Isiyaasa 21

Baabloone Kunddetsaa Bessiyaa Sas’aa

1 Abbaa matan de’iyaa bazzoo odetteedda s’oossaa k’aalay hawaa.

Gedissa baggappe gotiyaa c’arkkuu suraggiidde yiyaawaadan, bashshay mela biittaappe, yashshiyaa gadiyaappe yee.

2 Itti yashshiyaa sas’ay taw k’onc’c’eedda. Aatsi immiyaawe aatsi immee; omoodiyaawe omoodee; Elaama biittaw, woraajja! Meedoona biittaw, katamaa doodda! Baabloone gaasuwaan gakkeedda ooliyaa taani gidissana.

3 Hewaa diraw, ta s’eessay sakko s’alalaa gideedda; mac’c’a asaa yeluu oyk’k’iyaawaadan, taana un"uu oyk’k’eedda; taani sisiyaawaappe denddeeddawaan hokkaad; taani be’eeddawaappe denddeeddawaan dagamaad. 4 Taana yiic’oyee; taana yashshay kokkorssee; taani amotteedda omarssay taw kokkorssaw laametteedda.

5 Taani be’eedda sas’aan unttunttu gibiraa giigisseeddino; mins’s’aafiyaakka hiis’s’eeddino; yaatiide miinonne ushiino. Yaatishin, «Hinttenoo kaappatoo, denddite! Hintte gonddalletuwaa k’uc’c’ite!» yaagiyaa azazuu yeedda.

6 Goday taana hawaadan yaageedda; «Ba; s’omoosiyaa asaa wotsa; I bare be’iyaawaa odo. 7 Gammaama mehiyaa toggiyaawantta, laa"uwaa laa"uwaa gidiide biyaa paraa asatuwaa, haretuwaa toggiyaawanttanne gaalotuwaa toggiyaawantta be’iyaa wode, loytsiide s’eello; d’ishi s’eello» yaageedda.

8 Hewaappe guyyiyaan, wochcheeddawe hawaadan yaagi waasseedda; «Godaw, taani wochchiyaasan gallassi gallassi pac’i bayinnan ek’k’aad; ta santtariyyankka k’ammaa muliyaa tolettaad. 9 Be’ite, gammaama mehiyaa toggiyaa paraa asatuu laa"a laa"a gidiide yiino» yaageedda. I k’aykka hawaadan yaageedda; «Baabloone kunddeedda; Aa s’oossatuwaa misiletuukka kunddeeddino. Unttunttu ubbaykka sa’aan duge kunddiide gaac’etteeddino» yaagiide waasseedda.✝21:9 Sas'. 14:8; 18:2 10 Hinttenoo, ta uddumaan k’os’etteedda ta asatoo, Ubbaappe Wolk’k’aama Med’inaa Godaappe, Israa’eeliyaa S’oossaappe siseeddawaa taani hinttenttoo erissay.

Eedoomabaw Odetteeddawaa

11 Eedooma biittaa S’oossay hawaadan yaageedda; «Itti bitanii Eedooma woy Duuma baggana taana S’eesiide, ‹Laa wochchiyaawoo, sa’ay wonttanaw aappunuu atteedee? Laa wochchiyaawoo, sa’ay wonttanaw aappunuu atteedee?› yaagee. 12 Wochchiyaawe zaariide, ‹Sa’ay wonttana hanee; k’ay k’ammana; hintte oochchanaw koyooppe, simmi yiide oochchite› yaagee» yaageedda.

Araba Biittaabaw Odetteeddawaa

13 Araba giyaa biittaa Goday hawaadan yaagee; «Hinttenoo Dadaana zal"anchchatoo, hintte hintte c’aaniyaa gaalotuwaanakka Araba gadiyaa bazzuwaan ak’ana. 14 Hinttenoo, Teema giyaa gadiyaan de’iyaa asatoo, saametteeddawanttoo haatsaa ahite; betetoo miyaawaa immite. 15 Ayaw gooppe, unttunttu mashshaappe, shookuwaappe shoddeedda mashshaappe, dafeedda wonddaafiyaappenne mino olaappe bak’atiide yeeddino» yaagee.

16 Hewaappe guyyiyaan, Goday taana hawaadan yaageedda; «Konttiraatiyaa oosanchchaa wodiyaadan, mes’s’i itti laytsaa giddon K’eedaare bonchchuu ubbay wurana. 17 K’eedaare gadiyaan de’iyaa wonddaafiyaan dukkiyaa wolk’k’aama olanchchatuwaappe guutsatuu attana; hewaa Med’inaa Goday Israa’eeliyaa S’oossay odeedda» yaageedda.