ዳናቱዋ 20

እስራኤልያ አሳይ ኦላዉ ጊጉሳ

1 ፑደሃ ዳናፐ ዱገሃ በርሳበሀ ጌተትያ ጋካናስነ ዶላሃ ጋላኣደን ዴእያ እስራኤልያ አሳይ ኡባይ እት አሳዳን ምጽጳ መና ጎዳ ስንን እትፐ ሺቄዳ። 2 ሄ ሺቄዳ ጾሳ አሳና እስራኤልያ ዛራቱዋ ኡባ ካፓቱካ ደኢኖ። ኡንቱንቱ ግዶን ማሻን ኦለታናዉ ዳንዳይያ ኦይዱ ጼቱ ሻአ ኦላንቻቱ ደኢኖ። 3 ሄ ዎደ እስራኤልያ አሳይ ምጽጳን ሺቄዳዋ ቢንያማ አሳቱ ስሴድኖ።

እስራኤልያ አሳይ፥ "ሀ ኢታባይ አነ ዋኒደ ሀኔደንቶ፥ ኑ ኦድተ" ያጌዲኖ።

4 ሄዋፐ ጉየ ሀይቄዳ ቆማት ጎዳይ፥ ሌዊያ ዛሪ ኡንቱንቶ ሀዋዳን ያጊደ ዛሬዳ፤ "ታንነ ታ ቆማታ ቃማ አቃናዉ ቢንያማ ጋድያን ደእያ ግብኣ ግያ ካታማ ዬዶ። 5 ግብኣ ካታማ አሳቱ ታና ዎናዉ ዪደ፥ ቃማን ጎልያ ዩይ አደ ኤቄድኖ፤ ሽን ጉየፐ ታ ቆማቶ አኪደ፥ ዎልቃን እዝና ኡንቱንቱ ግስሽን፥ እዛ ሀይቃዱ። 6 ታን እ አሃ አካደ ቃንጸሬዳዋፐ ጉይያን፥ ኡንቱንቱ ሀ ቱናባነ ፖኮባ እስራኤልያን ኦዳ ድራዉ፥ እስራኤልያ አሳይ ላቴዳ ቢታ ኡባ እት እት ቃንጹዋ የዳዲ። 7 በእተ፥ ህንተንቱ ኡባይ እስራኤልያ አሳ፤ ዞረቲደ ህንተንቱ ፕርዳ እምተ" ያጌዳ።

8 ሄዋፐ ጉየ አሳይ ኡባይ እትፐ ደንድ ኤቂደ፥ "ኑ ግዶፐ ኦንነ ባረ ዱንካንያ ዎይ ባረ ጎልያ ጉየ ቤና። 9 ኑን ግብኣ ኦናዌ ሀዋ፤ ሳማ የጊደ፥ ግብኣ ካታማ አሳ ኦላናዉ ባና አሳቱዋ ዶራና። 10 እስራኤልያ ዛሪያ ኡባፔ ኦላ ኦለታናዉ ብያ ኦላንቻቱዋፐ ጼቱዋፐ ታማቱ፥ ሻኣፐ ጼታቱ፥ ታሙ ሻኣፐ ቃይ ሻአቱ ሽንቃ አሳዉ ጊግስኖ። አቴዳ ኦላንቻቱ ቢንያማ ጋድያን ደእያ ግብኣ ካታማ ቢደ፥ ግብኣ አሳይ እስራኤልያ ቦላ ሀዋ ማላ ቱናባ ኦዳዋ ሀሉዋ፥ ግብኣ ካታማን ደእያ አሳቱዋ ሙራና" ያጌድኖ። 11 እስራኤልያ አሳይ ኡባይ ካታማ ኦላናዉ እትፐ ሺቄዲኖ።

12 እስራኤልያ ዛራቱ ቢንያማ ዛራቱዋ ኡባዉ ሀዋዳን ያጊደ አሳ ኪቴድኖ፤ "ህንተንቱ ግዶን ሀኔዳ ሀ ኢታባይ አዬ? 13 ኑን ኡንቱንታ ዎደ፥ እስራኤልያፐ ሀ ኢታ ይሳና ማላ፥ ግብኣ ካታማን ደእያ ሄ ሹፉሮ አሳቱዋ ከሲደ፥ ኑ አደ እምተ" ያጌድኖ።

ሽን ቢንያማ አሳቱ እስራኤልያ አሳይ ኦድያዋ ስሰናን እጼድኖ። 14 ኡንቱንቱ እስራኤልያ አሳና ኦለታናዉ ባረንቱ ካታማቱዋፐ ከሲደ፥ እትፐ ግብኣ ካታማ ሺቄድኖ። 15 ሄ ጋላስካ ቢንያማ ካታማቱዋፐ ዬዳ ማሻን ኦለትያ ላታማነ ኡሱፑን ሻአ ኦላንቻቱዋ ሺሼድኖ። ሄዋ ፓይዱ ግብኣ ካታማን ደእያ አሳ ግዶፐ ዱማ ዶረቴዳ አሳቱዋ ጉጀናና። ግብአፐ ዶረቴዳዋንቱ ላፑን ጼታ። 16 ሄ ኡባቱዋ ግዶፐ ላፑን ጼቱ አሳቱ ሀድርሳ ኩሽያን ኦልያዋንታ፤ ሀ ኡባቱካ ያምባርሻን ሹቻ ኦሊደ፥ ሀራይ አቶ እት ብናናካ ሀልክኖ። 17 ቢንያማ አሳይ ባይናን፥ እስራኤልያ አሳይ ማሻን ኦለትያ ኦይዱ ጼቱ ሻአ ኦላንቻቱዋ ሺሼዳ፤ ሄ ኡባቱካ ኦላዉ ጊጌዳዋንታ።

ቢንያማ ዛራቱዋ ቦላን ደንዴዳ ኦላ

18 እስራኤልያ አሳይ ደንዲደ፥ ቤቴለ ቤዳ፤ "ቢንያማ አሳ ኦላናዉ ኑፐ ስንቲደ ከሳናዉ ኮሽያዌ ኦኔ?" ያጊደ ጾሳ ኦቼዳ።

ሽን መና ጎዳይ፥ "ይሁዳ ዛሪ ስንቲደ ቦ" ያጌዳ።

19 ሄዋፐ ጉየ ዎንተ ጋላስ ዎንታ ጉራን እስራኤልያ አሳይ ደንዲደ፥ ግብኣ ካታማ ማታን ዱንካኔዳ። 20 ሄዋፐ እስራኤልያ አሳይ ቢንያማ አሳና ኦለታናዉ ቤዳ፤ ግብኣ ካታማ ማታን ኡንቱንቱና ኦለታናዉ ሳልፔዳ። 21 ቢንያማ አሳቱ ግብኣ ካታማፐ ከሲደ፥ ሄ ጋላስ እስራኤልያፐ ላታማነ ላኡ ሻአ ኦላንቻቱዋ ዎድኖ። 22,23 እስራኤልያ አሳይ ቢደ ሳአይ ቃማና ጋካናዉ፥ መና ጎዳ ስንን ዬኪደ፥ "ኑ እሻቱዋና፥ ቢንያማ አሳቱዋና ኦለታናዉ ላኤንዋ ፑደ ባኔ?" ያጊደ መና ጎዳ ኦቼዳ።

ሽን መና ጎዳይ፥ "ኤ፥ ኡንቱንቱና ኦለታናዉ ፑደ ቢተ" ያጌዳ። ሄዋፐ ጉየ እስራኤልያ አሳይ እቱ እቱዋ ምንደ፥ ኮይሮ ጋላስ ኡንቱንቱ ኦላዉ ሳልፔዳ ሳኣን ላኤንዋ ሳልፔድኖ።

24 ላኤን ጋላስ እስራኤልያ አሳይ ቢንያማ አሳና ኦለታናዉ ሺቄዳ። 25 ላኤን ጋላስካ ቢንያማ አሳይ ግብኣ ካታማፐ ከሲደ፥ እስራኤልያ አሳፐ ታማነ ሆስፑን ሻአ አሳቱዋ ዎዳ፤ ኡባቱካ ማሻን ኦለትያዋንታ።

26 ሄዋፐ ጉይያን፥ እስራኤላቱ ኡባይ ቤቴለ ቢደ ዬኬድኖ፤ ያን ጾሚደ ሳአይ ቃማና ጋካናዉ፥ መና ጎዳ ስንን ኡቴድኖ፤ መና ጎዳ ስንን ጹግያ ያርሹዋነ እትፐተ ያርሹዋ ሺሼድኖ። 27,28 ሄ ዎደ ጾሳ ቃላ ጫቁዋ ታቦታይ ቤቴለ ካታማን ደኤ፤ ሄ ታቦታ ናግያዌ አሮነ የሌዳ ኤልኣዛራ ናኣ ፒንሃሳ። እስራኤልያ አሳይ መና ጎዳ፥ "ቢንያማ አሳ ግድያ ኑ እሻቱዋና ኦለታናዉ ቃይካ ፑደ ባኔየ ቦፓነ?" ያጊደ ኦቼዲኖ።

ሽን መና ጎዳይ፥ "ቢደ ኦለትተ! ታን ኡንቱንታ ዎንት ህንተንቱ ኩሽያን አደ እማና" ያጌዳ።

29 ሄዋፐ ጉየ እስራኤልያ አሳይ አማሬዳ ኦላንቻቱዋ ግብኣ ካታማ ዩሹዋን ሙጊደ ናጋና ማላ ኦዳ። 30 ሄዛን ጋላስ እስራኤልያ ኦላንቻቱ ካሰዋዳንካ ቢንያማ ኦላንቻቱዋ ኦላናዉ ቢደ፥ ግብኣ ካታማፐ ስን ባጋና ሳልፔድኖ። 31 ቢንያማ አሳቱ ኡንቱንቱና ኦለታናዉ ካታማፐ ከሲደ፥ ኡንቱንታ ካሊደ፥ ሃኪደ ቤድኖ። ካሰዋዳንካ ቤቴለነ ግብኣ አፍያ አኮ ኦገቱዋንነ ደምባቱዋን እስራኤልያ አሳፐ ሀታሙ ግድያ አሳቱዋ ዎድኖ። 32 ቢንያማ አሳቱ፥ "ኑን ካሰዋዳንካ ኡንቱንታ ጾኔዶ!" ያጌድኖ።

ሽን እስራኤልያ አሳቱ ካሰ፥ "ኡንቱንቱ ካታማፐ ሃኪደ፥ ኦገቱዋኮ ከሳና ማላ፥ አነ ኑን ባቃቶይተ" ያግ ዎድኖ። 33 ያትና፥ እስራኤልያ አሳይ ኡባይ ባረንቱ ሳፐ ደንዲደ፥ ባኣል-ታማራ ግያ ሳን ሳልፕያ ዎደ፥ እስራኤላቱ ባረንቱ ሙግ ኡቴዳ ገባአ ደምባፐ ከሴድኖ፤ 34 እስራኤልያ ኡባፐ ዶረቴዳ ታሙ ሻአ አሳቱ ግብኣ ቦላ ኦላ ደንድኖ፤ ኦላይ ሎይ ዎልቃሜዳ። ሄ ኡባይ ሀንያ ዎደ፥ ባረንቶ ባሻይ ማታቴዳዋ ቢንያማ አሳቱ አይነ ኤርቤይክኖ። 35 እስራኤላቱ ቢንያማ አሳቱዋ ቦላ ጾኑዋ ደማናዳን መና ጎዳይ ኦዳ። ሄ ጋላስ እስራኤልያ አሳይ ቢንያማ አሳፐ ላታማነ እቼሹ ሻአነ እት ጼቱ ኦላንቻቱዋ ዎዳ፤ ኡባቱካ ማሻን ኦለትያዋንታ። 36 ሄዋ ድራዉ፥ እስራኤልያ አሳይ ባረንታ ጾኔዳዋ ቢንያማ አሳይ ኤሬዳ።

እስራኤልያ አሳይ ግብኣ ካታማ ዩሹዋን ሙግ ኡቴዳ ኦላንቻቱዋን አማነቴዳ ድራዉ፥ ቢንያማ አሳን ጾነቴዳዋ ማላቲደ ጉየ ሺቄዳ። 37 ሙጊደ ናግያ ኦላንቻቱ ግብኣ ካታማ ኤለካ ዎጽ ገሊደ፥ ካታማ ግዶን ደሜዳ ኡባ ዎድኖ። 38 ሙጊደ ናግያ እስራኤልያ ኦላንቻቱ ካታማ ግዶፐ ዳሮ ጩዋ ሻርያዳን ፑደ ደንና ማላነ ሄዌ ማላታ ግዳና ማላ፥ ካሰ ሃሳይ ዎድኖ። ሄዋ ድራዉ፥ ዳሮ ጩዋ ሻሪ ካታማፐ ከስያዋ በኤዳ ዎደ፥ 39 ኦላ ደምባን ደእያ እስራኤልያ አሳቱ ባቃትያሳፐ ጉየ ስሚደ፥ ኡንቱንታ ኦሌድኖ።

ቢንያማ አሳቱ እስራኤልያ አሳፐ ሀታሙ ግድያ አሳቱዋ ዎደ፥ "ካሰዋዳን ሀእካ ኑን ኡንቱንታ ጾኔዶ" ያጌድኖ። 40 ሽን ማላታ ጩዋይ ካታማፐ ፑደ ከሳ ዶሜዳ፤ ቢንያማ አሳቱ ባረንቱ ጉየ ጼሎ ዎደ፥ ካታማይ ኡባና ታማን ጹገትና፥ ታማ ጩዋይ ፑደ ከስያዋ በኤድኖ። 41 ሄዋፐ ጉይያን፥ እስራኤላቱ ቢንያማ አሳቱዋ ቦላ ጉየ ስሜድኖ፤ ቢንያማ አሳቱ ዳጋሜድኖ፤ አያዉ ጎፐ፥ ኡንቱንቱ ዉራና ሀንያዋ ኤሬድኖ። 42 ሄዋ ድራዉ፥ ኡንቱንቱ እስራኤልያ አሳ ስንፐ መላ ቢታ ስሚደ ባቃቴድኖ፤ ሽን ኦላይ ኡንቱንታ ካሊደ ጋኬዳ። ካታማቱዋፐ ከሴዳ እስራኤልያ ኦላንቻቱ ግዱዋን ኡንቱንታ ዎ ዉርሴድኖ። 43 እስራኤላቱ ቢንያማ አሳቱዋ ዶዲደ፥ ግብኣ ካታማፐ አዋይ ዶልያ ባጋና ደእያ ሳኣ ጋካናዉ ካሊደ የደርሴድኖ፤ ጮራቱ ኦግያን ደእሽን ዎድኖ። 44 ሄዋን ቢንያማ አሳፐ ታማነ ሆስፑን ሻአ ምኖ ኦላንቻቱ ሀይቄድኖ፤ 45 ኡንቱቱፐ አቴዳዋንቱ ጉየ ስሚደ፥ መላ ቢታ አደ፥ ርሞና ግያ ዛላኮ ባቃቴድኖ፤ እስራኤላቱ ኡንቱቱፐ እቼሹ ሻአ አሳቱዋ ኦግያን ዎድኖ፤ ኡንቱንቱፐ አቴዳዋንታ ጊድኦማ ግያ ሳኣ ጋካናዉ የደርሲደ፥ ላኡ ሻኣ ዎድኖ። 46 ሄ ጋላስ ቢንያማ ጋድያፐ ማሻን ኦለትያ ላታማነ እቼሹ ሻአ አሳቱ ሀይቄድኖ፤ ሄ ኡባቱካ ምኖ ኦላንቻቱዋ።

47 ሽን ኡሱፑን ጼቱ አሳቱ መላ ቢታ አደ፥ ርሞና ዛላኮ ባቃቲደ፥ ያን ኦይዱ አገና ጋምኤድኖ። 48 እስራኤልያ አሳይ አቴዳ ቢንያማ አሳኮ ጉየ ዛሪደ፥ አቱማ አሳነ ማጫ አሳ፥ ናናነ መህያ ኡባ ዎዲኖ፤ ደሜዳ ካታማቱዋ ኡባ ታማን ጹጌዲኖ።