1 Neenoo, neena d’ayissennan de’ishshin d’ayissiyaawoo, new aayye ana! Neenoo, neena aatsi immennan de’ishshin, aatsa immiyaawoo, new aayye ana! Neeni d’ayissuwaa aggeeda wode neena d’ayissana; neeni aatsa imuwaa aggeeda wode neena aatsi immana.

2 Abeet Med’inaa Godaw, nuuna maara; nuuni neena naageetto; wontta wontta nuw wolk’k’aa gida; metuwaa wodekka nuuna ashshiyaawaa gida. 3 Ne kooshshay guuguntsaadan guummiyaa wode Asay bak’atee; neeni nuuna maaddanaw dendda ek’k’iyaa wode, kawutetsatuu laalettiino. 4 Gondduu shiik’iyaawaadan, hintte omooduu shiik’ana; boolii dirbbiyaawaadan, Asay Aa bolla dirbbana.

5 Med’inaa Goday bollan de’iyaa diraw, d’ok’k’u d’ok’k’u geedda; I S’iyoone suure pirddaaninne s’illotetsan kuntsana. 6 I hinttenttoo hintte wodiyaa mintsiyaawaa, hintte kumentsaa atotetsaa, aad’d’eeda eratetsaanne eraa gidanawaa; Med’inaa Godaw yayyiyaawe aw ak’o gidanawaa.

7 Be’ite, unttunttu wolk’k’aama asatuu ogiyaan waassiino; sigatetsaw kiitteeddawanttukka mishettiide yeekkiino. 8 Aakko ogetuu oneeddino; ogiyaanna aad’d’iyaawe aggeeda. I bare c’aak’k’eteedda c’aak’uwaa koleedda; katamatuwaakka kad’eedda. Asaakka demibeena. 9 Biittay kayyoteenne labbanee. Liibaanoosi yeellatiide melee; Saaroona giyaa aradda dilbbay mela biittaa gideedda. Baasaane giyaa deriyaaninne K’armmeloosa deriyaan de’iyaa mitsatuwaa haytsay k’ok’k’ofettee.

10 Med’inaa Goday kawutetsatoo hawaadan yaagee; «Ha"i taani denddana; ha"i taani bonchchettana; ha"i taani d’ok’k’u d’ok’k’u gaana. 11 Hintte utulaa shahaariide, suullaa yeleeddita. Hintte shemppiyaa shemppuu hinttena miyaa tamaa. 12 Asay taman s’uugetteedda bidintsaa mala gidanawaa; k’ay k’ans’s’ettiide, taman ees’s’eedda aguntsa mala gidanawaa. 13 Hinttenoo, haakuwaan de’iyaawanttoo, taani ootseeddawaa sisite; matan de’iyaawanttoo, taani wolk’k’aama gidiyaawaa akeekite» yaagee.

14 S’iyoonen de’iyaa nagaranchchatuu yayyeeddino; S’oossaw gidennawantta kokkorssay oyk’k’eedda. Hewaa diraw, unttunttu, «Miyaa tamaanna de’anaw danddayiyaa uray nu giddon oonee? Ees’s’iidde de’i aggiyaawaana de’anaw danddayiyaa uray nu giddon oonee?» yaagiino. 15 S’illotetsan hamettiyaawe, suurebaa haasayiyaawe, suure gidenna ogiyaanna beettiyaa go"aa is’s’iyaawe, mattaayiyaa akkanaw bare kushiyaa yeddennawe, suutsaa gussiyaawaa sisennaadan, bare haytsaa tuc’c’iyaawe, iitabaa s’eellennaadan, bare ayfiyaa c’iilimmiyaawe, 16 he uray d’ok’k’asaan de’ana. I bak’atiide attana sa’aykka mino zaallaa de’uwaa gidanawaa; Aa ukitsaykka aw imettana; I ushiyaa haatsaykka pac’c’enna.

17 Hintte ayifetuu kaatiyaa Aa puulaana be’ana; haakkiide de’iyaa biittaakka be’ana. 18 Hintte wozanay, «paydeeddawe hak’an de’ii? Giiraa yiggi s’eelleeddawe hak’an de’ii? Adussa gimbbetuwaa paydeeddawe hak’an de’ii?» yaagiide yashshiyaa beniwaa k’oppana. 19 Hintte k’areti bayinna asatuwaa, hinttenttoo gelenna haasayaa haasayiyaa asatuwaanne ins’s’arssay deeddotiyaa asatuwaa hawaappe sintsan be’ikkita.

20 Nuuni nu baalaa bonchchiyaa S’iyoone katamaa be’ite! Woppu giide de’iyaasaa, Aa shikaalii shodettenna, Aa wodoruukka duus’s’ennanne k’aas’s’enna dunkkaaniyaa malaa, Yerusaalame katamaa hintte hintte ayifiyaan be’ana. 21 Shin Med’inaa Goday nuw he sa’aan bare wolk’k’aama wolk’k’aa k’onc’c’issana. He sa’ay aakko shaafatuunne goggiyaa haatsatuwaa mala gidanawaa. Laaggiyaa woluwoluu Aa bollaanna baanaw danddayenna; wolk’k’aama markkabiikka yaana aad’anaw danddayenna. 22 Ayaw gooppe, Med’inaa Goday nu daannaa; Med’inaa Goday nuw higgiyaa immeeddawaa. Med’inaa Goday nu kaatiyaa; I nuuna ashshana.

23 Ne wodoruwaa k’ashuu shol"eedda; markkabiyaa tuussaa Aa sa’aan minisi oyk’k’anaw woy sharaakka s’agaaganaw danddayenna. He wode daro omoodiide aheeddabay shaakettana; haray attina, wobbatuukka omooduwaa omooddana. 24 S’iyoonen de’iyaa ooninne, «Taani harggay» yaagenna; yan de’iyaa asaa nagaray atto geetettana.