Juízes 11

1 ጋላኣድያ ዮፍታሄ ምኖ ኦላንቻ። አ አዉ ጋላኣደ፤ ሽን አ ዳያ ሻርሙጽያ ማጫ አሳ። 2 ጋላኣደ አኬዳ ማቻታካ አዉ አቱማ ናና የላዱ። ኡንቱንቱ ድጭ ጋኬዳ ዎደ፥ ባረንቱ እሻ ዮፍታሀ፥ "ኔን ሀራ ምሽራት ናኣ ግዴዳ ድራዉ፥ ኑ አዉዋ ቢታፔ አያነ ላታካ" ያጊደ ሶይፔ የደርሴድኖ። 3 ያትና፥ ዮፍታሄ ባረ እሻቱዋፐ ባቃቲደ፥ ጾባ ጌተትያ ጋድያን ደኤዳ። ያን እ ደእሽን፥ አማሬዳ ሹፉሮ አሳቱ አኮ ሺቂደ፥ አ ካሌድኖ።

4 አማሬዳ ዎድያፐ ጉይያን፥ አሞናቱ እስራኤላቱዋና ኦለቴድኖ። 5 አሞናቱ እስራኤልያ አሳና ኦለቴዳ ዎደ፥ ጋላኣደ ጋድያ ጭማቱ ጾባ ጋድያፐ ዮፍታሀ ዛር አሀናዉ ቤድኖ። 6 ኡንቱንቱ አ፥ "ሃያ፥ አሞናቱዋ ኑን ኦላና ማላ፥ ያደ ኑዉ ጋዳዋ ግዳ" ያጌድኖ።

7 ሄዋፐ ጉየ ዮፍታሄ ጋላኣደ ጭማቱዋ፥ "ታና እጺደ፥ ታ አዉዋ ጎልያፐ የደርሴዳዌ ህንተንታ ግድክቴ? ሀእ መቱዋን ገሊደ፥ ታኮ አያዉ ዬድቴ?" ያጌዳ።

8 ሄዋፐ ጉየ ጋላኣደ ጭማቱ አ፥ "ግዶፐነ፥ ሀእ ኑን ኔኮ ስሜዶ፤ አያዉ ጎፐ፥ ኔን ኑናና ኦላ ባደ፥ አሞናቱዋ ኑ ኦላና ማላነ ጋላኣደ አሳ ኡባዉ ኔን ካፑዋ ግዳና ማላ፥ ኑን ኮዬቶ" ያጌድኖ።

9 ሄዋፐ ጉየ ዮፍታሄ፥ "አሞናቱዋና ኦለታናዉ ህንተንቱ ታና ጉየ ሶ ዛርና፥ መና ጎዳይ ኡንቱንታ ታ ኩሽያን አደ እሞፐ፥ ታን ቱሙ ህንተንቱ ካፑዋ ግዳና" ያጌዳ።

10 ጋላኣደ ጭማቱ ዮፍታሀ፥ "መና ጎዳይ ኑ ግዱዋን ማርካ! ኔን ግያዋ ቱሙ ኑን ኦና" ያጊደ ዛሬድኖ። 11 ያትና፥ ዮፍታሄ ጋላኣደ ጭማቱዋና ቤዳ፤ አ ባረንቱ ካፑዋነ ጋዳዋ ኦድኖ። ዮፍታሄ ምጽጳን መና ጎዳ ስንን ሀ የዉዋ ኡባ ሃሳዬዳ።

12 ሄዋፐ ጉይያን፥ ዮፍታሄ አሞናቱዋ ካትያኮ አሳ ኪቲደ፥ "ኔን ኑ ጋድያ ቦላን ዎራጄዳዌ አያ ጋሱዋኔ?" ያጊደ ኦሽሴዳ።

13 ዮፍታሄ ኪቴዳ አሳቶ አሞናቱዋ ጋድያ ካቲ ዛሪደ፥ "እስራኤልያ አሳይ ግብጼ ጋድያፐ ከሴዳ ዎደ፥ አርኖና ሻፋፐ ዶሚደ፥ ያቦቃ ሻፋ ጋካናዉ፥ ቃይ ዮርዳኖሳ ሻፋ ጋካናዉ ደእያ ታ ጋድያ አኬዳ። ሀእ ታ ጋድያ ሳሩዋን ዛርተ" ያጌዳ።

14 ዮፍታሄ ላኤንዋ አሞናቱዋ ካትያኮ አሳ ኪቴዳ። 15 ሀዋዳን ያጌዳ፤ "እስራኤልያ አሳይ ሞኣበ ጋድያ ዎይ አሞና ጋድያ አክቤና። 16 እስራኤልያ አሳይ ግብጼ ጋድያፐ ከሴዳ ዎደ፥ መላ ቢታ አ ቢደ፥ ዞኦ አባ ጋኬዳ፤ ሄዋፐ ቃይ ቃዴሳ ግያ ሳኣ ዬዳ። 17 እስራኤልያ አሳይ ኤዶማ ጋድያ ካትያኮ አሳ ኪቲደ፥ ‘ነ ቢታና ኑና አርኪ’ ያጌዳ፤ ሽን ኤዶማ ካቲ አናን እጼዳ። ሄዋዳንካ፥ ሞኣበ ካትያኮ ኪትና፥ እካ አናን እጼዳ። ያትና፥ እስራኤልያ አሳይ ቃዴሰን ጋምኤዳ።✝11:17 ፓይ. 20:14-21

18 "ሄዋፐ ጉይያን መላ ቢታና አደ፥ ኡንቱንቱ ኤዶማነ ሞኣበ ቢታቱዋ ዩዪደ፥ ሞኣበ ጋድያፐ አዋይ ዶልያ ባጋና ዬድኖ፤ አርኖና ሻፋፐ ሄፍን ባጋና ደእያ ሳኣን ዱንካኔድኖ፤ ሽን አርኖና ሻፋይ ሞኣበ ዛዋ ግዴዳ ድራዉ፥ ሞኣበ ባጋ ፕንበይክኖ።✝11:18 ፓይ. 21:4

19 "ሄዋፐ ጉይያን፥ እስራኤልያ አሳይ ሃሰቦና ጌተትያ ካታማን ደእያ አሞራዋናቱዋ ካትያ ስሆናኮ አሳ ኪቲዴ ኡንቱንቱ፥ ‘ሀያና፥ ነ ቢታና ኑና ኑ ጋድያ አርኪ’ ያጌድኖ።✝11:19-22 ፓይ. 21:21-24 20 ሽን ስሆን እስራኤልያ አሳ አናዉ አማንቤና። እ ባረ አሳ ኡባ ሺሺደ፥ ያሃጻ ግያ ሳን ዱንካኒደ፥ እስራኤልያ አሳና ኦለቴዳ። 21 መና ጎዳይ እስራኤልያ ጾሳይ ስሆናነ አ አሳ ኡባ እስራኤልያ አሳ ኩሽያን አደ እምና፥ ኡንቱንታ ጾኔድኖ፤ ያን ደኤዳ አሞራዋናቱዋ ቢታ ኡባ ላቴድኖ። 22 አርኖና ሻፋፐ ቢደ፥ ያቦቃ ሻፋ ጋካናስነ መላ ቢታፐ ቢደ፥ ዮርዳኖሳ ሻፋ ጋካናዉ ደእያ አሞራዋናቱዋ ጋድያ ኡባ ኦሞዲደ አኬድኖ።

23 "ሄዋዳን ኦደ፥ መና ጎዳይ እስራኤልያ ጾሳይ ባረ አሳ እስራኤልያ ስንፐ አሞራዋቱዋ የደርሲደ ይሴዳ። ያትና፥ ኔን ነዉ አካናዉ ዋና ቆፓዲ? 24 ኔን ነ ጾሳይ ካሞሽ ነዉ እምያዋ አክኪ? ሄዋዳንካ፥ ኑን መና ጎዳይ ኑ ጾሳይ ኑዉ እሜዳዋ ኡባ ላቲደ ደአና።

25 "ኔን ጽፖራ ናኣ ሞኣበ ካትያ ባላቃፐ ምናይ? እ እስራኤልያ አሳና ዋላቀቲደ ዎይ ኦለቴዴ?✝11:25 ፓይ. 22:1-6

26 "እስራኤልያ አሳይ ሃሰቦና፥ አሮኤራነ ኡንቱንቱ ዩሹዋን ደእያ ካታማቱዋ ኡባ፥ ሄዋዳንካ፥ ቃይ አርኖና ሻፋ ጋጻን ደእያ ካታማቱዋ ኡባ ላቲደ፥ ሄዙ ጼቱ ላይ ደኤድኖ። ያትና፥ ሄ ዎደ አያዉ ዎ አክበይክቴ? 27 ታን ታ ባጋና ህንተንታ አያነ ናቃበይከ፤ ሽን ታና ኦላ ኦላደ ናቂያዌ ኔና። ፕርድያ መና ጎዳይ ሀቼ እስራኤልያ አሳፐነ አሞና አሳፐ ግዱዋን ፕርዶ" ያጌዳ።

28 ሽን ዮፍታሄ ኪቴዳ ኪታ አሞናቱዋ ካቲ ስሰናን እጼዳ።

29 ሄ ዎደ መና ጎዳይ አያናይ ዮፍታሄ ቦላ ዎና፥ ጋላኣደነ ምናሰ ቢታቱዋ ፕን ቢደ፥ ጋላኣደ ጋድያን ደእያ ምጽጳ ስሜዳ፤ ሄዋፐ ኦላንቻቱዋ ካለደ፥ አሞናቱዋ ጋድያ ቤዳ። 30 መና ጎዳ ሺቁዋ ሺቀቲደ፥ "ኔን አሞናቱዋ ታ ኩሽያን አደ እሞፐ፥ 31 ኦላን ጾናደ ታን ሶ ስምያ ዎደ፥ ታና ሞካናዉ ታ ሶፐ ከስያዌ አያነ ግድና ኔሳ፤ ታን አ ነዉ ጹግያ ያርሹዋ ኡዳደ ሺሻና" ያጌዳ።

32 ሄዋፐ ጉይያን፥ ዮፍታሄ አሞናቱዋ ኦላናዉ ያ ባጋ ሃ ፕኒደ ቤዳ፤ መና ጎዳይ ኡንቱንታ አ ኩሽያን አደ እሜዳ። 33 አሮኤራፐ ዶሚደ፥ ቢደ ሚኒታነ አቤል-ካራሚማ ማታ ጋካናዉ፥ ላታሙ ካታማቱዋ ኦለቲደ ባይዜዳ፤ ዳሮ አሳ ዎ ዉርሴዳ። ሄዋፐ ጉይያን፥ አሞናዋቱ እስራኤላቶ ሞደቴድኖ።

ዮፍታሄ ናቶ

34 ዮፍታሄ ምጽጳን ደእያ ባረ ሶ ስሜዳ ዎደ፥ ኮይሮታደ አ ናታ ካባሩዋ ኦይቃደ የጻደነ ዱራደ አ ሞካናዉ ከሳዱ። አዉ ኢፐ ሀራ ናእ ባዋ። 35 እ እዞ በኤዳ ዎደ፥ ካዩዋን ባረ ማዩዋ ፔደ፥ "ሀይ ፖራ ታ ናተ! ታና ካዉሻ ድጋዳ፤ ታና ጋክያ መቶ ኔን ጋሶ ግዳዳ። አያዉ ጎፐ፥ ታን መና ጎዳዉ ሺቀታ ኡታድ፤ ሄዋ ሺቁዋ ጋናን አጋናዉ ዳንዳይከ!" ያጌዳ።✝11:35 ፓይ. 30:2

36 ሄዋፐ ጉየ ናታ፥ "ታ አዎ፥ ኔን መና ጎዳው ሺቀቴዳዋ ግዶፐ፥ መና ጎዳይ ነ ሞርከቱዋ፥ አሞናቱዋ ቦላ ነ ሀሉዋ ከሴዳ ድራዉ፥ ኔን ሺቀቴዳዋ ታ ቦላ ፖላ" ያጋዱ። 37 ቃይካ አ ባረ አዉዋ፥ "ታዉ እትባ ኦርኪ። ታን ሙለ አስና ገለናን አትያ ድራዉ፥ ታ ላገቱዋና ባደ ደረቱዋ ቦላ ታ ዎዶሮተዉ ዬካና ማላ፥ ላኡ አግናዉ ታና የዳርኪ" ያጋደ ኦቻዱ።

38 እ፥ "ባ" ያጊደ፥ ላኡ አግናዉ የዴዳ፤ እዛ ባረ ላገቱዋና ደርያ ሁጲያ ከሳደ ባረ ዎዶሮተዉ ኡንቱንቱና ዬካዱ። 39,40 ላኡ አግናፐ ጉይያን፥ ባረ አዉዋኮ ስማደ ያዱ፤ ጾሳዉ ባረ ሺቀቴዳ ሺቁዋ ጋዳ። እዛ ኡባካ አቱማ አሳን ጋከተናን አታዱ።

ሄ ዎድያፐ ዶሚደ፥ እስራኤላቱ ማጫ ናናይ ላይን ላይን ኦይዱ ጋላሳ ባረንቱ ሶፐ ሃክ ቢደ፥ ጋላኣድያ ዮፍታሄ ናትዉ ዬክያዌነ ካዮትያዌ ሜዘ ግዴዳ።