1 Yaane tika dande'aak,

beeki manjishsha hedheek ayyete?

Beekkumi manjiinka alba farri asseexxi

goora ifikanna jijjiiraan.

2 Mageni edo kako aaggettaxxee moyanjiinka ajaja ulfeessi; atee hiyya'neen. 3 Moyanji edii'n fulatee mudandoxxe'e. Isi eeyyeexxa assa dande'ammaxxee elobaaxxe yaanexxe buuto kaddoxxe'e. 4 Moyanjiink hiyyichchi hunna afeeke kademmaxxee iso'o «Maa assitaate?» hiyya dande'aak aate?

5 Isi'a ajajemaak ayyinna miidhemaba'a;

beeki manji yannatanna yaane assendaa gara ege'naan.

6 Manjoke'n rakko yo'oshsha tuulendoolenna,

duuchchiinxi yaane ifixxe yannanna assendaake gara affe.

7 Heger kaddaaxxa manji ege'na gophammaxxee

edi'a daggaaxxa aate iso'n kula dande'a?

8 Manji diidallo ajajatixxa hunna afebaan;

ifixxe reyotixxe barra'inna baallooma afeek ayyinna hedheba'a;

Ayyinna bagediinxa yanna wocci assema dandeessissamabaashshanni

fuggoxxinna fuggoxxa huccammakara wocci assitabaan.

9 Tenne butta'n assendeexxa yaane duuchcha hubatee uudennexxi tenneera duuchcha afenne. Manji manjo miidho'a weleke'n galchalloke kadaaxxe yanna hexxe. 10 Iittanni woyyitte bakkaba'a dagammakiirinna okko'n fula'ammakiir fuggichchi manni moogemee'naa afenne; tennee hunjemmake qachchi giddo saadema'nemman; tinninna mekki assitaaxxe yaanen.

11 Fuggoxxa hujaake manna'ni iikki woddi murte uwwema gophphoole fuggoxxa huja manjike godoba'n wo'mitaan. 12 Cubballeessi manni dhibbale cubbo huje qeerraake baro hedhoolenna Mageno sodaateexxi ulfeessaake manni'a eloxxi kaddaaxxa ege'ne'een. 13 Yaane kinni fuggaalleessi manni Mageno sodaata gophaammaxxee bari insa'neek gaadidduffa qeeredhabaan.

14 Buttate'n mekki assitaaxxa uudennexxi yaane: qulliyyete'n geltammaxxi fuggaalleeyyete'n, geltammaxxinna qulliyyete'n geltaan. Tinniirinna mekki assitaaxxe yaane hiyyenne. 15 Ite ha'watinna gammadati gadhi darre wele woyya hiyyendaaxxi yaane hedha gophphemmaxxee hedhote'n gammada eloxxen hiyyenne. Tennexxee manjokee Mageni tenne butta'n hedho'a uwweeke baro duuchcha'n huccaachcho'n gammadaan.

16 Beekkuma ege'nateee hashsha barra diipho gophatixxa tenne buttaxxa manjiinxa hedho hubate uudanno wodda, 17 Mageni asseexxa duuchcha afenneni; buttate'n kaddaaxxa ayyinna ege'nabaan; manji qote afatee lumo qico wo'laanolenna yaane hexxee qico ege'na dande'abaan. Beekkichchi manji midde ege'neenne hiyyoolenna yaane hexxee qico qunqume afabaan.