1 ओकरपाछे गहिँर कुण्डक कुंजी और एकथो बरवार सिँक्री हाँथेम लेहल। तब मै एकथो स्वर्गदूतहे स्वर्गमेसे उतरके आइल देख्नु। 2,3 और ऊ उ बरवार सँप्वाहे पकरलेहल, उ वहे रहे जे बहुत समय आघे एकथो सँप्वक रुपमे देखा परल रहे, जिहिहे शैतान फेन कहिजाइत। ऊ उहिहे सिँक्रीलेके बाँधल और तरेक झेलमे फेँकादेहल। यकर पाछे ऊ उहिहे कर्यादेहल, और भित्तर जैना दवारमे सील लगादेहल। ताकि एक हजार साल पूरा हुइतसम ओकर थेन जाति-जातिनके मनैनहे धोखा देना कौनो डगर ना रहे। जब एक हजार साल पूरा होजाई, तब उहिहे फेनदोस्रे छोरजिहिस। पर छुटी समयक लग किल। 4 तब् मै गोड्गात सिंहासन देख्नु, जेम्ने बैठुइयनके मुन्टा काटदेगिल रहिन। काकरेकी ओइने येशूक खुशीक खबर और परमेश्वरके वचनहे घोषणा कर्ले रहिँत। यने दैँतुरवा या ओकर मूर्तिक पुजा नै करल रहिँत। और यने अपन लिल्हारीम या हाँथेम दैँतुरवक छाप नै लगाइल रहिँत। और यने फेनदोस्रे जित्ति होगिलाँ और सिंहासनमे बैठगिलाँ। परमेश्वर ओइन्हे राज करना अधिकार देलिन। और ओइने ख्रीष्टके संग एक हजार सालसम राज करलाँ। 5,6 यी मनै सक्कुहुनसे आघे जित्ति करागिलाँ। और यने विशेष रुपसे धन्य और पवित्र हुइँत। दोसर मृत्युक ओइन्के उप्पर कौनो शक्ति नै हुइतिस। ओइने परमेश्वरके और ख्रीष्टके पुजारी हुइहीँ, और ओइन्के संग एक हजार साल राज करहीँ। परमेश्वर औरे सक्कु मुअल मनैनहे हजार साल पूरा होके सेकल, तब किल जित्ती करैलाँ।

7 जब एक हजार साल बितके सेकी ते शैतानहे ओकर कैदमेसे छोरजिहिस। 8 और ऊ जाति-जातिनहे धोखा देहक लग बाहेर आजाई, जेने पूरा संसारमे फैलल बताँ। यी देशहुँक्रिहिन्हे गोग और मागोग कहिजैथिन। शैतान उ सक्कुहुनहे एक्के ठाउँमे जमा कराई, जहाँ ओइने लड़ाई करहीँ। ओइने बहुत धेउर जाने रहिहीँ, ओइने समुन्दरके आँरितिर रहल बालु हस अतरा धेउर रहिहीँ कि केऊ फेन ओइन्हे गिने नै सेक्हीन। 9 ओइने पृथ्वीक हरेक ठाउँमे गैलाँ और ओइने उ शहरहे घेरलेलाँ, जिहिहे परमेश्वर प्रेम करथाँ, और जहाँ हुँकार मनै रथाँ। पर परमेश्वरके ओहोँरसे, स्वर्गमेसे आगी बाहेर आइल, और पूरा सेनाहे भसम करदेहल। 10 ओकर पाछे, देश-देशके मनैनहे बहकुइया शैतान पकरवा पाई। और ऊ गन्धकके आगीमे फेँक्वापाई, अथवा उ आगीमे जोन समुन्दरके झील हस बरवार बा। दैँतुरवा और झूँटा सन्देश देहुइया दैँतुरवाहे पैलेहेँ वहाँ फेँकादेगिल रहिन। और वहाँ उ आगीमे ओइन्हे सदादिनके लग दिनरात सताजिहिन।

11 तब् मै एकथो बरवार उज्जर सिंहासन देख्नु जेम्ने परमेश्वर बैठल रहिँत। पर उ ठाउँमे पृथ्वी और आकाश सक्कु गायब होगिलाँ, और ओइन्हे केऊ फेन कबु नै देखल। 12,13 तब मै मुअल मनैनहे उ सिंहासनके आघे ठरह्याइल देख्नु, अथवा ओइन्हे जेने महत्त्वपूर्ण बताँ, और जेनके महत्त्व नै हुइतिन। जेने समुन्दरमे डुबके मुगिल रहिँत, और जेने मुके चिहानमे रहिँत। और जेने मुअल मनैनके ठाउँमे रहिँत। ओइन् सक्कु जहनहे मै सिंहासनके आघे ठरह्याइल देख्नु। उ किताब खोलगिलस, जेम्ने उ मनैनके नाउँ लिखल रहिन, जेनके थेन कबु नै ओरैना जीवन रहिन। उ किताब फेन खोलगिलस, जेम्ने मनैनके कर्लक हरेक कामके बारेमे लिखल रहे। और हरेक मनैनके कर्लक काम अनुसार ओइन्के न्याय हुइलस, जोन चिज उ किताबहुँक्रिहिन्मे लिखल रहे। 14,15 जेनके नाउँ जीवनके किताबमे नै लिखल रहिन, ओइने सक्कु जाने बर्ती रहल गन्धकके आगिक कुण्डामे जित्ती फेँकागिलाँ। ओकर पाछे, आब मृत्यु नै हो, आब मुअल मनैनके कौनो ठाउँ नै हो। यिहिएहे दोसर मृत्यु कहिजाइत, जोन मृत्यु गन्धकके आगिक कुण्डामे मिल्ना दण्ड हो।