6 «Taani dooreedda s’oomaa hawaa be’ite: pirddaan naak’k’iide k’achcheeddawanttu sanssalataa leppiyaawaa, morgge mitsaa gonniyaa biliyaawaa, uk’k’unnetteeddawantta uk’k’unnuwaappe kessiyaawaanne morgge mitsaa ubbaa mentsiyaawaa. 7 K’ay taani dooreedda s’oomay koshshatteeddawoo hintte k’umaa shaakkiyaawaa, gollii bayinna hiyyeesatuwaa golliyaa akkiyaawaa, kallotteeddawantta be’iyaa wode, mayzziyaawaa, maaduwaa koyiyaa hintte dabbuwaappe hintte deemuwaa gentsennan aggiyaawaa.58:7 Mat. 25:35
8 «Yaatooppe, hintte poo’uu wontta s’alk’k’iyaadan poo’ana; hintte pas’atetsaykka ellekka yaana. Hintte s’illotetsay hintteppe sintsanna baana; Med’inaa Godaa bonchchuukka hintteppe guyyenna gidiide, hinttena naagana. 9 He wode hintte s’eesana; Med’inaa Goday hinttenttoo koyana. Hintte maaduwaa akkanaw waassana; Ikka, ‹Hekko, taani hawaan de’ay!› yaagana.
«Hintte giddoppe hintte uk’k’unniyaa morgge mitsaa diggooppe, k’ay birad’d’iyaan malaatiyaawaanne iitabaa haasayiyaawaa aggooppe,