1 Eloxxe shitto mannii'n eloka summa woyyan;

ilenshatixxe barra mannii'n reyotixxa barra woyya.✝

2 Ite ha'watike mine'n me'ati mannii'n

yaaddotike miniba'a me'a woyya;

Reyo manjo duuchchiingee muuxama kaddemmaxee

Hedhot hedheek tennee godobake'n galchedha hasissaan.

3 Yaaddo alba xillisseexxe kaddoolenna qalbe giissitammaxxee

ooso'lchi mannii'n yaaddo woyya.

4 Beekkoleti godobi yaaddotike mine'n hedheen,

gowwooletik godob kinni gammashshotike mine'niten.

5 Gowwooletika sirba laqati manni'n

beekkoletika xixichcho laqa woyya.

6 Gowwiink oso'lchi odoolchoti hundii'ni xaxa'isammaxxe utetixxe haqqeshshaten;

tinninna mekki assitaaxen.

7 Manjo miica beeka manjo hawwi assitaan;

matta adhdhanna eloka adaba balleesstaan.

8 Mitte yaaneke ke'iti irra muuxaa iseka woyyan;

ifi dukaake manji mannii'n ossaameessa manjo woyya.

9 Aare gowwiinxe halo fulatike ora kaddemmaxxee

aare ifinaa'n balleessi.✝

10 Beeki manji qoraake qortuma kada gophemmaxxee,

«Edike baronaa'n ta'ak mayee woyyo'e» hite qortoxxe'e.

11 Beekkumi karratishshanni elolchchon;

elle isixxinna buttate'n hedheeke manji duuchchi'aaten.

12 Maallaqi manjokee buyyote kademmashshanni

beekkumikinna manjokee buyyoten;

tennenaa'n ege'na caaldaa qici kinni

beekkumi isoo afemmake annixxa hedho heqqaten.

13 Mageniinxa huje amo hubatte uudi;

Isi dasseechcho

ayyete dande'e toggi assa?

14 Yaane eldaa wodda gammadi;

yaane yoxxa wodda kinni

Mageni mitte yaane asseek

weletanna assaaxxa hedi;

Tennexxe manji heger iso'n kaddaaxxa

ege'na dande'abaan.

15 Konnee mekki assaake anke hedhotike baro'n mittelchonna afebaachcho lame yaane uudenne;

Tinninna qullichchi qullummati ba'aa'naa;

fuggichchi qeerraaka baro hedha'naa uudenne.

16 Tennexxee hara qullichchake kaddoxxe'e;

hara beekkake kaddoxxe'e;

mayee ifi shi'witatto?

17 Atixxe yanna belo rertaboxxoshsha

yo'oshsha fuggichchake

yookaan gowwake kaddoxxe'e.

18 Tenne yaane mitteba abidde'e mittetanna wocci assa gopha eloxxen;

Mageno sodaataaki manji kinni

yaane duuchcha'n calaqi hiyyotenaa'n gataan.

19 Mitte qachcha'n hedheeke tomme galchalluwwi caala

beekkum beeka manjo hunnaameessake assaan.

20 Eloxxa calla assa'n haranga cubbo hujabaak

qullichchi manji buttate'n hedhebaan.

21 Manji haaso'aaxxa duuchcha dho'o hite laqqoxxe'e

akimagaada erganji atik atee yowwaa'naa laqqattoxxi hexxaan.

22 Heddole atinni umo atingenninni

wele manna yowwitettexxa atingi godobi ege'ne'eeken.

23 Aninna tenne duuchcha beekkuma ankenni kokennexxi,

«Beekichchake kadonna'a mudhdhenne» hiyyenne.

Kaddo malee kinni tinni anxe hunna iimi darremman.

24 Beekkumi yo'oshsha manjiinke hedumi iimi darre

hedheekeenna bayyateeke kademmaxxee

beekkuma ayyete koke afa?

25 Tennexxee beekkumakanna yaane duuchcha kaddee qico ege'natee qote afateenna qorqorateee,

fuggichchummatixxa yo'ne,

Gowwummatixxa maraatumma qalbeefatonna'a

yaadik wirri hiyyenne.

26 Reyoti caalanna qaraarteexxa wel yaane afenne.

Tinninna meyyaxxixxe fonxoroni;

meyyaxxi marabetishsha hexxeexxe isexxe jaalalanni labballo fonxorte abidaan;

isenna lekkatike haachchaba kaddeexxe isexxe hirrenni marxende'e abido'a hassaan;

Mageno sodaatak manji calli isenaa'ni baaje fula dande'aan;

cubbichcha manjo kinni ise fonxorte abiddaan.

27 Beekkichchi hiyyee qici: Kunnise qorqore afennexxi yaane konnechchinni butti'a hexxeen;

«Mitte yaaneka mala qorqore afatee'e

Mitte yaane mittete'n lebba'n,

28 Qorqorande'n hedhe

kinni gophennek, kumi labballi giddo mitte eloka manjo afenne;

konne duuchchi giddo kinni mitte eloxxa manjichcho midde gophenne.

29 Mitte calla afennexxi yaane

Mageni manjo dadee wodda eloke asse dadeexxa;

manji kinni heddo mala male» hiyye.