1 Mageni mine'n e'yitatto wodda ifi xexxe'ati; Laqateennaa ajajematee qophphefati; tinni fuggoxxa assa'neexxa ege'nebaak gowwi manni Magenokee uwwaake tolchanaa'n saxxaan.

2 Haaso'a muddandoxxe'e;

Magen edo heene yaanenna haaso'ate

qalbe atixxenni jarjjartoxxe'e;

Mageni iima hedheen

ati kinni butta hexxettaxxee

haaso'i atik heenoke kadowwaal.

3 Hujetixxi birasa'ne oojjo iyyedaggammashsha

haaso'iinxi bira sa'nenna gowwammatike haaso'a leellishshaan.

4 Magenokee werreggottole muuxxeboxxok hekki hitoxxee; boose'a manna'n isi gammada gophammaxxee'e werreega atika muuxi.✝ 5 Werrege uwwa gophati mannii'n werreega gophiyyo woyyan. 6 Afo'i atik cubbote'n atee ibisabaashsha mee kadi; galmiinke erganjo'ninna, «Werreegennek dedhikiten» hitoxxe'e; mayeeta Mageni haaso'a atike'n mufateexxi huccitettelchcho atenaa'n biraa? 7 Heddo oojjonnaa heddi haaso'i mittelchonnabaan; tennexxee Mageno sodaati.

8 Mitti galchalli ifika umiinka galchallo afe'een; konne lamiinga kinni wele uumiink galchalluwwi insa'nee galchammaxxee bogi giddo hiyyeeyye miicendaa'naa, seeri goraa'naa'a, deette ifixxi gophendaa'naaa uuddottole mancira hitoxxee. 9 Buttin uwwaaxxi la'o duuchchiingeeten; moyanjikinna umo ifingenninni la'o alfaak fichchakenaa'niten.

10 Maallaqa eeyyaak maallaqa goddabaan;

durumma eeyyaak alfeexxe karra duuchcha'n dheebo fulabaan;

tinninna mekke assitaaxxen.

11 Karra birasaxxeexxe qixxe'n

isee la'oonfataakinna bira sa'aan;

Iittate kaddooleta isee illet uuxedha malee

annakee maa la'o uuta?

12 Heenochchonna kadi lumoolchcho itoole

hujaaliink diiphi isik xe'maken;

Dureessi manjixxi karra kinni

diipho isoo kuttaan.

13 Buttate'n yo'oshsha yaadissaaxxa fuggoxxa yaane uudenne;

Tinninna horateeke annixxe miidhema'a qusendeexxe karra.

14 Yookaan elobaaxxi daggaa baro baxxaaxxe karran,

Tennexxee beltokanna i'loole

isi'a sa'issaachcho afaba'a.

15 Manji amatike godobanaa'n duwwit ilememmashshanni

iittanni duwwittinni illee iima higaan.

Elo'eexxi huccechchinaa'n

midde mittelchonna anga abixxee iyyedhabaan.✝

16 Tinni kinni yo'oshsha yaadissaaxxe fuggoxxe yaanen;

Manji dagemmashshanni iittanni ille iima higaan.

Elo isixxi duuchchi diidallo adhdhiteechchishshate kaddooleta

la'o isixxi maachcho?

17 Jabaxxe wixxirrinni, rakkoni, hifonninna dhibonni

baro ifika duuchcha dukkanootteexxe hedho giddo hedhaan.

18 Yoona, an uudennexxi woyya hiyyendaaxxi yaane manji tenne butta'n hedhaake harumaake baro'n elo'e hujeechcho duuchcha ite ha'wa'n gammadaten; kunni manjokee uwwemeeke qoobbon. 19 Mageni manjokee karrannaa qabeenna uwweechchi manji elotika hira alfeexxi ite ha'wa'n gammadaashsha assateeten; tinni Mageninxe uwwan. 20 Mageni qalbe isixxe'n gammado uggemmaxxee hedhaake barixxe lumo qico hedabaan.