1 ሰደቅያስ ካዎትዳ ኡዱፉን ላይ፥ ታማን አጌናን፥ ታማን ጋላስ፥ ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ፤ እያ ዩሹዋን ቢታ ዶርድ ተቅስ።25:1 ኤርም 21:1-10፤ 34:1-5፤ ህዝ 24:2. 2 ሰደቅያስ ካዎትዳ ታማነ እስን ላይ ጋካናዉ፥ ካታማይ ተቀትድ ጋምእስ።
3 ሄሳ ጋሶን ቢታን ኮሽ ሱልን፥ ሄ ላይ ኦይዳን አጌናን፥ ኡዱፉን ጋላሳን አሳስ ምያባይ ይስ። 4 ካታማ ዩሾ ግምበይ እስ ባጋራ መቅን፥ ካልዳወት ዩይ አድ ናግኮካ፥ ይሁዳ ካዋ ኦላንቾት ኩመ ቃማ ካዎ ጋደ ኤፍያ ኦግያ ኦይክድ፥ ናምኡ ድርሳ ግምበት ጋሄትያ ፐንግያራ ከይድ ባቃትዶሶና። ኤንቲ ዮርዳኖሰ ድልባኮ ስሚድ ባቃትዶሶና።25:4 ህዝ 33:21. 5 ሽን ባብሎነ ኦላንቾት ካዋ የደድ፥ እያርኮ ደምባ ጋሸ ኦይክዶሶና። እያ ኦላንቾት ኡባይ እያፐ ሻከትድ ላለትዶሶና። 6 ሄሳፈ ጉየ፥ ኤንቲ እያ ራብላ ካታማን ደእያ ናቡካዳናፆራኮ ኤፍዶሶና። ባብሎነ ካዎይ ሰደቅያሳ ቦላ ፕርድስ። 7 ሰደቅያሳ ናይታ፥ ሰደቅያስ ፄልሽን ዎዶሶና። እያ አይፈታ ዎጭ ከስድ፥ ሳንላታን ቃችድ፥ ባብሎነ ቢታ ኤፍዶሶና።25:7 ህዝ 12:13.
ፆሳ ኬ ላለተ
(ኤርም 52:12-33)
8 ናቡካዳናፆር ባብሎነን ካዎትዳ ታማነ ኡዱፉን ላይን፥ እቻሻን አጌናን፥ ላፑን ጋላሳን፥ ካዋ ሞርናታፐ እሶይ፥ ካዋ ናገይሳታ ሀላቃይ ናቡዛርዳን የሩሳላመ ገልስ። 9 ፆሳ ኬ፥ ካዎ ጋነ የሩሳላመን ደእያ ኬ ኡባ፥ ግታ ኬ ጌተትያ ኡባ ፁግስ። 10 ባብሎነ ኦላንቾት ኡባይ ካዋ ናገይሳታ ሀላቃ ኪታን የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና። 11 ናቡዛርዳን ካታማንነ ይሁዳን አትዳ አሳታ፥ ካድድ ባብሎነ ኦላንቾታን ጋሄትዳ አሳታ ኡባ ኦይክድ፥ ድእድ ኤፍስ። 12 ሽን ናቡዛርዳን ዉርሰ ማንቆታፐ ጉታ ዎይነ ቶካናዳነ ጋደ ጎያናዳ ይሁዳን አሽስ።
13 ባብሎነ አሳት ፆሳ ኬን ደእያ ናሰ ብራታፐ መዳ ቱሳታ፥ ጫና ጋረታነ ግታ ከረታ መንረዶሶና፤ ናሰ ብራታ ኡባ ባብሎነ ኤፍዶሶና።25:13 1 ካዎ 7:15-26፤ 2 ታር 3:15-17. 14 ከረታ፥ አካፋታ፥ ፆምፐ ፄራ ፕትያባታ፥ ጭልፓታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና።25:14 1 ካዎ 7:45፤ 2 ታር 4:16. 15 ካዋ ናገይሳታ ሀላቃይ ናቡዛርዳን ዎርቃፈ ኦሰትዳ ሚሸታ ዎርቃ፥ ብራፐ ኦሰትዳ ሚሸታ ብራ ኦ ኤክድ፥ እፃነ ጩይስያ ሻተታነ ፃሮታ ኡባ ኤፍስ። 16 ካዎይ ሶሎሞነይ ፆሳ ኬ ኦሶስ ጊግስዳ ናምኡ ቱሳታ፥ ግታ ከረታነ ጫና ጋረታ፥ ናሰ ብራታ ምዛነን ልካናዉ ዳንዳኤትቤና። 17 ናምኡ ቱሳት እስ መላ ግድድ፥ እሱዋ እሱዋ ጌሳይ ታማነ ሆስፑን ዋ፤ ቃስ እስ እስ ቱሳ ሁጰን ደእያ ጉምቦት ሄ ዋ አዱሰ። ሄ ጉምቦታ ዩሾይ ናሰ ብራታ ግተንነ ኦሮማነ ቴራ ምስለን አሌቀትስ።
ይሁዳ አሳ ድኤተ
(ኤርም 52:24-27)
18 ካዋ ናገይሳታ ሀላቃይ ናቡዛርዳን፥ ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሀራ ሄ አሳታ ኦይክስ። 19 ሄ ዎደይ ጋካናዉ፥ ካታማን ደእያ አሳፐ ይሁዳ ቶራ ሞጮና፥ ካዋ ዞረይሳታፐ እቻሹ አሳታ፥ ቶራ ሞጮናታ ፃፍያ፥ ኦላንቾታ ዶርያ ሀራ ኡሱፑን ታሙ አሳታ ኤፍስ። 20 ሀላቃይ ናቡዛርዳን ኤንታ ኡባ፥ ባብሎነ ካዋኮ ራብላ ካታማ ኤፍስ። 21 ባብሎነ ካዎይ ኤንታ ኡባ ሀማታ ቢታን ራብላ ካታማን ዎስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።
22 ካዎይ ናቡካዳናፆር ሳፋና ናኣ ናኣ፥ አክቃማ ናኣ ጎዶልያ ይሁዳን አትዳ አሳ ቦላ ሹምስ። 23 ኩሸ እምቦና ይሁዳ ቶራ ሞጮናትነ ኦላንቾት ሄሳ ስእዳ ዎደ፥ ምፅጳን ደእያ ጎዶልያራ ጋሄትዶሶና። ሄ ሀላቃት ናታና ናኣ እስማኤላ፥ ቃረያ ናኣ ዮሃና፥ ናፆፋ አድያ ታንሁመታ ናኣ ሳራያነ ማካታ አድያ ያዛና ናኣ። 24 ጎዶልያ ኤንታዉነ ኤንታ ኦላንቾታስ "ሀይሳታስነ ኤንታ ሀላቃታስ ያዮፍተ። ሀ ቢታን ደእተ፤ ባብሎነ ካዋስ ሃረትተ፤ ሄሳ ህንተ ኦኮ ኡባባይ ህንተዉ እንጀታና" ያግድ ኤንታዉ ጫቅስ።
25 ሽን ላፑን አጌናን፥ ካዎ ኮች ግድዳ ኤልሳማ ናኣ ናታና ናአይ እስማኤል ታሙ አሳራ ምፅጳ ብድ፥ ጎዶልያ፥ ይሁዳ አሳነ እያራ ደእያ ባብሎነ አሳ ኡባ ዎስ። 26 ሄሳፈ ጉየ፥ ባብሎነ አሳስ ያይድ፥ ይሁዳ አሳይ፥ ጉ ግት አቶናሽን፥ ቶራ ሞጮናት ኡባይ ግብፀ ቢታ ባቃትዶሶና።
ዮአክን ቃሾፐ ብለተ
(ኤርም 52:31-34)
27 ዮአክን ድኤትድ ብዳ ሀስታማነ ላፑን ላይን፥ ታማነ ናምአን አጌናን፥ ላታማነ ላፑን ጋላሳን፥ ዮር-ማሮዳክ25:27 ዮር-ማሮዳካ፦ ሀራ ሱንይ አመል-ማሮዳካ ጌተቴስ። ካዎትዳ ላይ፥ ይሁዳ ካዋ ዮአክና ማርድ ቃሾፐ ብልስ። 28 ዮር-ማሮዳክ፥ ዮአክናራ ሎኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አድ፥ እያ ቦንችስ። 29 ሄሳ ግሾ፥ ዮአክን ቃሾ ኬን ማእዳ ማኡዋ ላምድ፥ አትዳ ባ ደኦ ላይ ኡባን ካዎ ጋይታፐ ምስ። 30 ጋላስ ጋላስ እያዉ ኮሽያባ ኡባ ባብሎነ ካዎይ እሚስ።