1 ओकरपाछे, मै मन्दिरमेसे एकथो बरवार आवाजहे सातथो स्वर्गदूतनसे असिक कहत सुन्नु, "जाऊ संसारके मनैनकेमे परमेश्वरके ओहोँरसे दण्डहे अख्न्यादेऊ, जोन दण्ड उ सातथो खोरियामे बा।"

2 तबेकमारे सुरुक स्वर्गदूत खोरियामे रहल समानहे पृथ्वीमे अख्न्यादेहल। उ मनैनकेमे डरलग्तिक और भयङ्कर बठैना खतरा देखा पर्लिन, जेनकेमे दैँतुरवा अपन छाप लगाइल रहिन, और ओइन्केमे जेने ओकर मूर्तिक पुजा करल रहिँत।

3 दोसर स्वर्गदूत खोरियामे रहल समानहे समुन्दरमे अख्न्यादेहल। तुरुन्ते समुन्दर एकथो मुअल मनैयक खुन हस होगिल। और यकर कारण समुन्दरमे रना सक्कु जित्ती चिज मुगिलाँ।

4 तेसर स्वर्गदूत खोरियामे रहल समानहे लदियनमे और पानीक मुहानमे अख्न्यादेहल, और ओइने खुन बनगिलाँ। 5 तब् मै सारा पानीमे अधिकार रहल उ स्वर्गदूतहे परमेश्वरसे असिक कहत सुन्नु, "हे पवित्र परमेश्वर, अप्नि वहे परमेश्वर हुइती, जे समयक सुरुवातसे लेके अबसम और सदामानके लग नै बदल्थी। अप्निहे असिके न्याय करना अधिकार बा। 6 काकरेकी ओइने अप्निक पवित्र मनैनहे और अगमवक्तनहे मुवाँदरलाँ। तबेकमारे आब अप्नि ओइन्हे खुन पिए देथी। ओइन्के लग वहे सहि ईनाम हुइतिन।" 7 मै फेनदोस्रे किहुहे वेदीमेसे असिक बोलत सुन्नु, "हाँ, हे सर्वशक्तिमान प्रभु परमेश्वर यी जात्तिक हो कि जसिके अप्नि मनैनहे दण्ड देथी, उ सहि और धर्मी बा।"

8 ओकरपाछे, चौथा स्वर्गदूत खोरियामे रहल समानहे सूर्यमे अख्न्यादेहल। तबेकमारे सूर्य अपन आगीलेके मनैनहे जराइक लग सक्षम होगिलस। 9 मनै यी अन्ज्यादी गर्मीसे झँरसगिलाँ, और ओइने परमेश्वरके निन्दा करलाँ। काकरेकी ऊ वहे रहिँत, जेकर थेन दण्डक अधिकार रहिन। ओइने अभिन फेन अपन मन बदलके पाप करे नै छोरलाँ। ओइने अभिन फेन परमेश्वरके महानताहे स्वीकार नै करलाँ।

10 तब् पँच्वा स्वर्गदूत खोरियामे रहल समानहे दैँतुरवक सिंहासनमे अख्न्यादेहल। ओकर कारण ओकर पूरा राज अन्धकारसे भरगिलिस। जोन बरवार दुःख मनै अनुभव करलाँ, उ दुःखके कारण ओइने अपन ढेबर बिच्काई लग्लाँ। 11 ओइन्के वेदना और खटरक कारण ओइने स्वर्गक परमेश्वरके निन्दा करलाँ। पर चाहे ओइन्के अवस्था असिन रहिन, तभुन फेन ओइने पक्कासे अपन मन नै बदल्लाँ, और ना ते ओइने अपन कर्ती रहल खराब कामहे छोरलाँ।

12 तब् छैँठा स्वर्गदूत खोरियामे रहल समानहे बरवार लदिया युफ्रेटिसमे अख्न्यादेहल। ओकर कारण लदियक पानी सुखागिल। और यकर कारण पूरुव ओहोँरकिक् रज्वा अपन सेना लेके उ लदियाहे नाघे सेकल। 13 यकर पाछे मै तीनथो भूत्वनहे देख्नु, जेने मेघीन हस देखाइतिहिँत। ओइन्मेसे एकथो भूत्वा बरवार सँप्वक मुहेँमेसे बाहेर निक्रल। दोसर भूत्वा उ सुरुक दैँतुरवक मुहेँमेसे बाहेर निक्रल। और तेसर भूत्वा झूँटा सन्देश देहुइया दैँतुरवक मुहेँमेसे बाहेर निक्रल। 14 यी भूत्वनके थेन चमत्कार करे सेक्ना क्षमता रहिन, और यने जाके उ मनैनहे जमा करलाँ, जेने यी संसारके सारा देशमे राज करिँत। ताकि ओइने सर्वशक्तिमान प्रभु परमेश्वरके महान दिनमे हुँकार विरोधमे लड़ाई लरक लग जाइँत। 15,16 भूत्वनके शासकहुँक्रिहिन्हे और ओइन्के सेननहे उ ठाउँमे जमा करलाँ, जिहिहे हिब्रू भाषामे आर-मागेड्डोन कहिजाइत। तबेकमारे प्रभु येशू कलाँ, "यी बात सुनो। मै चोरवा आई हस एकफाले अइम। धन्य हुइँत उ मनै, जेने मोरिक आइल समयमे जागल मिलिँत, और अपन लुग्गा तयार धारल रहिँत। तब ओइने नंग्वा नै रहिहीँ, और कुछु फेन ओइन्हे लाज नै करैहिन, चाहे ओइने बाहेर बहुत्ते मनैनके बिच्चेम जाइँत।"

17 तब् सतौँ स्वर्गदूत खोरियामे रहल समान बयालमे अख्न्यादेहल। और मै सुन्नु, वहाँ ऊ रहे, जे स्वर्गक मन्दिरके भित्तरसे परमेश्वरके सिंहासनमेसे बोलल, "मै सक्कु चिज पूरा करदेले बतुँ।" 18 तब् बिज्ली चम्कल, बद्री थर्कलक बरवार आवाज आइल, और डरलग्तिक भुइँचाल आइल। यिहिसे आघे मनै कबु फेन अतरा जोरदार भुइँचालके अनुभव नै करल रहिँत। 19 बेबिलोनके बरवार शहर तीन भागमे अल्गागिल, और पूरा संसारके सक्कु शहर नाश होगिलाँ। काकरेकी परमेश्वर उ चिज पूरा करलाँ, ज्या करना वाचा ऊ बेबिलोनके मनैनहे देना दण्डके बारेमे कर्ले रहिँत। यिहिहे परमेश्वरके ओहोँरसे कर्रा दण्ड देजैहिस। यी दण्ड असिन हुई जसिके कि ओइने बिना पानी मिलाइल दारु पिलेले बताँ। जिहिहे परमेश्वर अप्निहीँ उ खोरियामेसे अख्न्यैले बताँ, जोन खोरिया हुँकार रिसहे जनाइत। 20 उ समय, समुन्दरके सारा टापु एकफाले हेरागिलाँ। और आबसे कौनो पहाड़ नै रहे। 21 बर-बर पठरा आकाशमेसे मनैनकेमे गिरलिन। जेम्ने हरेक पठरा लगभग पचास-पचास किलोक नोदुर रहिँत। ओकर कारण, ओइने परमेश्वरके अपमान करलाँ। काकरेकी ओइन्हे परमेश्वरके पठाइल विपतके कारण बहुत दुःख सहे पर्लिन।