प्रकाश 3

सार्डिस शहरके मण्डली

1 येशू महिन्हे असिके फेन कलाँ, "सार्डिस शहरके मण्डलीक स्वर्गदूतहे यी सन्देश लिखो: यी सन्देश ओकर ओहोँरसे हो, जे सातथो तोरैयँनहे अपन हाँथेम लेले रहत। और जे परमेश्वरके सातथो आत्मनहे पठाइत। ऊ असिके कहतताँ: तैँ का काम कर्थे कहिके महिन्हे पता बा। तैँ महिन्हे विश्वास करल हस कर्थे। पर जात्तिकमे तैँ आब मोरिक अनुशरण नै कर्थे। 2 तबेकमारे जागल पलिरहो, मै भेटैनु कि विश्वासीनके रुपमे तुहुरिन्के जीवन उ स्तरमे मेल नै खाइत, जोन स्तर मोरिक परमेश्वर तोकल बताँ। तबेकमारे तुहुरे अपन आत्मिक निंदेमेसे जागजाऊ। और जोन विश्वासी गुण तुहुरिन्केमे अभिन फेन बँचल बा, उहिहे पूरा रुपमे गायब हुइनासे पैलेहेँ लावा बनादारो।