1 እስራኤልያ አሳይ መና ጎዳ ስንን ዛረደ ኢታባ ኦዳ። ሄዋ ድራዉ፥ መና ጎዳይ ኡንቱንታ ሚድያማ አሳዉ አደ እሜዳ። ላፑን ላይ ኡንቱንታ ሞዴድኖ። 2 ምድያማ አሳይ እስራኤልያ አሳ ቦላ ምኔዳ፤ እስራኤልያ አሳይ ኡንቱንቱፐ አታናዉ ደርያ ቦላን ቆሰቲያሳ፥ ጎንጎሉዋነ ጌሱዋ ጊግሴዳ። 3 እስራኤልያ አሳይ ካ ዘሬዳ ዎደ ኡባን፥ ሚድያማ አሳይ አማሌቃ አሳናነ አዋይ ዶልያ ባጋ ጋድያን ደእያ አሳና ዪደ ኡንቱንታ ኦሊኖ። 4 ኡንቱንቱ ሄ ጋድያን ዱንካኒደ፥ ጋዛ ካታማ ጋካናዉ፥ ጋድያ ኡባ ቦላን ዶሌዳባ ይስኖ፤ ዶርሳ፥ መህያነ ሀርያ ላጊደ አፍያ ድራዉ፥ እስራኤልያ አሳዉ አያነ አሽክኖ። 5 ባረንቱ መህያነ ባረንቱ ዱንካንያ አኪደ፥ ቦሊ ይያዋዳን ጮራቲደ ዪኖ፤ ኡንቱንታነ ኡንቱንቱ ጋሎቱዋ ፓይዳናዉ ዳንዳየተና፤ ኡንቱንቱ ዪደ ጋድያ ባይዝኖ። 6 እስራኤልያ አሳይ ሚድያማ አሳ ጋሱዋን ካዉሼዳ፤ ያቲደ ማዱዋ ደማናዉ መና ጎዳኮ ዋሴዳ።

7 ሚድያማ አሳ ጋሱዋን እስራኤልያ አሳይ መና ጎዳኮ ዋሴዳ ዎደ፥ 8 መና ጎዳይ ኡንቱንቱኮ እት ትምቢትያ ኦድያዋ ኪቴዳ። ትምቢትያ ኦድያዌ ኡንቱንታ፥ "መና ጎዳይ እስራኤልያ ጾሳይ ሀዋዳን ያጌ፤ ‘ግብጼፐ፥ አይለተ ጋድያፐ ታን ህንተንታ ከሳድ። 9 ታን ህንተንታ ግብጼ አሳ ኩሽያፐነ ኡቁንያ አሳ ኡባ ኩሽያፐ አሻድ፤ ህንተንቱ ስንፐካ ኡቁንያ አሳ የደርሳደ፥ ኡንቱንቱ ጋድያ ህንተንቶ እማድ። 10 ያታደ ታን ህንተንታ፥ "ታን መና ጎዳ ህንተንቱ ጾሳተነ፤ ህንተንቱ ኡንቱንቱ ጋድያ ላቴዳ አሞራዋናቱዋ ጾሳቶ ጎይኖፕተ" ያጋደ ኦዳድ። ሽን ህንተንቱ ታ ቃላ ስሰናን እጼድታ’ ያጌ" ያጌዳ።

11 ሄዋፐ ጉይያን፥ መና ጎዳ ኪታንቻይ ኦፍራ ግያ ሳን ደእያ አብኤዘራ ያራ ዮኣሻ ዎላ ጋርሳን ኡቴዳ። ሄ ዎደ ዮኣሻ ናአይ ጌዶን ምድያማ አሳፐ ቆሰታናዉ ዎይንያ ኤሳ ጉምኢያሳን ዛርጋ ቡኬ። 12 ሄዋን መና ጎዳ ኪታንቻይ አዉ ቤቲደ፥ "ላ ነኖ፥ ምኖ ኦላንቻዉ፥ መና ጎዳይ ኔናና ደኤ" ያጌዳ።

13 ጌዶን አ፥ "ሀይ ታ ጎዳዉ! መና ጎዳይ ኑናና ደእያዋ ግዶፐ፥ ሀ መቱ ኡባይ ያትና ኑና አያዉ ጋኬዴ? ኑ አዎቱ፥ ‘መና ጎዳይ ኑና ግብጼ ጋድያፐ ከሴዳ’ ያጊደ ኑዉ ኦዴዳ ማላልስያ አ ኦሶቱ ኡባይ ሀቃን ደኢኖ? ሽን ሀእ መና ጎዳይ ኑና ሙለ አጊደ፥ ሚድያማ አሳዉ አደ እሜዳ" ያጌዳ።

14 ሄዋፐ ጉይያን መና ጎዳይ አኮ ስሚደ፥ "ነዉ ደእያ ዎልቃን ባደ፥ እስራኤልያ አሳ ሚድያማ አሳ ኩሽያፐ አሻ። በአ፥ ኔና ኪትያዌ ታና" ያጌዳ።

15 ጌዶን፥ "አቤት መና ጎዳዉ፥ ታን እስራኤልያ አሳ ዋታደ አሾ? ታ ያራይ ምናሰ ዛራቱዋ ኡባፐ አዳ ላፋ፤ ታንካ ታ አዉዋ ሶ አሳ ኡባፐ ጉ" ያጊደ ዛሬዳ።

16 መና ጎዳይ፥ "ቱሙፐ ታን ኔናና ግዳና፤ እት አሳ ሾጭያዋዳን፥ ኔን ሚድያማ አሳ ሾጫደ ጾናና" ያጌዳ።

17 ጌዶን፥ "ኔን ታናን ናሸቴዳዋ ግዶፐ፥ ታናና ሃሳይያዌ ኔን ቱሙፐ ጾሳ ግድያዋ ታን ኤራና ማላ፥ ማላታ ታና በሳ። 18 ታን ጉየ ስማ ባደ፥ ነዉ እምያዋ አሀና ጋካናዉ፥ ሀያና ሀዋፐ ቦፓ" ያጌዳ።

መና ጎዳይ፥ "ኔን ስማና ጋካናዉ፥ ታን ሀዋን ናጋና" ያጌዳ።

19 ጌዶን ባረ ሶ ገሊደ፥ ቦልትቦልታ ዴሻ ማራ ሹኪደ ካዳ፤ እት ታሙ ኪሎ ግራመ ግድያ ልያ አኪደ፥ እርሹዋ የገናን ኡክ ኡኬዳ። አሹዋ ማሶፍያን ዎደ፥ ጫባ ከርያን ትጌዳ፤ ኡባካ አኪደ አፊደ፥ ዎላ ጋርሳን ኡቴዳ ጾሳ ኪታንቻዉ ሺሼዳ። 20 ጾሳ ኪታንቻይ አ፥ "አሹዋነ እርሹ ገልቤና ኡክ አካደ፥ ሀ ሹቻ ቦላ ዎ፤ ጫባካ አ ቦላ ትጋ" ያጌዳ፤ ሄዋፐ ጉይያን ጌዶን ሄዋዳን ኦዳ። 21 መና ጎዳ ኪታንቻይ ባረ ኩሽያን ኦይቄዳ ጻምኣ ጼራን አሹዋካ እርሹ ገልቤና ኡክ ቦቼዳ፤ ታማይ ሹቻ ግዶፐ ከሲደ፥ አሹዋካ እርሹ ገልቤና ኡክ ሜዳ፤ ሄዋፐ ጉይያን፥ መና ጎዳ ኪታንቻይ አ ስንፐ ጌሜዳ።

22 ጌዶን በኤዳዌ መና ጎዳ ኪታንቻ ግድያዋ አኬኬዳ ዎደ፥ "አየ አና! ኡባ ሞድያ መና ጎዳዉ፥ ታን መና ጎዳ ኪታንቻ ታ አይፍያን በኣድ!" ያጌዳ።

23 ሽን መና ጎዳይ፥ "ሳሩ ነዉ ግዶ! ያዮፓ! ሀይቃካ" ያጌዳ። 24 ጌዶን መና ጎዳዉ ያርሽያ ሳኣ ያን ጊግሲደ፥ ሄ ሳኣ መና ጎዳይ ሳሮ ጾሳ ያጊደ ሱንዳ። ሄ ያርሽያ ሳአይ አብኤዘራ ያራቱዋሳ ግድያ ኦፍራን ሀቼ ጋካናዉ ኤቂደ ደኤ።

25 ሄ ጋላስ ቃማ መና ጎዳይ ጌዶና፥ "ነ አዉዋ ቦራ ላኤንዋ፥ ላይይ ላፑና ግዴዳዋ አካ። ነ አዉ ባኣላ ጌተትያ ኤቃዉ ያርሽያ ሳኣ ኮላ፤ አ ጋጻን ደእያ አሼሮ ጌተትያ ማጫ ጾሳቱ ምስልያካ ቃንጸሬ የጋ። 26 ሀ ደርያ ሁጲያን መና ጎዳዉ፥ ነ ጾሳዉ፥ ሹቻፐ ያርሽያ ሳኣ ሎይደ ጊግሳ፤ ሄዋፐ ጉይያን፥ ኔን ቃንጸሬዳ አሼሮ ጌተትያ ጾሳቱ ምስልያ ቆኡዋ ኤደ፥ ላኤን ቦራ ኡባና ጹግያ ያርሹዋ ኡዳደ ያርሻ" ያጌዳ። 27 ጌዶን ባረ ቆማቱዋፐ ታማቱዋ አኪደ፥ መና ጎዳይ አዉ ኦዴዳዋዳን ኦዳ። ሽን እ ባረ አዉዋ ሶ አሳዉነ ካታማን ደእያ አሳዉ ያዬዳ ድራዉ፥ ሄዋ ጋላሳን ኦያዋ አጊደ ቃማን ኦዳ።

28 ዎንታ ጉራን ካታማ አሳይ ደንዴዳ ዎደ፥ ባኣላ ጌተትያ ኤቃዉ ያርሽያ ሳአይ ኮለት ክቼዳዋነ አ ላንቂያን ደእያ አሼር ምስሊ ቃንጸቲደ ዎዳዋ በኤዳ። ቃይ ኡንቱንቱ ያርሽያ ሳአይ ጊጌዳዋነ አ ቦላ ላኤን ቦራይ ያርሸቴዳዋ በኤድኖ። 29 ባረንቱ ግዶን፥ "ላ ሀዋ ኦዳዌ ኦኔ?" ያጊደ እቱ እቱዋ ኦቼድኖ። ኡንቱንቱ ዩይ ዩዪደ ኦቺደ፥ ሄዋ ኦዳዌ ዮኣሻ ናኣ ጌዶና ግድያዋ ኤሬድኖ። 30 ሄዋፐ ጉይያን ካታማ አሳይ ዮኣሻ፥ "ባኣላ ጌተትያ ኤቃዉ ያርሽያ ሳኣ ኮሌዳ ድራዉነ አ ላንቂያን ደእያ አሼር ምስልያ ቃንጸረደ የጌዳ ድራዉ፥ ኑን አ ዎና ማላ፥ ነ ናኣ ሃ ከሳ" ያጌዳ።

31 ዮኣሽ ባረ ቦላን ደንዴዳ አሳ ኡባ፥ "ህንተንቱ ባኣላዉ ሞተቲቴ? ዎይ ህንተንቱ አ አሻናዉ አባካቴ? ህንተንቱ ግዶፐ አዉ ሞተትያ ኡራይ ደኦፐ፥ ሳአይ ዎንታናዉ እ ሀይቆ! ባኣል ጾሳ ግዶፐ፥ ባረ ያርሽያ ሳኣ ኮሌዳዋና እ ባረዉ ሞተቶ" ያጌዳ። 32 ያትና፥ ሄ ጋላስ ዮኣሽ፥ "ኮለቴዳዌ አዉ ያርሽያ ሳኣ ግዴዳ ድራዉ፥ አናና ባኣል ሞተቶ" ያጊደ ጌዶና ሱን የሩባኣላ ጊደ ሱንዳ።

33 ሄዋፐ ጉይያን፥ ሚድያማ ጋድያ አሳይ፥ አማሌቃ ጋድያ አሳይነ አዋይ ዶልያ ባጋ ጋድያ አሳይ ኡባይ እትፐ ሺቂደ፥ ዮርዳኖሳ ሻፋ ፕኔድኖ፤ እዝራኤላ ግያ ዎምባን ዱንካኔድኖ። 34 ሄዋፐ ጉይያን፥ መና ጎዳ አያናይ ጌዶና ቦላ ዎዳ፤ አብኤዘራ ያራ ግድያ አሳይ ኡባይ ባረና ካላና ማላ፥ ኡንቱንታ ጼሳናዉ ማላካታ ፑኔዳ። 35 ምናሰ ዛራቱዋ ኡባዉ አሳ ኪቲደ፥ ባረና ካላና ማላ ኡንቱንታካ ጼስሴዳ። ቃይ አሴራ ዛረቶ፥ ዛብሎና ዛረቶነ ንፍታሌማ ዛረቶ አሳ ኪትና፥ ኡንቱንቱካ አናና ኦላ ባናዉ ከሴድኖ።

36 ሄዋፐ ጉይያን ጌዶን ጾሳ፥ "ታን እስራኤልያ አሳ አሻና ማላ፥ ኔን ታና ዶሬዳዋ ታዉ ኦዴዳዋ ግዶፐ፥ 37 በአ፥ ዛርጋ ቡክያ ኡዱማን ዶርሳ አጎዛ ታን ዎና፤ ከተርሳይ ሄ ዶርሳ አጎዛ ጻላላን ደእና፥ ቢታ ኡባይ መላ ግዶፐ፥ ኔን ኦዴዳዋዳን፥ እስራኤልያ አሳ ኔን ታ ኩሽያን አሻናዋ ታን ኤራና" ያጌዳ። 38 እ ጌዳዋዳን ሀኔዳ። ዎንተ ጋላስ ጉራ ጉራና ደንዲደ፥ ዶርሳ አጎዛ ጉምኤዳ ዎደ፥ እት ኩይጻሮ ግድያ ሃይ አፐ ከሴዳ።

39 ያትና፥ ጌዶን ቃይካ ጾሳ፥ "ሀያና ሀንቀቶፓ! ታን ኔና ጉጃደካ እት ገደ ኦቻይ፤ ዶርሳ አጎዛ ቦላ ሀራ ማላታ በሳናዳን ታን ኔና ኦቻይ። ሀእ ቃይ ዶርሳ አጎዛይ መላ ግድና፥ ቢታይ እርጺደ ከተርሳታናዳን ኡዳርኪ" ያጌዳ። 40 ሄ ጋላስ ቃማ ጾሳይ ሄ ማላታ ኦዳ። ዎንተ ጋላስ ጉራ ዶርሳ አጎዛ መላ ግድና፥ ቢታ ኡባይ እርጺደ ከተርሳቴዳ።