Paulus sien ieeschta Breef aun Timotäus 3

Ieejenschoften fa Äwaseena

1 Dit es eene woare Saj: Wan jeemaunt een Bischofs-Aumt jankat, däm jankat een wieetvollet Woakj. 2 Doa saul oba een Bischof onstrof-falich sennen, eene eensje Fru äa Maun, nichta, besonnen*3:2 Ooda: derchjedocht., aunstendich, gaustfrie, fäich toom lieren, 3 nich een Wiensupa, nich een Schlona, nich onierliche Hendlarie driewen, oba jelind, nich zenkjisch, nich habsichtich, 4 dee sien ieejnet Hus goot väasteit, dee jehuarsome Kjinja haft met aule Ieaboakjeit; 5 (wan oba jeemaunt sien ieejnet Hus nich weet väa to stonen, woo woat hee Gott siene Jemeent vesorjen?) 6 nich een Nielinkj, om daut hee nich oppjepust woat un en daut Uadeel vom Diewel felt. 7 Hee mott oba uk een goodet Zeichnis haben von jane, dee buten sent, om daut hee nich enne Schaund felt un enne Schlenj von däm Diewel.