1 Buttate'n wele fuggoxxa yaane afenne; tininna manjoke'n yo'oshsha a'urtaaxxen. 2 Manji hedeexxa gophaashsha Mageni manjokee karra, qabeennakanna ulfinna duuchcha isi'a uwwaan; Mageni kinni konnechchuwwa'n gammadaaxxa dande'a isi'a uwwebaan; garmajje alagi konnechchuwwa'n gammadaan; tinni mittelchonnabaan yo'oshsha fuggoxxe yaanen. 3 Manji mitti dhibba oose i'loole, fedhee qiconna qeerraaxxa wogga hedhoolenna, horateexxe karra'n gammada gophoole reyaa woddanna eloka mooggo alfabaake kadoole; isi mannii'n lubbeme ilemeechcho woyya. 4 Ikki lubbeme ilemeechchi mitte la'onna afebaan; dukkana giddi'aanna me'aan; ebeli hiyyemaaka summanna afabaan. 5 Arishsho uuda gophoolenna yookaan mittelchchonna ege'na gophoolenna midde ikkichchi ookkone manjichchi caala hafuura adhe'een. 6 Tennexxee iikki manjichchi lame kuma wogga hedhoole yaane kinni karra ifixxe'n gammada gophoole lamiingixxi me'a mitte boonchiba'aatebaa?

7 Manji duuchchi elo'e hucca godobakeeten;

kaddo malee kinni goddenne hiyyo ege'nebaan.

8 Gowwi manji mannii'n beeki manji caala afe'eexxi la'o maachcho?

Hiyyeessita ardi giddo galaa qico ege'naa

isi'a maa la'o uuta?

9 Halchati hiremati mannii'n

anfenechcho'n gammada woyya;

Tinninna mekki assitaaxenna

diidallo hordofatixxe qixxen.

10 Ta'a hedheechchi duuchchi edonni summa afe'eechchon;

manji maa kadaaxxanna edonni ege'nendeexxen;

Ifixxe hunna iimi darre hedheeke manjinni

ayyinna moroma dande'abaan.

11 Haaso'i bira sa'eexxe qixxe'n

mekki assitaaxxi yaane birasaxxaan;

tinnita manjokee maa la'o affe?

12 Manji hedhoti hedhaa wodda gaaddisiinsha sa'aake heenokenna mekki assaake isike baro'n manjokee eloxxa ege'neek ayyete? Yookaan isi reyee udumata buttate'n maachchi kadaaxxa ayyete iso'n kula dande'ata?