1 ሄሳፈ ጉየ፥ ጎዳይ አብራመስ አሙሆን ቆንጭድ፥

"አብራመ ባቦፋ፥ ታኒ ነዉ ጎንዳለ፥

ነ ዎይቶይ ግታ" ያግስ።

2 ሽን አብራመይ፥ "አቤት ኡባ ሃርያ ጎዳዉ፥ ኔኒ እምያ ዎይቶይ ታዉ አይሴ? ታዉ የሎይ ባዋ፤ ቡሮ ታና ላታናይ ዳማስቆ ኤልአዛራ ግደኔ? 3 አብራመይ፥ ኔኒ ታዉ የሎ እማቦና ግሾ ታ ኬን ደእያ ታ አይለይ ታና ላታና" ያግስ።

4 ጎዳይ እያኮ፥ "ሀ አይለይ ነና ላተና፥ ሽን ነ ጉልባታፐ ከያና ነ ናአይ ነና ላታና" ያግስ። 5 ያግ ስሚድ እያ ካረ ከስድ፥ "ፑደ ሳሎ ፄላ፥ ኔኒ ፆልንቶታ ፓይዳናዉ ዳንዳእኮ ፓይዳ፥ ህዛ ነ ሼሻይካ ሄሳዳ ግዳና" ያግስ።

6 አብራመይ ጎዳ አማንስ፤ ጎዳይ እያዉ ሄሳ ፅሎተ ኦድ ኤክስ።

7 ቃስካ ጎዳይ እያኮ፥ "ኔኒ ሀ ቢታ ላታና መላ ካልዳወታ ቢታፈ ኡረ ካታማፐ ነና ከስዳ ጎዳይ ታና" ያግስ።

8 ሽን አብራመይ እያኮ፥ "አቤት ኡባ ሃርያ ጎዳዉ ሀ ቢታ ታ ላታናይሳ አይብን ኤሮ?" ያግስ።

9 ጎዳይ እያኮ፥ "ሄ ላይ ግድዳ እስ ኡስ፥ እስ ዴሽ፥ እስ ዶርሰነ ሄሳዳካ ሆለነ ጎርለ ታዉ ኤካዳ ያ" ያግስ። 10 አብራመይ ሄሳታ ኡባ ፆሳስ ኤህድ ካፎት አትሽን፥ ሀራታ ቃንፅድ ናምኡ ከስ ሻክድ እሱዋ እሱዋ ግናን ዎስ። 11 አንኮት ሄ አሹዋ ማናዉ ቦላፈ ዎዶሶና፤ ሽን አብራመይ ኤንታ ጎድስ።

12 አው ዉላና ሀንያ ዎደ አብራመ ዎልቃማ ስኮይ ሾጭ የግስ። ዳጋንያ ዎልቃማ ም እያ ቦላ ዎስ። 13 ጎዳይ አብራመኮ፥ "ነ ሼሻይ አላጋ ቢታን በተ አስ ግድድ ዳናይሳ ሎይዳ ኤራ፤ ኤንቲ አይለተን ኦይዱ ፄቱ ላይ ናቀት ሃረታና። 14 ሽን ኤንታና አይለተን ሃርያ ደርያ ታ ፕርዳና፤ ኤንቲ ሄ ቢታፈ ከይሸ ዳሮ ሻሎ ኤክድ ከያና። 15 ነና ግድኮ፥ ኔኒ ነ ማይዛታኮ ሳሮተን ባና። ኔኒ ዳሮ ጭማዳ ሞገታና። 16 ነ ሼሻይ ቡሮ ኦይዳን የለተን ሀ ቢታ ስማና። አይስ ጊኮ፥ አሞረታ ናጋራይ ፕርደታና ልክያ ቡሮ ጋክቤና" ያግስ።

17 አው ዉልን ሳእ ማ ልንፅ ግን፥ ጮጨ ታማ ጩይነ ታማ ላጮይ በንትድ ሻከትዳ አሹዋ ግዶራ አስ። 18 ሄ ጋላስ ጎዳይ አብራመስ፥ "ግብፀ ሻፋፐ ዶምድ ኤፍራፂሳ ሻፋ ጋካናዉ ደእያ ቢታ ኡባ ታኒ ነ ሼሻስ እማና። 19 ሄ ቢታይ ቄናታ ቢታ፥ ቀነዛታ ቢታ፥ ቃድሞነታ ቢታ፥ 20 ህተታ ቢታ፥ ፓርዘታ ቢታ፥ ራፋይመታ ቢታ፥ 21 አሞረታ ቢታ፥ ካናነታ ቢታ፥ ገርገሰታ ቢታነ ያቡሰታ ቢታ" ያግድ ጫቅስ።