን አደ እምያ ዎደ፥ ታን መላ ቢታ አጉንንነ ክንድቹዋን ህንተንታ ዋና" ያጌዳ። 8 ሄዋፐ ፓኑኤላ ግያ ሳኣ ቤዳ፤ ያን ደእያ አሳካ ሄ ኦሻ ኦቼዳ። ሽን ፓኑኤላ አሳይካ ሱኮታ ካታማ አሳይ ዛሬዳዋዳን ዛሬዳ። 9 ያትና፥ ፓኑኤላ አሳካ፥ "ታን ጾናደ ሳሮ ስምያ ዎደ፥ ህንተንቱ ካታማ ናግያ ሀ አዱሳ ግምቢያ ላላና" ያጌዳ።

10 ዘባህነ ጻልሙናእ አዋይ ዶልያ ባጋፐ ዬዳ ኦላንቻቱዋፐ አቴዳ ባረንቱ ታማነ እቼሹ ሻአ ኦላንቻቱዋና ቃርቆራ ጌተትያ ካታማን ደኢኖ። ካሰ አዋይ ዶልያ ባጋፐ ዬዳ ኦላንቻቱዋፐ ማሻን ኦለትያ እት እት ጼታነ ላታሙ ሻአ ግድያ ኦላንቻቱ ኦላን ሀይቂ ዉሬድኖ። 11 ጌዶን ኖባሀፐነ ዮግባሀፐ አዋይ ዶልያ ባጋን ደእያ ዛላናቱዋ ጋጻ ኦግያና ቢደ፥ ሄዋን ደእያ ኦላንቻቱዋ ቦላ ኡንቱንቱ አኬከናን ደእሽን ዎራጄዳ፤ 12 ኡንቱንቱ ኡባይ ዳጋሜድኖ። ሚድያማ ካተቱ ዘባህነ ጻልሙናእ ላአቱካ ባቃቴድኖ፤ ሽን ጌዶን ኡንቱንታ የደርስ ጋኪደ ኦሞዴዳ።

13 ዮኣሻ ናአይ ጌዶን ኦላፐ ሄሬሳ ፕኑዋና ስሜዳ። 14 ሱኮተፐ እት ዎዳላ ኦይቂደ ኦቼዳ። ዎዳላይ ሱኮታ ካፓቱነ ጭማቱዋ ላፑን ታማነ ላፑናቱዋ ሱን ጻፊደ አዉ እሜዳ። 15 ሄዋፐ ጉይያን፥ ጌዶን ሱኮታ አሳኮ ዪደ፥ " ‘ዘባሀነ ጻልሙናአ ኔን ኦሞዳበይካሽን፥ ነ ዳቡሬዳ አሳዉ አያዉ ኡክ እማኔ?’ ጊደ ህንተንቱ ታና ቅሊጬድታ፤ ሽን ዘባሀነ ጻልሙናአ ሀዋንታ በእተ" ያጌዳ። 16 ሄዋፐ ጉይያን፥ መላ ቢታ አጉንንነ ክንድቹዋን ዋደ፤ ሱኮታ ካፓቱዋ ቃጻዬዳ። 17 ቃይ ፓኑኤላን ካታማ ናግያ አዱሳ ግምቢያ ላሊደ፥ ካታማን ደእያ አቱማ አሳ ዎዳ።

18 ያቲደ ጌዶን ዘባሀነ ጻልሙናአ፥ "ህንተንቱ ታቦራን ዎዳ አሳቱ አይ ማሌ?" ያጊደ ኦቼዳ።

ሽን ኡንቱንቱ፥ "ነ ማላ፤ ኡንቱንቱ ኡባይካ ካትያ ናና ማላትኖ" ያጊደ ዛሬድኖ።

19 ጌዶን፥ "ኡንቱንቱ ታ እሻቱዋ፤ ኡንቱንቱ ታ ዳይ ናና። መና ጎዳይ ኤሮ! ህንተንቱ ኡንቱንታ ዎቤናዋ ግድንቶ፥ ታንካ ህንተንታ ዎከ ሽን" ያጌዳ። 20 ባረ ባይራ ናኣ የተራ፥ "ደንዳ ኤቃደ፥ ሀዋንታ ዎ" ያጌዳ። ሄዋፐ ጉየ የተር ብሮ ያላጋ ግዴዳ ድራዉ ያዪደ፥ ባረ ማሻ ሾድቤና።

21 ሄዋፐ ጉይያን፥ ዘባህነ ጻልሙናእ ጌዶና፥ "ደንዳ ኤቃደ፥ ኔን ኑና ዎ። አቱማ አሳ ኦሱዋ ኦናዉ አቱማ አሳ ኮሼ" ያጌድኖ። ያትና፥ ጌዶን ደንዲደ፥ ኡንቱንታ ዎዳ፤ ኡንቱንቱ ጋላቱዋ ቆያን ደእያ አሌቁዋ ኡባ አኬዳ።

22 ሄዋፐ ጉይያን፥ እስራኤልያ አሳይ ጌዶና፥ "ኔን ኑና ሚድያማ አሳፐ አሼዳ ድራዉ፥ ኔን፥ ኔፐ ጉይያን ነ ናአይነ ነ ናኣ ናአይ ኑና ሞድተ" ያጌዳ።

23 ሄዋፐ ጉየ ጌዶን፥ "ታን ህንተንታ ሞድከ፤ ታ ናአይካ ህንተንታ ሞደና፤ መና ጎዳይ ህንተንታ ሞዶ" ያጌዳ። 24 ኡንቱንታ፥ "አነ ታን ህንተንታ እትባ ኦቻይ: ህንተንቱ ኡባይ ኦሞዲደ አሄዳ ሀይ ዎርቃ ታዉ እምተ" ያጌዳ። እስማኤላ አሳዳን፥ ሚድያማ ቢታ አሳቱካ ሀይን ዎርቃ ዎኖ።

25 እስራኤልያ አሳይ ዛሪደ፥ "ኤኖ፥ ኑ እማና" ያጌዳ። አፍላ ሂጺደ አሳይ ኡባይ ባረ ኦሞዴዳ ሀይ ዎርቃ ሂጸቴዳ አፍላ ቦላን ዎዳ። 26 ጌዶን አኬዳ ሀይ ዎርቃይ ላታሙ ኪሎ ግራመ ዴጽያዋ። ሄዌነ፥ ሀራ አሌቂያዋንታ፥ ቆያን አያ ሀብልያ፥ ምድያማቱዋ ካተቱ ማይያ ኦቻ ቴራ ማላትያ ማዮቱዋነ ኡንቱንቱ ጋሎቱዋ ቆያፐ አከቴዳ አሌቂያዋንታ ጉጀናና። 27 ጌዶን ዎርቃፐ ኤፉድያ ጊግሲደ፥ ባረ ደእያ ኦፍራ ካታማን ዎዳ። ጉየፐ እስራኤልያ አሳይ ኡባይ ጾሳ አጊደ፥ ሄ ኤፉድያዉ ጎይኔዳ፤ ጌዶናዉነ አ ሶ አሳዉ ሄዌ ጲረ ግዴዳ።

28 ሄዋዳን ሀኒደ፥ ሚድያማ አሳይ እስራኤልያ አሳዉ ሞደቴዳ፤ ኡንቱንቱ እስራኤልያ አሳ ቦላ ላኤንዋ ደንድበይክኖ። ጌዶን ሀይቃና ጋካናዉ፥ ኦይታሙ ላይ ጋዲ ዎፓ ደሜዳ።

ጌዶና ሀይቁዋ

29 ዮኣሻ ናአይ፥ የሩባኣላ ጌተትያ ጌዶን ባረ ሶ ጉየ ቢደ፥ ባረ ጎለን ደኤዳ። 30 ጌዶን ጮራ ማችያ አኬዳ ድራዉ፥ አዉ ላፑን ታሙ አቱማ ናናይ የለቴድኖ። 31 ቃይ ሰኬማ ካታማን ደእያ ቆማታ አቱማ ናኣ አዉ የልና፥ ሱን አብመሌካ ያጊደ ሱንዳ። 32 ዮኣሻ ናአይ ጌዶን ሎኦ ጭሚደ ሀይቄዳ፤ ባረ አዉዋ ዮኣሻ ዱፉዋን ሞገቴዳ። ሀ ዱፉ አብኤዘራ ያራቱ ደእያ ኦፍራ ካታማን ደኤ።

33 ጌዶን ሀይቄዳዋፐ ጉይያን፥ እስራኤልያ አሳይ ጾሳፐ ጉየ ስሚደ፥ ባኣላ ጌተትያ ጾሳቶ ጎይኔዳ፤ ባኣል-ባሪታ ጌተትያ ኤቃ ባረንቶ ጾሳ ኦድኖ። 34 ያቲደ እስራኤልያ አሳይ ኡንቱንቱ ዩሹዋን ደእያ ሞርከቱዋ ኡባፐ ኡንቱንታ አሼዳ መና ጎዳ ባረንቱ ጾሳ ሀሳይበይክኖ። 35 ቃይ ጌዶን እስራኤልያ አሳዉ ኦዳ ሎኦ ኦሱዋ ኡባዉ፥ ኡንቱንቱ አ ሶ አሳዉ ኬካን ኩሽያ ዛርበይክኖ።