Isiyaasa 14

Israa’eeliyaa Asay Omooduwaappe Simmana

1 Med’inaa Goday Israa’eeliyaa asaw k’arettana; Israa’eeliyaakka zaaretsiide doorana. Unttuntta unttunttu buzo gadiyaan wotsana; imatsatuu yiide unttunttunna gakettiide, Israa’eeliyaa asaana ittippe de’ana. 2 Daro kawutetsay Israa’eeliyaa asaa akkiide, unttunttu sa’aa ahana; Israa’eeliyaa Asay kawutetsatuwaa mac’c’anne attuma k’oomaadan, Med’inaa Godaa gadiyaan mooddana. Unttunttu barena omoodeeddawantta omooddana; barena uk’k’unneeddawanttakka mooddana.

Baabloone Kaatii Duufuwan Geleedda Gelusaa

3 Med’inaa Goday hinttena hintte tuggaappe, metuwaappenne hintte moodetteedda iita ayiletetsaappe shemppisseedda gallassi, 4 hintte Baabloone kaatiyaa bolla hawaadan yaagiide k’iliic’ana; «Uk’k’unniyaawe waan aggeedee; Aa hank’k’uwaa suuluukka waan atteedee! 5 Med’inaa Goday Kawutetsatuwaa s’am"aanne mooddiyaawanttu gatimaa mentseedda. 6 Unttunttu asaa wurssetsi bayinna hank’k’uwaan shoc’eeddino. Barentta s’ooneedda asatuwaa k’ans’s’ennan un"etsiide de’eeddino. 7 Biittaa ubbay unttunttuppe shemppiide, woppan de’ee; asaykka yetsaa yes’s’ee. 8 Haray attina, zigatuukka Liibaanoosa s’idetuukka, kaatiyaa kunddetsan nashettiide; ‹Neeni kawushaade wod’d’oodeppe, nuuna k’ans’s’anaw yiyaawe baawa› yaagiino.

9 «Neeni yiyaa wode, Si’oolii neena mokkanaw hirkkin giigeedda; I kase gadiyaa kaaletseedda asatuwaa moyttilletuwaa neena sarotanaadan dentsetsee; k’ay kase kawutetsatoo kaatiyaa gideedda ubbatuwaakka unttunttu araataappe dentsi essee. 10 Unttunttu ubbaykka hawaadan yaagana; ‹Hekko neenikka nuwaadan, wolk’k’aa d’ayaadda; neenikka nu mala gidaadda! 11 Kase diitsaa diis’s’iidde sabbiyaa ne bonchchuu Si’ooliyaan duge geleedda. Duuchchatuu neeni gisiyaa gisuwaa; gus’unetuukka neeni mayiyaa afilaa gidana› yaagana.

12 «Neenoo wontta na’aw, bakkaaliyaw, saluwaappe waana kunddaadii! Neenoo kawutetsaa kawushsheeddawoo, waana k’ans’s’ettaade sa’aan wod’d’aadii!✝14:12 Sas'. 8:10; 9:1 13 Neeni ne wozanaan, ‹Taani saluwaa kesana; ta kawutetsaa araataakka S’oossaa s’oolinttetuwaappe bollaanna d’ok’k’an wotsana; huup’issa bagga gas’an, yaa’ay shiik’iyaa deriyaa huup’iyaan uttana.✝14:13-15 Mat. 11:23; Luk'. 10:15 14 Shaaretuu de’iyaa d’ok’k’aappekka huup’iyaw pude aad’d’ana; taani taana Ubbaappe d’ok’k’iyaa S’oossaa mala ootsana› yaagaadda. 15 Shin neeni Si’ooliyaan, hirkki c’iimma ollaan duge yegettaadda.

16 «Neena be’iyaawanttu, ‹Biittaa k’aatseeddawe, kawutetsatuwaa kokkorsseeddawe, 17 sa’aa bazzuwaa kesseeddawe, sa’aan de’iyaa katamatuwaakka aatsi yeggeeddawe, bare k’asho asatuwaakka golle yeddennan diggeedda bitanii hawe?› yaagiide tishshi ootsi akeekiide s’eelana.

18 «Kawutetsatuwaa kaatetuu ubbay bare duufuwaan duufuwaan bonchchuwaan gisana. 19 Shin neeni is’s’etteedda tashiyaadan, ne duufuwaappe gas’aa olettaadda; ne anhay mashshaan c’adetti hayk’k’eedda anhaan, k’ay ollaan de’iyaa shuchchatuwaakko duge wod’d’iyaawanttu anhaan kameteedda. Neeni gediyaan yedersseedda anhaa mala gidaadda. 20 Neeni mooguwaakka unttunttunna ittippe moogettakka; ayaw gooppe, neeni ne gadiyaa bayzzaadda; ne asaakka wod’aadda. Iitaa ootsiyaawanttu suntsay laa"entso mulekka s’eesettoppo. 21 Unttunttu aawotuwaa nagaraa diraw, naanatuwaa wod’anaw giigissite; hewe d’ayooppe unttunttu denddiide, gadiyaa laattana; sa’aa ubbaakka katamaa sallalaa ootsana» yaagana.

S’oossay Baabloone Biittaa D’ayissana

22 Ubbaappe Wolk’k’aama Med’inaa Goday hawaadan yaagee; «Taani unttunttu bollan denddana; unttunttu suntsaa, unttunttu atotetsaa, unttunttu zeretsaanne unttunttu yeletaa Baablooneppe d’ayissana. 23 Taani Baabloone Gutatta de’iyaasaanne haatsay eelliyaasaa ootsana; bashshaa pus’an taani Aa pittana. Taani Ubbaappe Wolk’k’aama Med’inaa Goday hawaa oday» yaagee.

S’oossay Asooretuwaa D’ayissana

24 Ubbaappe Wolk’k’aama Med’inaa Goday hawaadan yaagiide c’aak’k’eedda; «Taani halchcheeddawaadan hanana; taani k’oppeeddawaadankka polettana.✝14:24 Isa. 10:5-34; Nam. 1:1—3:19; Sof. 2:13-15 25 Taani Asoore gadiyaa bitaniyaa ta gadiyaan mentsereetsana; ta deretuwaa huup’iyaan taani Aa yed’d’ana; Aa k’ambbaray unttunttu bollaappe, Aa tookuukka unttunttu hashiyaappe kichchana» yaageedda. 26 Sa’aw muliyaw k’ofetteedda k’ofay hawaa; kawutetsatuwaa ubbaa bollan mic’etteedda kushiikka hawaa. 27 Ubbaappe Wolk’k’aama Med’inaa Goday hawaa k’oppeedda diraw, Aa ooni digganaw danddayii? Aa kushiikka mic’etteedda; hewaa ooni guyye zaaranaw danddayii?

S’oossay Piliss’s’eematuwaa D’ayissana

28 Kaatii Akaazi hayk’k’eedda laytsi odetteedda k’aalay hawaadan yaagiyaawaa;✝14:28 2 Kat. 16:20; 2 Od. 28:27 29 «Hinttenoo Piliss’s’eema asatoo ubbatuukka, hinttena shoc’eedda s’am"ay me"eedda diraw nashettoppite; ayaw gooppe, he shooshshaa zariyaappe hasuu kesana; Aa zeretsaykka k’ay paalliyaa shooshshaa gidanawaa.✝14:29-31 Erm. 47:1-7; Hiz. 25:15-17; Iyu. 3:4-8; Amo. 1:6-8; Sof. 2:4-7; Zak. 9:5-7 30 Hiyyeesatuwaa bayira naanay k’umaa maana; metootanchchatuu woppu giide gisana. Shin taani ne zariyaa koshan wurssana; k’ay neeppe atteedawaanttakka wod’ana.

31 «Neenoo penggiyaw, yeekka! Neenoo katamaw, waassa! Hinttenoo Piliss’s’eema asaw ubbaw, hintte ubbaykka hirggan muushite! Ayaw gooppe, huup’issa baggappe c’uway kesiide yee; he c’itaappe duus’s’iide guyye attiyaawe baawa. 32 Kawutetsay kiitteeddawanttoo waagiide zaaranee? Med’inaa Goday ‹S’iyoono kees’s’ee; k’ohetteedda Aa Asay I giddon k’osetti attiyaasaa demmeeda› yaagana» yaagiyaa k’aalay odetteedda.