1 तब् स्वर्गदूत महिन्हे एकथो लदिया देखाइल, जेम्ने जीवनके पानी रहे। पानी सफा सिसा हस रहे। यी लदिया परमेश्वर और पठ्वक सिंहासनमेसे बहतेहे। 2 लदिया उ शहरके डगरके बिच्चेमेसे निकर्ती जाए। और लदियक आँरितिरतिर जीवन देना रुख्वाहे देखे सेकजाइत। ओसिन रुख्वामे बाह्र मेरिक फारा फरथाँ। और हर महिना यने अलग-अलग मेरिक फारा फरैथाँ। और यनके पटिया असिन बिरुवा हुइतिन, जोन बिरुवा पृथ्वीक सक्कु जातिक मनैनहे चोख्वाई सेकत। 3 परमेश्वरके अस्वीकार कर्लक कौनो फेन मनै या चिज उ शहरमे नै मिल्हीँ। परमेश्वर और पठ्वक सिंहासन उ शहरमे रहिहिन। और परमेश्वरके सेबकनके हुँकार आराधना करहीँ। 4 ओइने परमेश्वरहे अपन आमनेसामने देख्हीँ। और परमेश्वरके नाउँ ओइन्के लिल्हारीमे लिखल रहिहिन। 5 और वहाँ फेनदोस्रे कबु रात नै हुई। जोन मनै वहाँ रथाँ, ओइन्हे अपन डगरमे ओजरारके लग दियक कौनो जरुरी नै हुइतिन। ना ते ओइन्हे ओजरारके लग सूर्यक जरुरी बतिन। काकरेकी परमेश्वरे हुइँत, जे मनैनहे ओजरार देथाँ। और वहाँ रहुइया यी मनै ओइने सदादिनके लग राज करहीँ। 6 यकर पाछे, उ स्वर्गदूत महिन्हे कहल: "आघेक कलक सक्कु बात सच्चा बा, और उ पक्कै फेन हुई। प्रभु परमेश्वर जे अपन आत्मा सक्कु अगमवक्तनहे देलाँ, वहे हुइँत जे अपन स्वर्गदूतहे आदेश देलाँ कि ऊ अपन सेबकहुँक्रिहिन्हे यी देखाइक लग यहाँ अइलाँ, जोन झत्तेहेँ हुइक लग बा।"

7 "हेरो, मै झत्तेहेँ आइतुँ। यी किताबमे लिखल अगमवाणीक बात पालन करुइया धन्यके हो।" 8 मोरिक नाउँ यूहन्ना हो। और मै वहे हुइतुँ, जे यी बातहे सुन्नु। और जब मै देख्के सेक्नु ते स्वर्गदूतके आराधना करक लग ओकर गोरामे लिहुरगिनु। 9 पर ऊ महिन्हे कहल, "महिन्हे दण्डवत् ना करो। मै परमेश्वरके सेबक हुइतुँ, जसिके तुँ और तोहाँर भैयनके अगमवक्ता हुइतो। और तुहुरे सक्कु जाने यी किताबमे लिखल शिक्षाहे पालन करथो। परमेश्वर एक्केथो बताँ, जेकर तुहुरे आराधना करे परना हो।" 10 तब् ऊ महिन्हे असिक कहल, "यी किताबमे लिखल अगमवाणीक वचनहे मनैनसे ना नुकाऊ। काकरेकी यी सक्कु चिजके पूरा हुइना समय लग्गेहेँ आगिल बा। 11 जे-जे खराब और घृणित काम करथाँ, ओइन्हे ओइन्के खराब और घृणित कामहे कर्ती रहेदेऊ। अस्तेहेँके जे-जे मजा और पवित्र काम करथाँ, ओइन्हे ओइन्के मजा और पवित्र कामहे बह्राई देऊ।"

12 तब प्रभु येशू कलाँ, "हेरो, मै झत्तेहेँ अइम। हरेक मनैनहे ओइन्के कर्लक काम अनुसार मै ओइन्हे ईनाम या दण्ड देहक लग आइतुँ। 13 सक्कु चिजके सुरुवात करुइया महिँ हुइतुँ। और मै वहे हुइतुँ, जे सक्कु चिजके अन्त्य कराई। 14 धन्यके हुइँत उ मनै, जेने पठ्वक बलिदानसे परमेश्वरके नजरमे पापसे चोखा हुइथाँ। काकरेकी ओइन्हे उ शहरके दवार ओहोँरसे भित्तर जैना अधिकार देजैहिन। और ओइन्हे उ रुख्वक फारा फेन खैना अधिकार देजैहिन, जोन रुख्वा जीवन देहत। 15 शहरके बाहेर खराब काम करुइया मनै, जादू-टोना करुइयन, छिनार काम करुइयन, मनैनके हत्या करुइयन, मूर्तिनके पुजा करुइयन, झूँट बोलुइयन और यक्रेहे अनुसार चलुइयन रहिहीँ। यने कबु फेन शहरमे पैँठे नै भेटैहीँ। 16 मै, येशू अपन स्वर्गदूतहे तुहुरिन्के थेन यी बात बताइक लग पठाइल बतुँ, जेने परमेश्वरके मनैनके समूहमे बतो। मै दाऊद रज्वक सन्तान हुइतुँ; मै वहे हुइतुँ, जे उ तोरैयँक हस हुइतुँ, जोन तोरैयाँ दिन निकरनासे आघे भिन्सरहीँ चम्कत।" 17 पवित्र आत्मा और पठ्वक दुल्हन्याँ येशूहे कहता, "तुहिन्हे जरुर आई परी।" यी बात सुनुइया हरेक जाने, उहिहे फेन असिके कहे परी, "आऊ।" जिही-जिहिहे प्यास लागल बा, ऊ आके उ पानीहे स्वीकार करलेहे जोन पानी फोकत्यामे जीवन देहत।

18 मै यूहन्ना हुइतुँ, और मै तुहुरिन सक्कु जहनहे यी चेतावनी देहतुँ। जेने सुनल बताँ कि यी किताबमे का भविष्यवाणी हुइल: यदि कौनो मनैया यम्ने लिखल बातमे कुछु थपी कलेसे परमेश्वर उहिहे देना दण्डहे बह्रादिहीँ। जोन दण्डक बारेमे यहाँ बतागिल बा। 19 और यदि तुहुरे यी किताबके अगमवाणीक सन्देशमेसे कुछु फेन निकर्बो कलेसे परमेश्वर तुहिन्से उ आशिष लैलिहीँ, जेनके व्याख्या यी किताबमे करगिल बा। परमेश्वर जीवन देना रुख्वक फाराहे खैना और पवित्र शहरमे रना तुहुरिन्के अधिकार फेन छिनालिहीँ। 20 यी बातके गवाही देहुइया येशू कहतताँ, "पक्कै फेन मै झत्तेहेँ आइतुँ।" मै यूहन्ना जवाफ देनु, "आमेन! (यकर मतलब हुइत, अस्तेहेँ होए।) हे प्रभु येशू, आई!" 21 मै प्राथना करतुँ कि प्रभु येशू परमेश्वरके मनैनहे अनुग्रह करिँत। आमेन! (यकर मतलब हुइत, अस्तेहेँ होए।)