ዮፍታሀነ ኤፍሬማ አሳ
1 ኤፍሬማ አሳይ ኦላ ባናዉ ጼገቲደ፥ ዮርዳኖሳ ሻፋ ፕኒደ፥ ጻፎና ጌተትያ ካታማ ጋኬዳ ዎደ፥ ዮፍታሀ፥ "አሞናቱዋ ኦላናዉ ዛዋ ፕናደ ባደ፥ ኔናና ባናዳን አያዉ ኑና ጼሳበይኪ? ኑንካ ነ ጎልያ ነ ቦላ ታማን ጹጋና" ያጌድኖ።
2 ሄዋፐ ጉየ ዮፍታሄ ኡንቱንታ፤ "ታንነ ታ አሳይ አሞናቱዋና ሎይ ዋቴዳ ዎደ፥ ታን ህንተንታ ጼሳድ፤ ሽን ህንተንቱ ታና ኡንቱቱፐ አሽበይክታ። 3 ህንተንቱ ታና አሸናዋ በኤዳ ዎደ፥ ዛዋ ፕናደ ታ ሸምፖ ቃረተናን አሞናቱዋ ኦላናዉ ባድ፤ መና ጎዳይ ኡንቱንታ ታ ኩሽያን አደ እሜዳ። ያትና፥ ህንተንቱ ሀቼ አያዉ ታና ኦላናዉ ዬድቴ?" ያጌዳ።
4 ሄዋፐ ጉይያን፥ ዮፍታሄ ጋላኣደ አሳ ኡባ ሺሺደ፥ ኤፍሬማ አሳና ኦለቴዳ፤ ጋላኣደ አሳቱ ጾኔድኖ። አያዉ ጎፐ፥ ኤፍሬማ አሳይ ካሰ ኡንቱንታ፥ "ህንተንቱ ጋላኣደን ደእያ አሳቱ ካሰ ኤፍሬማ ዛራቱዋፐነ ምናሰ ዛራቱዋፐ በቲደ ዬዳዋንታፐ አትና፥ ሀራቱዋ ግድክታ" ያግ ዎዳ።
5 ኤፍሬማ አሳይ ባቃተናዳን፥ ዮርዳኖሳ ሻፋ ፕኑዋ ኡባ ጋላኣደቱ ኦይቄድኖ፤ ባቃታናዉ ኮይያ ኤፍሬማ አሳይ ኦንነ ፕናናዉ ኦችያ ዎደ ጋላኣደቱ፥ "ኔን ኤፍሬማ አሴ?" ያጊደ ኦችና፥ "ግድከ" ጎፐ፥ 6 "አነ፥ ‘ሽቦለቱዋ’ ጋ" ያጊኖ። ሽን እ፥ "ሽ" ግያ ፕዶልያ ሎይ ጼጋናዉ ዳንዳየና ድራዉ፥ "ስቦለቱዋ" ያጌ። ሄ ዎደ ኦይቂደ፥ ዮርዳኖሳ ሻፋ ፕንያሳን ዎኖ። ሄ ዎደ ያን ኤፍሬማ አሳፐ ኦይታማነ ላኡ ሻአ አሳይ ሀይቄዳ።
7 ዮፍታሄ እስራኤልያ አሳ ቦላን ዳናቲደ፥ ኡሱፑን ላይ ፕርዴዳ። ሄዋፐ ጉይያን፥ ጋላኣድያ ዮፍታሄ ሀይቄዳ፤ ጋላኣደን ደእያ ባረ ካታማን ሞገቴዳ።
እብጻና
8 ዮፍታሄፐ ካሊደ፥ ቤተሌመ እብጻን እስራኤልያ አሳ ቦላ ፕርድያ ዳና ግዴዳ። 9 እብጻናዉ ሀታሙ አቱማዋ ናናይነ ሀታሙ ማጫ ናናይ ደኢኖ፤ እ ባረ ማጫ ናና ባረ ያራ ግደና አቱማ ናናቶ እሜዳ፤ ባረ አቱማ ናናቶካ ባረ ያራ ግደና ማጫ ናና ጊግሲደ አሄዳ። እብጻን እስራኤልያ ቦላ ላፑን ላይ ዳናቲደ ፕርዴዳ። 10 ሄዋፐ ጉይያን ሀይቂደ፥ ቤተሌመ ካታማን ሞገቴዳ።
ኤሎና
11 እብጻናፐ ካሊደ፥ ዛብሎንያ ኤሎን እስራኤልያ አሳ ቦላ ዳናቲደ፥ ታሙ ላይ ፕርዴዳ። 12 ሄዋፐ ጉይያን ሀይቄዳ፤ ዛብሎና ጋድያን ደእያ አያሎና ካታማን ሞገቴዳ።
አብዶና
13 ኤሎናፐ ካሊደ፥ ህሌላ ናአይ አብዶን፥ ፕርኣቶና ግያ ሳን ደኤዳዌ፥ እስራኤልያ ቦላ ፕርድያ ዳና ግዴዳ። 14 አብዶናዉ ላፑን ታሙ ሀረቱዋ ቶግያ ኦይታሙ አቱማ ናናይነ ሀታሙ ናናቱዋ ናናይ ደኢኖ፤ አብዶን እስራኤልያ አሳ ቦላ ዳናቲደ፥ ሆስፑን ላይ ፕርዴዳ። 15 ሄዋፐ ጉይያን፥ ህሌላ ናአይ አብዶን ሀይቄዳ፤ አማሌቃቱዋ ገዝያን ኤፍሬማ ጋድያን ደእያ ፕርኣቶናን ሞገቴዳ።