1 Tennee duuchchaara godoba abixxenne beekkoletinnaa qulliyye insa'ne hunjaaxxi hujenna Mageniinxe anga'n hexxeexxa wo'menne; yaane kinni ayyinna edi'a iso'o heqqaachchi jalalate kaddo yookaan jibbake kaddeexxa egennebaan. 2 Qullichchakenna cubbbichcha, elokannaa fuggichchak, batto'eekenna batto'ebaaka, tolcha shiqishakannaa shiqishabaake'n duuchchingik qoobbi heger mitteken.

Eloke manjo'n kaddammashshanni

cubbichchake'ninna iittanden;

Kakatamakeera'n kaddammashshanni

kako sodaatammakeera'ninna iittanden.

3 Tinne buttate'n duuchchinge'n kaddeexxi fuggoxxe yaanen: duuchchiingik qoobbi heger mitteken; tenne'ninni hana manjiinke godoba'n fuggoxxi wo'miteeken; manji hedho hedhe'naanni godobi giddo maraatumma hexxeen; ookkonechchi uduma reyo daggaan. 4 Reyeeke neeqi irra lubbo hedheeke wolcho caalan; hedheeke manni giddo hedhaak manji woyyate afe; tinninna

5 Lubbo hedheek manni reyaaxxa ege'needheen,

reyeek kinni mittelchonna ege'na gophemmaxxeeten;

Qalbeefachcho insa'neexxinna gattemmaxxee

insa'ne mitte la'onna anfebaan.

6 Jalala insa'neexxi, jibba insa'neexxinnaa

hinaaffe insa'neexxi woldo baxxeen;

Buttate'n assendaaxxe yaane duuchcha'n

Ta'anni eelqi'a insa'nee mitte qoobbo anfeba'a.

7 Hujettexxe hujenni Mageniin edo elle alfiteettaxxee me'ite gammadda'n itti, woyinetixxa atixxa bookanni gammadda'n ha'wi. 8 Duuchchi wodda golalooxxa seemma oddo'wi, zayitetanna umo atike'n issat. 9 Mageni tenne butta'n ati'a uwweeke mekkichcha baro duuchcha'n, atike mekkichcha hedhotike sane'n are atixxenni welti gammadi. 10 Rertettexxi martaatteke hirreessi giddo hujete kadi hujatee heda, ege'natenna kadi beekkumi hedha gophemmaxxee, anga atixxi affeexxi hujjaaxxa huje duuchcha hunna affettexxe duuchchinni huji.

11 Tenne butta'n uudennexxi wele yaane:

Gongichchi gongaakee,

loli jannakee kadeeba'a;

Ita beekkoletee,

yookaan durumma qarooyyetee;

yookaan gaachchanni ege'na afeeke kadaba'a;

Yaane kinni duuchchiinga elobaaxxi yanna alfitaan.

12 Iittanni umo ifikixxa yanna ege'naak manji hedheba'a;

Fonxoroti ci'a dhaphphi

yookaan marabeti qulxu'muwwa abindammashsha

Manji keekkatebaangi iso'n daggaaxxe

fuggoxxi yannanni fonxoremaan.

13 Iittanni anee mambe'a assisseek tenne butta'n uudenneke fakkeenna beekkumiinken. Isinna: 14 Isinna heenok manni giddo hedha'nemmake mitte shiixxooke qachcha hedhemma'a; mitti hunnaameesi moyanji dageexxi konne qachcha dage lole; buqe abidenna qaraqarake'n lumooka gollifachchotika dalla'a ijaare. 15 Ookkone qachchi giddo hedha'nemmake mitti hiyyeessi beekkichchi manji, konne qachcha beekkuma ifikenni anjire; yaane kinni ookkone hiyyeessa manjo ayyinna isoo qaabbateba'a. 16 Tennexxee ani, «Hunnatenaa'n beekkumi sa'aan» hiyyenne; kaddo malee hiyyeessichchink beekkum tufatemeeke, haaso'i isikinna laqemeba'a.

17 Gowwooltike ya'a'ni laqemaake galchanjik canci irra

beekkichchi manjike hashasha'n haaso'eeke haaso'a laqemaan.

18 Beekkumi loliinke miyanaa'n sa'a;

yaane kinni mitti cubbichchi heddo ellolla yaane balleessa.