1 Reyeek tiitichchi shittotixxa fishshe boshshammashshanni

heenooxxi guwwumma beekkumakannaa ulfinna shollissa.

2 Beekkichchi manjik godobi eloxxe yaaneba hedha;

gowwi manji kinni fuggoxxiba.

3 Gowwi ora me'aa wodda dho'ichcha yaado afeba'a;

hawwawwumma ifixxanna ayye'ninna leellisha.

4 Ossa lumooxxa muffe sammi assittammaxxee

galchalli mufeti ate'n ke'aaxxa yanna

bakka atixxa wocci assitoxxee.

5 Tenne buttate'n uudennexxi fuggoxxe yaane hexxe;

tinninna galchalli ilaake dedhan.

6 Gowwi manni'a lumo qico ulfatteexxi bakka uwwende'naa,

duureeye kinni hara tuffatendeexxe bakkaxxe kadde.

7 Hayyichchuwwa garbiinsha lekkati me'inaa'na

garbi fadhadoke'n ofo'le me'aa'naa afenne.

8 Bale qotaak isonde giddo iba;

gimotanna diigaaka bofake idda.

9 Kinjo goggo'mishaaka ookkone kinjo isoo miidha;

jirmakanna daraaka jirmi iikki isooe miidhebaaki gatabaan.

10 Duudek meesani

qarema gophoole,

Manjo hunna bira;

baredumma kinni hujetixxe gumma'a geessissa.

11 Bofi atee iddeechchi uduma bafiinxi doodda,

doochchalloke'e mitte lo'onna hexxebaan.

12 Beeki manjike afo'onaa'ni fulaak haaso'i ulfaateeken;

gowwa kinni afo'o ifinge isoo balleessa.

13 Gowwi manji haaso'a gowwummati safeexxi

fuggoxxe maraatummanni muuxa.

14 Gowwi manji haaso'a bira sa'issa.

Mayi dagaaxxa ayyinna ege'naba'a;

isi uduma kaddaaxxa ayyi iso'n kuluta?

15 Gowwa umo ifingixxe huje iso'o kurbu assita;

qachchiinba'a me'aaka oranna ege'neba'a.

16 Koo, moyanji atik oose kade'eeke

ja'laabuwwi atikiirinna soodeeshshanni ite ha'waake boga atike aanne'e!

17 Koo, moyanji atik eloke hadonaa'n ilemeeke,

machcheteete kadebaangi uduudakee

seeriinxe yanna'n ite ha'waaka ja'laabuwwa affe'etteke atike bogixxa wodo!

18 Manji boose'ake kadoole mini isikixxi heellichcho huruffi hitaan;

anga mirqedhemmaxxeenna mini isik xissa.

19 Ite ha'wa oso'lichcho iyyedaggaan,

woyinetixxi bookanna ha'waaka hedho ifinxee assita;

maallaqi hedhoole yaane duuchcha hexxe.

20 Haaso'a atika ci'a iimixxi,

keelik me'itaaxxi marteexxi hitettexxa kuldaaxxe hexxeeni

Goli giddo midde moyanjo cee'mitoxxe'e;

diiphphettexxe taqe'ninna hexxe'e dureessa yowwitoxxe.