प्रकाश 14

पठ्वा और एक लाख चवालीस हजार जाने

1 यकर पाछे, मै कुछु आकुर देख्नु, मै सियोन पहाड़के टिप्पामे पठ्वाहे ठरह्याइल देख्नु। और ओकर संग एक लाख चवालीस हजार मनै रहिँत। ओइन्के लिल्हारीमे पठ्वक नाउँ और हुँकार बाबक नाउँ लिखल रहिन। 2 और मै स्वर्गमेसे केक्रो आवाज सुन्नु, जोन झरनक गर्जन हस तेज और बद्रि गरगराईल हस जोरसे रहे। जोन आवाज मै सुन्नु, उ आवाज उ ध्वनि हस रहे, जिहिहे मनै अपन तारवाला बाजा बजाईबेर निकरथाँ। 3 एक लाख चवालीस हजार मनै सिंहासनके और चारथो जित्ति प्राणीनके और अगुवनके आघे ठरह्याइल रहिँत। ओइने एकथो लावा गीत गाइतिहिँत, जोन गीत ओइने किल सिखे सेकिँत। यने वहे मनै किल हुइँत, जेनहे परमेश्वर पृथ्वीमे रहुइया मनैनके बिच्चेमसे बँचाइल रहिन। 4 यने उ मनै हुइँत जेने मूर्तिक पुजा करनासे अस्वीकार करदेलाँ, और अपनहे चोखा धर्ले रलाँ। पठ्वा जेहोँर-जेहोँर जैथाँ, ओइने हुँकार अनुशरण करथाँ। संसारके मनैनके बिच्चेमसे एक लाख चवालीस हजार मनै परमेश्वर और पठ्वाहे अर्पण करक लग बँचागिल रहिँत। 5 ओइने कबु झूँट नै बोलल हुइँत। ओइन्हे मनै न्यायसे कुछु गलत कर्लक दोष नै लगाई सेक्थाँ।