Isiyaasa 36

Asooretuu Yerusaalamo Naasseeddino

1 Kaatiyaa Hizk’k’iyaasi kaateteedda tammanne oyddentso laytsan, Asoore Kaatii Sanaakireebi gimbbetti utteedda Yihudaa katamatuwaa ubbaa oliide oyk’k’eedda. 2 Hewaappe guyyiyaan, Asoore gadiyaa Kaatii Laakisha giyaa katamaappe itti waannatiyaa olaa gadaawaa c’ora olanchchatuwaanna Kaatiyaa Hizk’k’iyaasakko Yerusaalame yeddeedda. Biide, Mayuwaa Meec’c’iyaawaa gade afiyaa ogiyaappe k’ommo baggana de’iyaa dagatteedda haatsay goggiyaa haatsaa matan ek’k’eedda. 3 Yaatina, Hilk’k’iyaa na’ay kaatiyaa golliyaan aawotiyaa Eliyaak’iime, waanna s’aafii Sheebininne Asaafa na’ay taarikiyaa s’aafiyaa Yo’aahi aakko kare keseeddino.

4 Asooretuwaa gadaaway unttuntta, «Hizk’k’iyaasaw hawaadan yaagiide odite; Asoore kaatii, wolk’k’aamay neena hawaadan yaagee; ‹Neeni hawaa keeshshaa ayan ammanettaadii? 5 Neeni c’oo mela, Olaa olettanaw taw aad’d’eeda eraynne wolk’k’ay de’ee yaagaasa. Shin neeni oonan ammanettaade ta bolla hawaa makkalaadii? 6 Neeni Gibs’e kaatii maaddana gaade k’oppeeddawaa gidooppe, me"eedda mak’k’aa gatiman guufetiyaa asaa mala. Ayaw gooppe, s’am"ay me"ina, pinc’c’uu kushiyaa c’addeenne madus’s’isee. Gibs’e kaatii barenan ammanettiyaa asaa ubbaw hewaa mala.› »✝36:6 Hiz. 29:6-7

7 Shin neeni taw, «Nuuni Med’inaa Godaan, nu S’oossan, ammanetteeto» yaagooppe, Hizk’k’iyaasi Yihudaa asaanne Yerusaalame asaa, «Hintte Yerusaalamen de’iyaa yarshshiyaasan goyinnanaw koshshee» giide, aw goyinniyaa d’ok’k’a sa’atuwaanne yarshshiyaa sa’aa diggeedda S’oossaa I gidennee?

8 Ane ha"i haaya! Ta godaa Asoore kaatiyaana naasetta. Neeni togganaw danddayiyaa, gidiyaa asaa demmooppe, laa"u sha"a paratuwaa taani new immana. 9 Neeni, «Gibs’etuu paraa asatuwaanne paraa gaaretuwaa taw yeddana» gaade ammanooppenne, ta godaa olanchchatuwaa kaappatuwaappe itti laafiyaawaakka zaaranaw danddayakka. 10 Hewaa bollakka k’ay, taani ha"i tumu Med’inaa Godaa azazuu bayinnan ha gadiyaa d’ayissanaw kesaadditaa? Med’inaa Goday bare huup’iyaan taana, «neere, he gadiyaa baade, olaade bayzza» yaagiide odeedda yaagee yaagite yaageedda.

11 Hewaappe guyyiyaan Eliyaak’iime, Sheebininne Yo’aahi Asooretuwaa gadaawaa hawaadan yaageeddino; «Nuuni biletsaa eriyaa diraw, hayanaa neeni nuw ne k’oomatoo Sooriyaa k’aalan oda. Dirssaa gimbbiyaa huup’iyaan de’iyaa Asay sisenna mala, Ibrayiss’s’e k’aalan odoppa» yaageeddino.

12 Shin gadaaway zaaretsiide, «Ha k’aalatuwaa taani hinttewunne hintte godaa s’alalaw odanaw taana ta goday kiitteeddeeyye? Hinttenana ittippe barenttu urk’k’a sheeshaa maanawunne barenttu haatsaa sheeshshaa ushanaw de’iyaa, ha dirssaa gimbbiyaa bolla utteedda asaa ubbaw odanaassa gidenneeyye?» yaageedda.

13 Hewaappe guyyiyaan Asooretuwaa gadaaway denddi ek’k’iide, bare k’aalaa d’ok’k’u ootsiide, Ibrayiss’s’e k’aalan hawaadan yaageedda; «Asoore kaatii wolk’k’aamay hinttena giyaawaa sisite! 14 Kaatii hinttena hawaadan yaagee; ‹Hizk’k’iyaasi hinttena c’immoppo; ayaw gooppe, I hinttena ta kushiyaappe wotsi akkanaw danddayenna. 15 I hinttena, «Med’inaa Goday tuma nuuna ashshana; ha katamaykka Asoore kaatiyaa kushiyan gelenna» giide hintte Med’inaa Godaan ammanetana mala ootsoppo› yaagee.

16 «Ee, hintte Hizk’k’iyaasi odiyaawaa sisoppite. Asoore kaatii hinttena, ‹Taananna sigetite; haa taakko kesite. Yaatooppe, hintte ubbaykka hintte woyniyaa teeraappenne hintte balasiyaa teeraappe maana; hintte bookkeedda ollaappekka haatsaa ushana. 17 Hewaappe guyyiyaan taani yaade, hinttena hintte biittaa malatiyaa biittaa akkaade afana. He biittay katsaynne woyniyaa eessay, ukitsaynne woyniyaa ataakilttii kumeedda biittaa› yaagee.

18 «Hizk’k’iyaasi hinttena, ‹Med’inaa Goday nuuna ashshana› yaagiide c’immennaadan naagettite. Gadiyaa asatuwaa s’oossatuwaappe bare biittaa Asoore kaatiyaa kushiyaappe ashsheeda s’oossi de’iiyye? 19 Hamaata s’oossatuunne Arifaada s’oossatuu hak’an de’iino? Safariwayma giyaa katamaa s’oossatuu hak’an de’iino? Unttunttu Samaariyaa ta kushiyaappe wotsi akkeeddino? 20 Ha biittatuwaa s’oossatuwaa ubbaa giddon bare gadiyaa ta kushiyaappe ay s’oossi ashsheedawaa shin, Med’inaa Goday Yerusaalame ta kushiyaappe ashshanee?» yaageedda.

21 Shin Asay itti k’aalanne aw zaarennaan c’o"u geedda. Ayaw gooppe, kaatii unttuntta, «Aw ayinne zaariide odoppite» yaagi wotseedda. 22 Hewaappe guyyiyaan Hilk’k’iyaa na’ay kaatiyaa golliyaan aawotiyaa Eliyaak’iime, waanna s’aafii Sheebininne taarikiyaa s’aafii Asaafa na’ay Yo’aahi barenttu mayuwaa peed’iide, Hizk’k’iyaasakko beeddino; Asooretuwaa gadaaway geeddawaa ubbaa aw odeeddino.