1 Duuchchiinxee yanna hexxeen;

Tenne butta'n kaddaaxxe yaane duuchcha'a Mageni mureexxe yanna hexxeen.

2 Ilemiyyotee yannate hexxeen,

reyiyyotee yannate hexxeen,

Kaasiyyotee yannate hexxeen,

goshiyyotee yannate hexxeen.

3 Shiyiyyotee yannate hexxeen,

Fayyisiyyotee yannate hexxeen,

ijaariyyotee yannate hexxeen,

diigiyyotee yannate hexxeen.

4 Oodhiyyotee yannate hexxeen,

ooso'liyyotee yannate hexxeen,

yaadiyyotee yannate hexxeen,

sirbiyyotee yannate hexxeen.

5 Kino xeeriyyotee yannate hexxeen,

kino bukki assiyyotenna yannate hexxeen,

Hanxo'watee yannate hexxeen,

ha'nxo'wa gophiyyotenna yannate hexxeen,

6 hasiyyote'e yannate hexxeen,

hasa gophiyyoteenna yannate hexxeen,

Massiyyote'e yannate hexxeen,

huniyyoten yannate hexxeen,

7 daryotee yannate hexxeen,

hodhdhiyyotenna yannate hexxeen,

Sammi hiyyoteenna yannate hexxeen,

haaso'iyyotenna yannate hexxeen,

8 Eeyyiyyotee yannate hexxeen,

jibbiyyotee yannate hexxeen,

bagedokee yannate hexxeen,

nage'akee yannate hexxeen.

9 Hujallita, elo'eexxi maa la'o alfaa? 10 Manji elo'e hujo'a Mageni uwweeka hujetika a'ure uudenne. 11 Mageni yaane duuchcha yanna isexxe'n kaddaashsha seese giissedheen. Manjiinxe sammo giddonna edi'a kaddaaxxa ege'natixxa halcha uggeen; kaddo malee Mageni hujeexxa duuchcha manji sirtenaa'n muuxamii qico'ni ege'nabaan. 12 Tennexxee manji hedhotike baro'n eloxxa assatena'ninnaa gammada'n hedhatenaa'n woyya hiyyendaxxi yaane hexxebaaxxa ani wo'meennen. 13 Manji ite ha'weexxi elo'e hucceechcho'n gammadaashsha tinni Mageniinxe uwwan. 14 Mageni hujeexxi yaane duuchchi, duuchchiin woddi'a hexxaaxxa ege'neennen; ise'n mitte lenbaxxi yookaan isenaa'n hoyyinaaxxi yaane hexxebaan; Mageni tenne asseechchi manji isoo sodato'aten.

15 Ta'a hedhechchi edonni hedheechchon;

edi'a kadachchinna edi wodda hedheechchon;

Mageni eettene edo dadeemmanxi yaane higgeggeen kaddaashsha assaan.

16 Buttate'n higgenna afennexxi yaane,

Dhugatixxi murte uwwendaammabaanna

seeriinxi hujendaammabaa fuggoxxi kaddaa'naa afenne.

17 Aninna godobi giddo,

«Assendaaxxe yaane duuchchi'a,

hujendaaxxe yaane duuchchi'a yanna hexxemmaxxee,

Mageni qullumma hujaake'ninna fuggoxxa assaake'n mura muraan»

hiyye hedennen.

18 Aninna higgeen hiyye hedenne qici, «Manji, hori, biniinchakenaa'n woyyo'eke kadebaaxxa ifi ege'naashsha, Mageni iso'o hega uuda'neen. 19 Manjo heqqita'neexxi yaane hori biniinchixxishshanden; lamiinga mitte yaane heqqita'neen; mitti reya'neeshshanni mittikinna reyaan; lamiingik hafuuri mitteken; manji biniinchakenaa'n woyyo'aaxxi yaane hedha gophphemmaxxee'e lamiingixxi yaane mekki assitaaxxen. 20 Manjoke kadi hori biniinchi lamiing mitte boonchi'a me'inaan; kunninna buttinakenaa'n dademmemmaxxee wirri hine'e buttinange'n hingaan. 21 Manjiink hafuuri iimi'a me'aaxxannaa hori biinnchik hafuuri kinni butti'a me'aaxxa ayyete ege'ne?»

22 Manjo heqqita'neexxi tennende kaddemmaxxe'e manji assaaxxe yaane'n gammada gadhi darre wele assaaxxi yaane hexxebaaxxa wo'menne; reyeechchi udumanna kaddaaxxa yaane ege'naak ayyinna hedhebaan.