Isaías 63

Ayihuda Gidenna Asatuwaa S’oossay S’ooniyaa S’oonuwaa

1 Eedooma gadiyaan de’iyaa Boos’ira giyaa katamaappe zo’o mayuwaa mayyiide yiyaawe, hewe I oonee? Ha puulaana de’iyaa mayuwaa mayyiide, bare wolk’k’aa minotetsan sintsaw hametiyaawe oonee?✝63:1-6 Isa. 34:5-17; Erm. 49:7-22; Hiz. 25:12-14; 35:1-15; Amo. 1:11-12; Abd. 1-14; Mil. 1:2-5

S’oossay, «Hewe s’illuwaa haasayiyaawenne wolk’k’an ashshiyaawe taana gidikkitaa!» yaagee.

2 Woynniyaa gum"iyaasan woyniyaa yed’d’iyaa bitaniyaa mayuwaadan, ne mayuu ayaw zo"eedee?

3 S’oossay hawaadan yaagiide zaarana; «Woynniyaa gum"iyaasaa taani taarekka yed’d’aad; kawutetsatuwaappe itti asaynne taananna baawa. Taani unttuntta ta hank’k’uwaan yed’d’aad; ta yiluwaankka unttuntta dirs’s’eretsaad. Unttunttu suutsay ta mayuwaa bollan d’ac’ettina, ta mayuu ubbay bayeedda.✝63:3 Sas'. 14:20; 19:13, 15 4 Taani ta asaa woziyaa gallassaynne unttunttu morkketoo haluwaa kessiyaa laytsay gakkeedda. 5 Taani s’eellaad; shin taana maaddiyaa itti asaynne beettibeenna. Maaddiyaawe d’ayeedda diraw, taani maalaalettaad. Hewaa diraw, ta k’esii taw s’oonuwaa aheedda; ta hank’k’uukka taana maaddeedda.✝63:5 Isa. 59:16 6 Taani ta hank’k’uwaan kawutetsatuwaa yed’d’aad; ta yiluwaankka unttuntta mentsereetsaad; unttunttu suutsaakka taani gadiyaan gussaad» yaagana.

S’oossay Israa’eeliyaw Keekkiyaa Keekaa

7 Med’inaa Goday nuw ootseedda oosuwaa ubbaa diraw, Med’inaa Godaa aggena siik’uwaanne Aa galataa taani odana; ee, bare maarotaaninne bare keekatetsaa daruwaan Israa’eeliyaa asaw I immeedda c’ora lo"obaa taani odana. 8 S’oossay odiidde, «Unttunttu tumu ta asatuwaanne ta naanatuwaa gidiyaa diraw, taana c’immanaw koyikkino» yaageedda. Hewaa diraw, I unttuntta Ashshiyaawaa gideedda. 9 Unttunttu waayiyaa ubbaan I waayetteedda. Aa de’ussaa Kiitanchchay unttuntta ashsheeda. I unttuntta bare siik’uwaaninne bare maarotaan wozeedda. Kase aad’d’eeda wodetuwaa ubbaan I unttuntta dentsiide tookkeedda.

10 Shin unttunttu makkaleeddino; Aa Geeshsha Ayaanaakka kayyoyeeddino. Hewaa diraw, I simmiide, unttunttoo morkke gideedda; unttunttunnakka oletteedda.

11 Hewaappe guyyiyaan Asay beniwaa, I bare k’oomaa Muse wode ootseeddawaa hassayiide, hawaadan yaageedda; «Bare wudiyaa hentsanchchatuwaanakka ubbaa abbaa giddona aatsiide kesseeddawe hak’an de’ii? K’ay he wode bare Geeshsha Ayaanaa unttunttu giddon wotseeddawe ha"i hak’an de’ii? 12 Bare bonchchuwaa k’esiyaa wolk’k’aama wolk’k’aa Musew ushechcha kushiyaa gidanaadan kiitteeddawe, bare med’inaa haytsaa kessanaw, unttunttu sintsan de’iyaa haatsaa shaakkeeddawe,✝63:12 Kes. 14:21 13 unttunttu c’iimmuwaa giddona pintseeddawe hak’an de’ii?» yaageeddino.

Bazzuwaana aad’d’iyaa paraadan, unttunttu d’ubettibeykkino. 14 Wombbaa duge wod’d’iyaa mehiyaadan, Med’inaa Godaa Ayyaanay unttuntta shemppisseedda. Hewaadan neeni ne suntsaa bonchchissanaw ne asaa kaaletsaadda.

Maarotaanne Maaduwaa Demmanaw Woossiyaa Woosaa

15 Abeet S’oossaw, saluwaana duge s’eella; neeni de’iyaa geeshshanne bonchcho gideedda saappe ellekka be’a. Neeni mishettiyaa mishuunne ne wolk’k’ay anee? Ne wozanay nuuna laamotiyaa laamotaynne ne k’aretay nuuppe haakkeedda. 16 Abrahaame nuuna erana d’ayooppekka, Yaak’oobi nuuna akeekenan d’ayooppekka, abeet Med’inaa Godaw, neeni nu aawuwaa. Beni wodeppekka doommiide, ne suntsay nuuna woziyaawaa. 17 Abeet Med’inaa Godaw, nuuni ne ogiyaappe bayanaadan, ayaw ootsaaddii? K’ay nuuni new yayyenaadan, nu wozanaa ayaw d’uleefayaadee? S’oossaw, ne k’oomatuu diraw, ne biittaa laatteedda zaratuwaa diraw, nuukko simma. 18 Ne geeshsha Asay ne Geeshsha Golliyaa guutsaa wodiyaw laatteeddino; shin nu morkketuu Aa duge zaariide yed’d’eeddino. 19 Nuuni benippekka newantta; unttuntta neeni mooddabaakka; unttunttu ne suntsan s’eesettibeykkino.