ዳናቱዋ 16

ሳምሶን ጋዛን ኦዳባ

1 እት ጋላስ ሳምሶን ጋዛ ጌተትያ ፕልስጼማቱዋ ካታማ ቤዳ፤ ያን እት ሻርሙጻ ምሽራቶ በኢደ፥ እዝና አቃናዉ እ ጎልያ ገሌዳ። 2 ጋዛ ካታማን ደእያ አሳይ ሳምሶን ኡንቱንቱ ካታማ ዬዳዋ ስሲደ፥ ካታማ ዩይ አደ፥ ቃማ ኡባ ካታማ ፐንግያ ናጊደ አቄዳ፤ "ሳአይ ዎንታናዉ ናጊደ፥ ኑን አ ዎና" ያጊደ ቃማ ኡባ ጮኡ ጌድኖ። 3 ሽን ሳምሶን ያን ግሴዳዌ ብላሄ ጋካናዉ ጻላላ። ብላሄ ደንዲደ፥ ካታማ ድርሳ ፐንግያ ኦይኪደ፥ ሳንቃ፥ ጉባንያ፥ ማቃንያነ ጎርድያ ሽካላቱዋ ሾዴዳ። ሄ ኡባካ ሀሽያን ቶኪደ፥ ከብሮናፐ ስን ባጋና ደእያ ደርያ ሁጲያ ከሴዳ።

ሳምሶናነ ዳሊሎ

4 ሄዋፐ ጉይያን፥ ሳምሶን ሶሬቃ ግያ ዛንጋራን ደእያ እት ዳሊሎ ግያ ምሽራቶ ሲቄዳ። 5 ያትና፥ ፕልስጼማቱዋ ካፓቱ ኢኮ ዪደ፥ "ኔን አ ጭማደ፥ ሄ ዎልቃ ኡባ አያፐ እ ደሜደንቶነ ቃይ ኑን አ ዎት ጾኒደ ቃቻናዉ ዳንዳይንቶ ኦቻ። እቱ እቱ ኑን ነዉ እት ሻአነ እት ጼቱ ጻጋራ ብራ እማና" ያጌድኖ።

6 ዳሊላ ሳምሶና፥ "ሀዋ ኬሻ ዎልቃ ኔን ሀቃፐ ደማድንቶ፥ ሀያና ታዉ ኦዳርኪ! እት አሳይ ኔና ቃቺደ፥ ዋቲደ ነ ዎልቃ ዳቡርሳናዉ ዳንዳዪ?" ያጋዱ።

7 ሳምሶን፥ "ታና ላፑን እርጻ ዳፎቱዋን አሳይ ቃቾፐ፥ ዳቡራደ፥ ሀራ አሳዳን ሀናና" ያጊደ ዛሬዳ።

8 ሄዋፐ ጉይያን፥ ፕልስጼማቱዋ ካፓቱ ዳሊልዉ ላፑን እርጻ ዳፎቱዋ አህና አ ሳምሶና ቃቻዱ። 9 ባረ ቆልኦን አሳ ቆሳ ዎደ፥ "ሳምሶና፥ ፕልስጼማቱ ይክቼድኖ" ጋደ ጼሳዱ። ሽን ሻሉ ታማይ ኦይቂና ዱጸረትያዋዳን፥ ዳፎቱዋ ዱሰረ የጌዳ። ያትና፥ እ ዋን ዎልቃሚንቶ ጹራይ ኤረትቤና።

10 ያትና፥ ዳሊላ ሳምሶና፥ "ሄኮ ኔን ታናን ካኣሳ፤ ኔን ታዉ ዎርዱዋ ኦዳዳ። ሀእካ ኔን ቃሸታናዌ አያነንቶ፥ ሀያና ታዉ ኦዳርኪ!" ያጋዱ።

11 እ እዞ፥ "አሳይ ጎኤትቤና ኦራ ዎዶሩዋን ታና ቃቾፐ፥ ዳቡራደ፥ ሀራ አሳዳን ሀናና" ያጌዳ።

12 ዳሊላ ኦራ ዎዶሩዋ አካደ፥ ሳምሶና ቃቻዱ። ቃይካ ባረ ቆልኦን አሳ ቆሳ ዎደ፥ "ሳምሶና፥ ፕልስጼማቱ ይክቼድኖ" ያጋዱ። ሽን እ ዎዶሩዋ ቀስያፐ ሻሉዋዳን ዱሰረ የጌዳ።

13 ያትና፥ ዳሊላ ሳምሶና፥ "ሀእ ጋካናዉ ኔን ታናን ካኣዳ፤ ኔን ታዉ ዎርዱዋ ኦዳዳ። ሀእካ ኔን ቃሸታናዌ አያነንቶ ሀያና ታዉ ኦዳርኪ!" ያጋዱ።

ሄዋፐ ጉየ እ እዞ፥ "ታ ሁጲያ ላፑን ዳ ብናና ቃጭናና ጋደ፥ ሀርባን ዋላካደ፥ ሙኩካ ጾንጋ ጾንጋደ ዳዶፐ፥ ታን ዳቡራደ፥ ሀራ አሳዳን ሀናና" ያጌዳ።

14 ሄዋፐ ጉይያን፥ ሳምሶን ገምእሽሽን፥ ዳሊላ አ ሁጲያ ላፑን ዳ ብናናናነ ቃጭናና ጋ ዋላካደ ዳዳዱ። ሄዋፐ ጉይያን፥ "ሳምሶና፥ ፕልስጼማቱ ይክቼድኖ" ያጋዱ። ሄዋፐ ጉየ እ ገምእሹዋፐ ቤጎቲደ፥ ባረ ብናና ዳደቴዳ ማዩዋፐነ ሀርባፐ ሾድ አኬዳ።

15 ያትና አ፥ "ነ ዎዛናይ ታናና ደኤናን፥ ‘ታን ኔና ሲቃይ’ ዋታደ ጋይ? ታናን ሀዋና ሄዙ ገደ ካኣዳ። ኔን ሀ ዎልቃ አያፐ ደማድንቶ፥ ታዉ ኦዳባካ" ያጋዱ። 16 ሀቼ ሀቼ ዛራ ዛራ ኦቻደ ዋይስና፥ ሀንያባ ዬዳ።

17 ያትና፥ "ታ አት ኡሉዋፐ ዶምና፥ ታን ጾሳዉ ዱማቴዳ ናዝራዌ አሳ ግዴዳ ድራዉ፥ ታ ሁጲያ ብናናይ ሜደት ኤረና። ታ ብናናይ ሜደቶፐ፥ ታ ዎልቃይ ታፐ ይና፥ ታን ዳቡራደ፥ ሀራ አሳዳን ሀናና" ያጊደ፥ ባረ ዎዛናን ደእያዋ ኡባ እዝዉ ኦዴዳ።

18 ባረ ዎዛናን ደእያዋ ኡባ እ ኦዴዳዋ ዳሊላ በኤዳ ዎደ፥ "ባረ ዎዛናን ደእያዋ ኡባ ታዉ ኦዴዳ ድራዉ፥ አነ እት ገደ ስሚደ ዪተ" ያጋደ ፕልስጼማቱዋ ካፓቶ ኪታ የዳዱ። ኡንቱንቱ ብራ አኪደ፥ ኢኮ ዬድኖ። 19 ዳሊላ ሳምሶና ባረ ክዉዋን ገምእሽሳዱ፤ እት አሳ ጼስና ዪደ፥ አ ሁጲያ ላፑን ዳ ብናና ሜዴዳ፤ አ ዎልቃይ አፐ ዬዳ። ሄዋፐ ጉይያን፥ አ ዋይስያዋ ዶማዱ፤ 20 "ሳምሶና፥ ፕልስጼማቱ ይክቼድኖ!" ያጋዱ።

ገምእሹዋፐ ቤጎቲደ፥ ካሰዋዳን ዱሰሬደ ባና ያጊደ ቆፔዳ፤ ሽን መና ጎዳይ አፐ ሻከት ክቼዳዋ እ ኤርቤና።

21 ፕልስጼማቱ አ ኦይቄዳዋፐ ጉይያን፥ አ ላኡ አይፈቱዋ ዎጭ ከሲደ፥ ጋዛ ካታማ አፌድኖ። ሄዋፐ ካላ ናሃስያ ሳንሳላታን ቃቼድኖ፤ ቃሾ ጎለን ደእያ ዎጻን ካ ጋጫናዳን ኦድኖ። 22 ኡንቱንቱ አ ሁጲያ ብናና ሜዴዳዋፐ ጉይያን፥ ብናናይ ስሚደ ዶሉዋ ዶሜዳ።

ሳምሶና ሀይቁዋ

23 ፕልስጼማቱዋ ካፓቱ፥ "ኑ ጾሳይ ኑ ሞርክያ ሳምሶና ኑ ኩሽያን አደ እሜዳ" ያጊደ ባረንቱ ጾሳ ዳጎናዉ ዎልቃማ ያርሹዋ ያርሻናዉነ ናሸታናዉ እትፐ ሺቄድኖ።

24 አሳይ ኡባይ አ በኤዳ ዎደ፥ "ኑ ጋድያ ባይዜዳ፥ ኑ አሳፐ ዳሩዋ ዎዳ ኑ ሞርክያ ኑ ጾሳይ ኑ ኩሽያን አደ እሜዳ" ያጊደ ባረንቱ ጾሳ ጋላቴድኖ። 25 ኡንቱንቱ ሎይ ናሸቴዳ ድራዉ፥ "ካኢደ ኑና ናሸቻና ማላ፥ ሳምሶና ጼስተ" ያጌድኖ። ሄዋፐ ጉየ ሳምሶና ቃሾ ጎልያፐ ጼሲደ አህና፥ እ ኡንቱንቱ ስንን ካኤዳ፤ ካኤዳዋፐ ጉይያን፥ ቱሳቱዋፐ ግዱዋን ኤሴድኖ።

26 ሳምሶን አ ኩሽያ ኦይቂደ ካለያ ናኣ፥ "ታን ኡንቱንቱን ዘምፓደ ኤቃና ማላ፥ ጎልያ ቶኬዳ ቱሳቱዋ ታና ቦሽሳ" ያጌዳ። 27 ጎልያ ግዱዋን አቱማ አሳቱነ ማጫ አሳቱ ኩም ኡቴድኖ፤ ቃይ ሄዋን ፕልስጼማቱዋ ካፓቱ ኡባቱካ ደኢኖ። ሳምሶን ካእሽን፥ ጎልያ ቦላን ደምባዪደ ኬጼዳ ሳኣን ኡቲደ፥ ሄዙ ሻአ ግድያ አቱማ አሳቱነ ማጫ አሳቱ በኢኖ።

28 ሄ ዎደ ሳምሶን መና ጎዳ ዎሲደ፥ "አቤት ኡባ ሞድያ መና ጎዳዉ፥ ሀይ ታና ሀሳያርኪ! አቤት ጾሳዉ፥ ፕልስጼማቱ ታ ላኡ አይፈቱዋ ከሴዳዋ፥ ሀሉዋ ታን ከሳናዳን፥ ሀይ ታና እት ገደ ምንርኪ!" ያጌዳ። 29 ሳምሶን ጎልያ ቶኬዳ ግዶ ቱሳቱዋ ላኡዋካ ኦይቄዳ። ኡሸቻ ኩሽያን እቱዋ፥ ሀድርሳ ኩሽያን እቱዋ ኦይቄዳዋፐ ጉይያን፥ 30 "አነ ታን ፕልስጼማቱዋና እትፐ ሀይቃይ!" ያጊደ ዋሴዳ። ባረዉ ደእያ ዎልቃ ኡባን ሱግና፥ ኬይ ካፓቱ ቦላነ ግዱዋን ደእያ አሳ ኡባ ቦላ ኩንዴዳ። ሳምሶን ሀይቂደ ዎዳ አሳይ፥ እ ፓጻ ደኢደ ዎዳ አሳፐ ዳሬዳ።

31 ያትና፥ አ እሻቱነ አ ዳቦቱ ኡባይ ዪደ፥ አ አሃ አፌድኖ፤ ጾርአ ካታማፐነ ኤሽታኦላ ካታማፐ ግዱዋን፥ አ አዉዋ ማኑሄ ዱፉዋን ሞጌድኖ። ሳምሶን እስራኤላን ላታሙ ላይ ዳናቲደ ፕርዴዳ።