ድቦራነ ባራቃ የ
1 ሄ ጋላስ ድቦራነ አብኖኣማ ናአይ ባራቅ ሀ የ የጼድኖ።
2 "እስራኤልያ አሳ
ካለያዋንቱ ካለዳ ድራዉ፥
አሳይካ ዶሲደ፥
ባረ ሁጲያ አደ እሜዳ ድራዉ፥
መና ጎዳ ጋላትተ!
3 "ህንተንቶ ካተቶ፥ ሀዋ ስስተ!
ህንተንቶ ደርያ ሞድያዋንቶ፥ ሀይዝተ!
ታን መና ጎዳዉ የጻና።
መና ጎዳዉ እስራኤልያ ጾሳዉ
ጋላታ የ የጻና።
4 አቤት መና ጎዳዉ፥
ኔን ሰኢራ ደርያፐ ደንዴዳ ዎደ፥
ኔን ኤዶማ ቢታፐ ከሴዳ ዎደ፥
ቢታይ ቃጼዳ።
ሳሉዋፐ እራይ ቡኬዳ፤
ኤ፥ ሃይ ሻረቱዋፐ ዱገ ሶሶቴዳ።
5 መና ጎዳ ስንን ደረቱ ቃጼድኖ፤
ሀራይ አትና፥ ሲና ደሪካ መና ጎዳ
እስራኤልያ ጾሳ ስንን ኮኮሬዳ።5:5 ከሳ 19:18
6 "አናታ ናኣ ሻምጋና ዎደነ፥
ያኤላ ዎደ ጫና መህያ ላግያ፥
ዛልአንቻቱ ሄ ቢታና አበይክኖ።
ኦግያና ብያዋንቱካ ኦግያ አጊደ፥
ሎሱዋና ቤድኖ።
7 እስራኤልያ ካታማቱ አሳይ ደኤና ሳኣ ግዴድኖ።
ታን ድቦራ፥ ታን እስራኤልያ አሳዉ፥
አቶ ግዳደ ደንዳና ጋካናዉ ኦንነ አትቤና።
8 እስራኤልያ አሳይ አላጋ ጾሳቱዋ ዶሬዳ ዎደ፥
ጋድያን ኦላይ ደንዴዳ።
ኦይታሙ ሻአ እስራኤልያ ኦላንቻቱዋ ግዱዋን
እት ጎንዳሊ ዎይ እት ቶር ቤትቤና።
9 ታ ዎዛናይ እስራኤልያ ኦላ ጋዳዋቱዋና ደኤ።
አሳ ግዶን ዶሲደ ባረንታ አደ እሜዳዋንቱና ደኤ።
መና ጎዳ ጋላትተ!
10 ህንተንቶ፥ ቦ ሀረቱዋ ቶግያዋንቶ፥
ህንተንቶ፥ ግላስያ ቦላን ኡቴዳዋንቶ፥
ኦግያና ሀመትያዋንቶ፥
ሀዋ ስስተ!
11 ሃ ኦላቱዋ ማታን ሺቄዳ የንቻቱዋ የ ስስተ።
ኡንቱንቱ መና ጎዳይ ጽሎተ ኦሱዋባ የጺኖ፤
ቃይ እስራኤልያ ኦላንቻቱዋ ጽሎተ ኦሱዋባ የጺኖ።
"ሄዋፐ ጉይያን፥ መና ጎዳ አሳይ
ካታማ ገልያ ፐንገቱዋኮ ዱገ ዎዳ።
12 ድቦሬ! ቤጎታ! ቤጎታ!
ቤጎታ! ቤጎታደ ማዝሙርያ የጻ።
ባራቃ፥ ደንዳ!
ኔኖ፥ አብኖኣማ ናአዉ፥ ነ ኦሞዱዋ አካደ ያ።
13 "ሄዋፐ ጉይያን፥ አቴዳ አሳቱ
ካፓቱዋኮ ዱገ ዎድኖ።
መና ጎዳ አሳቱ ኦለታናዉ ጊጊደ
ድቦርኮ ዬድኖ።
14 አማሌቃ ዛራቱ በን ደኤዳ ሳኣን ደእያ፥
ኤፍሬማ አሳቱ ዬድኖ።
ቃይ ቢንያማ አሳቱ ኡንቱንታ ካሌድኖ።
ካፓቱ ማክራ ዛራቱዋፐነ፥
ኦላ ጋዳዋቱ ዛብሎና ዛራቱዋፐ ዱገ ዎድኖ።
15 ይሳኮራ ካፓቱ ድቦርና ዬድኖ፤
ኤ፥ ይሳኮራ አሳይነ ባራቅካ ዬዳ፤
ኡንቱንቱ አ ጌዱዋ ካሊደ፥ ዛንጋራ ገሌድኖ።
ሽን ሮቤላ ዛራቱ ቆፋን ሻከቲደ፥
ያናዋ አጋናዋ ቃችበይክኖ።
16 ኡንቱንቱ አያዉ አቴድኖ?
ዶርሳቱዋ ሄምያዋንቱ እምቢልታ ስሳናዉ አቴድኖየ?
ሮቤላ ዛራቱ ቆፋን ሻከቲደ፥
ያናዋ አጋናዋ ቃችበይክኖ።
17 ጋላኣደ አሳቱ ዮርዳኖሳ ሻፋፐ ሄፍንን አቴድኖ።
ዳና ዛራቱ ማርካባቱ ማታን አቴድኖ።
አሴራ ዛራቱ ባረንቱ ደእያ ሳኣን፥
ሜድትራነ አባ ላንቂያን አቴድኖ።
18 ዛብሎና ዛራቱ ባረንቱ ሸምፑዋ ሀይቆ አደ እሜዳ አሳቱዋ።
ንፍታሌማ ዛራቱካ ኡንቱንቱዋዳን ኦላ ደምባን ባረንቱ ሸምፑዋ አደ እሜድኖ።
19 ካተቱ ዪደ፥ ማግዶ ፑልቶቱዋ ማታን ደእያ ታእናካን ኦለቴድኖ።
ሄ ካናነ ካተቱ ያን ኦለቲደ፥
ኦሞዳናዉ አያ ብራነ ደምቤይክኖ።
20 ሳሉዋን ደእያ ጾልንተቱካ ኦለቴድኖ።
ባረንቱ ዩይያ ዩሻን ኡንቱንቱ ስሳራና ኦለቴድኖ።
21 ቂሾና ሻፋይ፥ በንፐ፥
ኤረቴዳ ቂሾና ሻፋይ ኩንደ፥
ሄ ካተቱዋ ሾኪደ አፌዳ።
ታ ሸምፓቴ፥ ስም ምና፤
ስንዉ ጋልፋ።
22 ሄዋፐ ጉይያን፥ ፓራ አሳቱ አንዳራሰቲደ ዬድኖ።
ፓራቱ ባረንቱ ኮትያን ጋድያ ጊርሴድኖ።
23 መና ጎዳ ኪታንቻይ፥
‘መሮዛ ሸቂተ!
ያን ደእያ አሳ ኢሲደ ሸቂተ!
አያዉ ጎፐ፥ ኡንቱንቱ መና ጎዳዉ ኤቃናዉ ይበይክኖ።
አ ዎልቃማ ሞርከቱዋና ኦለታናዉ ከስበይክኖ’ ያጌዳ።
24 "ቄና ሄቤራ ማቻታ
ያኤላ ማጫ አሳ ኡባፐ አንጀቴዳኖ ግዱ።
ዱንካነ ግዶን ደእያ ማጫ አሳ ኡባፐ እዛ አንጀቴዳኖ ግዱ።
25 ስሳር እዞ ሃ ኦችና፥
ማ አዉ እማዱ።
ሎኦ ቃራባን መኤዳ ማ አሃዱ።
26 እት ኩሽያ የዳደ ዱንካንያ ሽካልያ፥
ኡሸቻ ኩሽያን ኦሳንቻቱዋ ማርቴሉዋ ኦይቃዱ።
ስሳራ ሁጲያን ጋዱ፤
ሀይ ካርያና ካን ከሳዱ።
27 ያትና፥ እ ቦልቁ ጊደ ኩንዴዳ።
እ ሄ እዝ ገድያ ማታን
ቦልቁ ጊደ ኩንዴዳ።
ሄ ኩንዴዳ ሳኣን ሀይቄዳ።
28 ስሳራ ዳያ ማስኮትያና ጼላዱ።
‘ታ ናኣ ፓራ ጋሪ አያዉ ጋምኤዴ?
ፓራቱ ኤሌሊደ አያዉ ስምበይክኖ?’
ያጋደ ኦቻዱ።
29 እዝ አዳ ኤራንቻ ማጫ አሳቱ እዝ ኦሻ ዛሬድኖ።
ሽን እዛ ባረ ቆፋን ዛራ ዛራደካ ሀዋዳን ያጋዱ፤
30 ኡንቱንቱ ኦሞዲደ ሻክያዋ ደመናን አግክኖ።
እት እት ኦላንቻ እት እት ዎይ ላኡ ላኡ ዎዶራቱ ጋከናን አግክኖ።
ስሳራዉ ኡንቱንቱ ሎእያ ማዩዋ እማና፤
ቃይ ታዉካ ቆያን ጻጻናዉ፥
ጽልፍያን አሌቀቲደ ሎእያ ማዮቱዋ
ኡንቱንቱ አሀና ያጋዱ።
31 "አቤት መና ጎዳዉ፥ ነ ሞርከቱ ኡባይ ሄዋዳን ሀይቂኖ!
ሽን ነ ሲቃቱ ጉራ ዶልያ አዋዳን ጶልኖ፤
አዋይ ባረ ዎልቃን ከስያዋዳን" ያጌድኖ።
ሄዋፐ ጉይያን፥ ጋዲ ኦይታሙ ላይ ዎፓ ደሜዳ።