Juízes 7

ጌዶን ሚድያማቱዋ ጾኔዳ

1 የሩባኣላ ጌተትያ ጌዶንነ አናና ደእያ አሳይ ኡባይ ዎንታ ጉራን ደንድ ቢደ፥ ሀሮዳ ጌተትያ ፑልትያ ማታን ዱንካኔዳ። ሚድያማ ጋደ አሳቱካ ህንቱቱፐ ሁጲሳ ባጋና ሞረ ጌተትያ ደርያ ማታን ደእያ ዎምባ ግዶን ዱንካኔድኖ።

2 መና ጎዳይ ጌዶና ሀዋዳን ያጌዳ፤ "ሚድያማ አሳ ታን ህንተንቱ ኩሽያን አደ እማናዉ፥ ኔናና ደእያ አሳይ ዳሬዳ፤ እስራኤልያ አሳይ፥ ‘ኑ ዎልቃን አቴዶ’ ጊደ ታ ቦላ ጬቀተና ማላ፥ ምድያማ አሳ ታን ኡንቱንቶ አደ እምከ። 3 ሄዋ ድራዉ፥ ሀእ አሳዉ፥ ‘ያሻን ኮኮርያ አሳይ ኦንነ ደኦፐ፥ ጋላኣደ ደርያፐ ስሚደ፥ ጉየ ባረ ሶ ባረ ሶ ቦ’ ያጋደ አዋያ" ያጌዳ። ያትና፥ ላታማነ ላኡ ሻአ አሳይ ጉየ ስሜዳ፤ ታሙ ሻአ አሳይ አቴዳ።✝7:3 ዛረ. 20:8

4 ሄዋፐ ጉይያን መና ጎዳይ ጌዶና፥ "ሀእካ አሳይ ዳሬዳ። ኔን ኡንቱንታ ዱገ ሃዉ አፋ፤ ታን ኡንቱንታ ነዉ ያን ሻካና። ታን፥ ‘ሀዌ ኔናና ቦ’ ግያዌ ኔናና ቦ፤ ታን፥ ‘ሀዌ ኔናና ቦፖ’ ግያዌ ቦፖ" ያጌዳ።

5 ያትና፥ ጌዶን አሳ ሃኮ አፌዳ። መና ጎዳይ ጌዶና፥ "ሀ አሳ ግዶፐ ጉልባቲደ ሃ ኡሽያዋንታነ፥ ካናዳን ሃ እንጻርሳን ላባጭ ላባጭ ኦደ ኡሽያዋንታ ሻካ" ያጌዳ። 6 ባረንቱ ኩሽያን ሃ ኮጰቲደ ላባጭ ኦደ ኡሼዳዋንቱ ፓይዱ ሄዙ ጼታ፤ ሽን አቴዳዋንቱ ኡባይ ሃ ኡሻናዉ ጉልባቴድኖ።

7 መና ጎዳይ ጌዶና፥ "ባረንቱ ኩሽያን ሃ ኤቁዋን ኮጰቲደ ላባጭ ኦዳ ሄዙ ጼቱ አሳቱዋን ታን ህንተንታ አሻና፤ ሚድያማ አሳቱዋ ህንተንቶ አደ እማና። ሽን አቴዳ አሳይ ኡባይ ባረ ሶ ባረ ሶ ስሞ" ያጌዳ። 8 ያትና፥ ጌዶን አሳቱዋ ሽንቃነ ማላካታ አኬዳ ሄዙ ጼቱ አሳቱዋ ባረናና አሺደ፥ የንኮ አሳ ኡባ ኡንቱንቱ ሶ ኡንቱንቱ ሶ የዴዳ። ሀ ኡባባይ ሀንያ ዎደ፥ ሚድያማ ኦላንቻቱ ኡንቱቱፐ ህርክ ባጋና ዎምባን ዱንካኒደ ኡቴድኖ።

9 ሄ ጋላስ ቃማን መና ጎዳይ ጌዶና፥ "ታን ነዉ አደ እሜዳ ድራዉ፥ ደንዳደ ኡንቱንቱ ዱንካኔዳ ሳኣን ኡንቱንቱና ኦላ ጋከታ። 10 ኔን ባደ ኦላናዉ ያዮፐ፥ ነ ቆማ ፑራ አካደ፥ ኡንቱንቱ ዱንካኔዳ ሳኣ ዱገ ባደ፥ 11 ኡንቱንቱ ግያዋ ስሳ። ሄዋፐ ጉይያን፥ ኔን ኡንቱንታ ኦላናዉ ምናና" ያጌዳ።

ጌዶንነ አ ቆማይ ፑር፥ ምድያማቱ ዱንካኔዳ ሳኣ ጋጻን ናግያ ኦላንቻቱዋኮ ቤድኖ። 12 ሄ ዎደ ቦልያዳን ጮራቴዳ ሚድያማ አሳይ፥ አማሌቃ አሳይነ አዋይ ዶልያ ባጋና ደእያ አሳይ ኡባይ ዎምባ ግዶን ዱንካኒደ ኡቴድኖ። ኡንቱቱ ጋሎቱ አባ ዶናን ደእያ ሻፍያዳን ፓይዳናዉ ዳንዳየተናዋንታ።

13 ጌዶን ያ ጋክያ ዎደ፥ እት ብታኒ ባረ አኩመቴዳ አኩሙዋ ባረ ላግያዉ ኦዴ፤ "ስሳ፥ ታን አኩሙዋ አኩመታድ። እት ባንጋ ኡክይ ጎንዶረቲደ፥ ሚድያማቱ ዱንካኔዳ ሳኣ ዬዳ። ጋኪደ ዱንካንያ ዶምኤዳ፤ ዱንካኒ አ ዎደ ምጨቴዳ" ያጌዳ።

14 ሄዋፐ ጉየ አ ላጊ ዛሪደ፥ "ሄዌ እስራኤልያ ዮኣሻ ናኣ ጌዶና ማሻፐ አትና፥ ሀራባ ግደና። ጾሳይ ሚድያማነ ምድያማቱዋና ደእያ ኦላንቻቱዋ ኡባ ጌዶናዉ አደ እሜዳ" ያጌዳ።

15 ጌዶን ሄ ኦዴዳ አኩሙዋነ አኩሙዋ ብርሸ ስሴዳ ዎደ፥ ጉልባቲደ ጾሳዉ ጎይኔዳ። ሄዋፐ ጉይያን፥ እስራኤላቱ ዱንካኔዳ ሳኣ ጉየ ስሚደ፥ "ደንድተ! መና ጎዳይ ሚድያማ ኦላንቻቱዋ ህንተንቱ ኩሽያን አደ እሜዳ!" ያጌዳ። 16 ሄዙ ጼቱ አሳቱዋ ሄዙ ጭታን ሻኬዳ፤ ኡንቱንቶ ሁጲያን ሁጲያን እት እት ማላካታነ ግዶን ኤጽያ ጾምፒ ደእያ እት እት ጻሩዋ እሜዳ። 17 ኡንቱንታ፦ "ታኮ ሃ ጼሊደ፥ ታን ኦያዋ ኦተ። ታን ኡንቱንቱ ዱንካኔዳ ሳኣ ማታ ጋካደ ኦያዋዳን፥ ህንተንቱካ ኦተ። 18 ታንነ ታናና ደእያዋንቱ ኡባቱ ማላካታ ፑንያ ዎደ፥ ህንተንቱካ ኡንቱንቱ ዱንካኔዳ ሳኣ ዩይ አደ፥ ህንተንቱ ማላካታ ፑኒደ፥ ‘መና ጎዳዉነ ጌዶናዉ!’ ያጊደ ዋስተ" ያጌዳ።

19 ቃማዉ ግዶ ግሹዋ ግዳናዉ ጉ አትደእሽን፥ ናግያ ኦላንቻቱ ላመቴዳዋፐ ጉይያን፥ ጌዶንነ አናና ደእያ ጼቱ አሳቱ ቢደ፥ ሚድያማቱ ዱንካኔዳ ሳኣ ማታ ጋኪደ ባረንቱ ማላካታ ፑኔድኖ፤ ባረንቱ ኦይቄዳ ጻሩዋ ኡባካ መንድኖ። 20 ሀራ ባጋና ደእያ ላኡ ጭታቱካ ባረንቱ ማላካታ ፑኒደ፥ ጻሮቱዋካ መንድኖ፤ ሀድርሳ ኩሽያን ኤጽያ ጾምፕያ፥ ኡሸቻ ኩሽያን ማላካታ ኦይቂደ ፑኒደ፥ "መና ጎዳዉነ ጌዶናዉ ማሻን ኦለቴቶ!" ያጊደ ዋሴድኖ። 21 አሳይ ኡባይ ሚድያማቱ ዱንካኔዳ ሳኣ ዩሹዋን ባረ ሳኣን ሳኣን ኤቂደእሽን፥ ሚድያማ ኦላንቻቱ ኡባይ ዋሲደ ባቃቴድኖ። 22 ጌዶና አሳይ ሄዙ ጼቱ ማላካታ ፑኔዳ ዎደ፥ ሞርከቱዋ ኦላንቻቱ ባረንቱ ማሻን እቱ እቱዋ ዎናዳን መና ጎዳይ ኦዳ፤ ያትና፥ አቴዳ ኦላንቻቱ ጽሬራኮ ስሚደ፥ ቤትሺጻ ጌተትያ ካታማ ጋካናዉ፥ ሄዋፐካ አደ፥ ጻባታ ማታን ደእያ አቤል-ማሆላ ጋካናዉ ባቃቴድኖ።

23 ሄዋፐ ጉይያን ጌዶን፥ ንፍታሌማ ዛርያፐ፥ አሴራ ዛርያፐነ ምናሰ ዛራቱዋ ኡባፐ እስራኤልያ አሳ ጼሲደ ሺሽና፥ ኡንቱንቱ ሚድያማቱዋ የደርሴድኖ። 24 ኤፍሬማ ገዝያን ደእያ አሳ ኡባኮ ጌዶን አሳ ኪቲደ፥ "ሚድያማ አሳ ኦላናዉ ዱገ ዎተ፤ ቤትባና ጋካናዉ ደእያ ዮርዳኖሳ ሻፋነ አን ገልያ ቄር ሻፋቱዋ ኡንቱቱፐ ካሰቲደ ኦይቂተ" ያጌዳ። ሄዋፐ ጉየ ኤፍሬማ አሳይ ኡባይ ጼገት ሺቂደ፥ ቤትባራ ጋካናዉ ዮርዳኖሳ ሻፋነ አን ገልያ ቄር ሻፋቱዋ ኦይቄዳ። 25 ኦሬባነ ዛኤባ ጌተትያ ሚድያማቱዋ ካፓቱዋ ላኡዋ ኦሞዴድኖ፤ ኦሬባ ኦሬባ ዛላ ግያ ሳን ዎድኖ፤ ዛኤባ ቃይ ዛኤባ ዎይንያ ጉምእያ ሳኣ ግያ ሳኣን ዎድኖ። ሄዋፐ ጉየና አቴዳ ሚድያማቱዋ የደርሲደ፥ ኦሬባ ቆያነ ዛኤባ ቆያ ሙጬድኖ፤ ኡንቱንቱ ጉገቱዋ ጌዶናኮ አሄድኖ። ሄ ዎደ ጌዶን ዮርዳኖሳ ሻፋፐ ሄፍን አዋይ ዶልያ ባጋና ደኤዳ።