Isiyaasa 7

Kaatiyaa Akaazaw Yeedda Kiitaa

1 Ooziyaana na’ay Iyo’aataami yeleedda Akaazi Yihudaa gadiyaan kaateteedda wode, Sooriyaa gadiyaa Kaatii Ras’iininne Israa’eeliyaa gadiyaa Kaatii Ramaaliyaa na’ay Paak’uhi Yerusaalame olanaw yeeddino; shin s’oonanaw danddayibeykkino.✝7:1 2 Kat. 16:5; 2 Od. 28:5-6

2 Sooriyaa gaddii Efireema biittaana ittippe olaw c’aak’k’eteeddawaa Daawita zariyaappe kaateteedda kaatii siseedda wode, deriyaan c’arkkuu k’aatsiyaa mitsaadan, Akaaza wozanaynne Aa asaa wozanay dagamaan shabbiretteedda.

3 Yaatina, Med’inaa Goday Isiyyaasa, «Neeni ne na’aa Sha’aari-Yaashuuba*7:3 Sha’aari-Yaashuuba: Ha suntsaa biletsay Ibraaweetsuwaan, «Amareedawanttu simmana» (10:20-22 be’ite) giyaawaa. akkaade, Akaazana gakkettanaw ba; mayuwaa meec’c’iyaawanttu goshshaakko afiyaa ogiyaa matan k’ommonna de’iyaa shiik’eedda haatsaa s’eeran neeni Aa demmana. 4 Aw hawaadan yaagaade oda; ‹Naagetta; hirggoppa; Sooriyaa asaa, Kaatiyaa Ras’iinanne Ramaaliyaa na’aa hank’k’oo yayyoppa; ne wozanaykka shabbarettoppo; ayaw gooppe, laa"u kaatetuu tamaappe aatsiide c’uwattiyaa laa"u mitsaa durumaa mala.

5 « ‹Sooriyaa gadiyaa Asay Efireema asaananne Ramaaliyaa na’aanna ne bolla iitabaa mak’ettiide, 6 «Ane Yihudaa gadiyaan woraajjiide, mentsereetsidinne nu giddon shaakkiide, S’aabi’eela na’aa kawutseeto» yaagiino› yaaga» yaageedda.

7 Gidooppenne, Ubbaa Mooddiyaa Med’inaa Goday hawaadan yaagee; «He unttunttu mak’k’uu minnenna; mulekka hewe polettennawaa. 8 Ayaw gooppe, Damask’k’uu Sooriyaa biittaw huup’iyaa; Kaatii Ras’iinikka Damask’k’o katamaw huup’iyaa. Usuppun tammanne ichcheshu laytsaa giddon Efireema gaddii bunchchettiide, kawutetsaa gidenaan attana. 9 K’ay Samaarii Efireema biittaw huup’iyaa; Ramaaliyaa na’ay Samaariyaa katamaw huup’iyaa; hintte ammanuwaan minniide ek’k’ennan d’ayooppe, hinttekka ek’k’ikkita» yaagee.

Amaanu’eeli Yaanawaa Bessiyaa Malaataa

10 K’aykka Med’inaa Goday Akaazaw; 11 «Med’inaa Goday ne S’oossay new bolla saluwaappe, woy garssa sa’aa c’iimmuwaappe itti malaataa immana mala oochcha» yaageedda. 12 Shin Akaazi, «Oochchikke; Med’inaa Godaakka paac’c’ikke» yaageedda.

13 Yaatina, Isiyaasi, «Hinttenoo, Daawita zaretoo, sisite! Hintte asaa daaburssiyaawe ay guus’s’ina, k’ay ta S’oossaa daaburssiitee? 14 Yaatooppe, Goday bare huup’iyaan hinttenttoo malaataa immana; gellayatta shahaaraade attuma na’aa yelana; Aa suntsaakka Amaanu’eela*7:14 Amaanu’eela: Ha suntsaa biletsay Ibraaweetsuwaan, «S’oossay nuunana de’ee» giyaawaa. yaagaade suntsana.✝7:14 Mat. 1:23 15 I iitaa is’s’anawunne lo"uwaa dooranaw eriyaa wode, me"eedda maatsaanne eessaa uttana. 16 Shin na’ay iitaa is’s’anawunne lo"uwaa dooranaw eranaappe kasetiide, neeni loytsi yayyeedda laa"u kaatetuu biittatuu koletti mela gidana.

17 «Efireema gaddii Yihudaa gadiyaappe shaakettoodeppe doommina hanibeenna meto wodiyaa Med’inaa Goday ne bolla, ne asaa bollanne ne aawuwaa golliyaa bolla ahana; He yaanawekka Asoore gadiyaa kaatiyaa» yaageedda.

18 He gallassay gakkiyaa wode, Med’inaa Goday uduns’s’etoo, Gibs’en haakko shaafaan de’iyaa asatoo malaatana; I matsatuwaa, Asoore gadiyaa asatuwaa s’eesana. 19 Yaatina, unttunttu ubbaykka yiide, zanggaaraa shoobban, shuchchaa gonggoluwaan, aguntsay de’iyaa buuraaninne haatsaa olaan uttana.

20 He gallassi Goday Efiraas’iisa Shaafaappe hefintsa baggaappe huup’iyaa k’ans’s’iyaa asaa s’eesana; ikka Asoore gadiyaa kaatiyaa; I yiide, hintte huup’iyaa binnaanaa, hintte asatetsaa binnaanaanne hintte buuchchaa meedana.

21 He gallassi itti Asay mes’s’i itti maatsa miizzanne laa"u deeshshatuwaa s’alalaa ashshana. 22 Gidooppekka, unttunttu maas’s’iyaa maatsay loytsi daro gidiyaa diraw, I me"eedda maatsaa uttana; he gadiyaan atteeda Asay ubbaykka me"eedda maatsaanne eessaa uttana.

23 He gallassi itti sha"a biran washettiyaa sha"a woyniyaa anotuu de’iyaa saan ubbaan kinddichchuunne aguntsa s’alalay mokkana. 24 Biittaa ubbaan kinddichchuunne aguntsay kumeedda diraw, Asay yaa biyaa wode, tooranne wonddaafiyaa oyk’k’iide baana. 25 Kase goman bul"eedda zoozetuwaan ha"i kinddichchuunne aguntsay kumeedda diraw yayyiide, itti asaynne yaa beenna. Mehii yedetiyaasaanne dorssay hemetiyaasaa gidanawaa.