Isiyaasa 39

Baablooneppe Kiitettiide Yeedda Asatuwaa

1 He wode, Baladaana na’ay, Baabloone Kaatii Marodaaki Baladaani, Hizk’k’iyaasi harggiide pas’eeddawaa siseedda diraw, dabddaabbiyaanne imuwaa Hizk’k’iyaasaw yeddeedda. 2 Hizk’k’iyaasi kiitettiide yeedda asatuwaa mokkeedda. Yaatiide bare shaluwaa minjjiyaa golliyaan de’iyaa biraa, work’k’aa, sawuwaa, al"o zayitiyaa, bare olaa miishshaanne bare shaluwaa minjjiyaa golliyaan de’iyaawaa ubbaa unttuntta besseedda. Bare son woy bare kawutetsaa giddon de’iyaawaa ubbaappe Hizk’k’iyaasi unttuntta bessenaan aggeedabay ayaynne baawa.

3 Hewaappe guyyiyaan, timbbitiyaa odiyaa Isiyaasi Kaatiyaa Hizk’k’iyaasakko yiide, «Ha asatuu waageeddinoo? Unttunttu hak’appe yeeddino?» yaagi oochcheedda.

Hizk’k’iyaasi, «Unttunttu taakko haakko gadiyaappe, Baablooneppe yeeddino» yaageedda.

4 Isiyaasi k’aykka, «Unttunttu ne son ayaa ayaa be’eeddinoo?» yaageedda.

Hizk’k’iyaasi, «Unttunttu ta son de’iyaa ubbabaa be’eeddino; ta shaluwaa minjjiyaa golliyaan de’iyaabaappe taani unttuntta bessabeennabay ayaynne baawa» yaageedda.

5 Hewaappe guyyiyaan, Isiyaasi Hizk’k’iyyaasa, «Ubbaappe Wolk’k’aama Med’inaa Goday giyaawaa sisa. 6 Med’inaa Goday hawaadan yaagee; ‹Ne kaatiyaa golliyaan de’iyaabay ubbabaynne ne mayzza aawotuu hachchi gakkanaw shiishsheeddabay ubbabay ubbaanna omoodettiide, Baabloone biittaa baana gallassatuu yaana; aappe ayaynne attena. 7 K’ay new yelettana, ne ashonne ne suutsaa gidiyaa, ne attuma zaratuwaappekka omoodettiide baana; biide Baabloone kaatiyaa golliyaan goyro gidiide ootsana› yaagee» yaageedda.

8 Hizk’k’iyaasi zaariide, «Neeni odeedda Med’inaa Godaa k’aalay lo"a» yaageedda. Ayaw gooppe, Hizk’k’iyaasi, «Taani de’eedda laytsan saruunne woppay de’ana gidennee» yaagi k’oppeedda.