ይሁዳ ካዋ ህዝቅያሳ
(2 ታር 29:1-2፤ 31:1)
1 ኤላ ናአይ ሆሰይ እስራኤለን ካዎትዳ ሄን ላይን፥ ይሁዳ ካዋ አካዛ ናአይ ህዝቅያስ ይሁዳን ካዎትስ። 2 እ ካዎትያ ዎደ ላይ እያዉ ላታማነ እቻሻ፤ የሩሳላመን ላታማነ ኡዱፉን ላይ ካዎትስ። እያ አየ ሱንይ አብያ ጌተቴስ፤ እያ ዛካርያሳ ናእዉ። 3 እያ ማይዛይ ዳዊቲ ኦዳይሳዳ፥ ህዝቅያስ ጎዳ ስንን ሱረባ ኦስ። 4 አሳይ ቃ ጎይኖ በሳታ ድግስ። ኤቃ ቱሳታ መንረስ። አሼራ ጌተትያ ፆሰ ምስልያ ቃንፅ የግስ። ቃስ ሙሰይ ናሰ ብራታፐ መዳ፥ ናሁሽታና ጌተትያ ሾሻ ምስልያ መንረስ። ሄ ዎደይ ጋካናዉ እስራኤለ አሳይ እያዉ እፃነ ጩይስሸ ጋምእስ።
5 ህዝቅያስ ጎዳ እስራኤለ ፆሳ አማንስ፤ ይሁዳ ካዎታ ኡባ ግዶን እያ መላ ካዎይ እያፐ ካሰ ግድን፥ እያፐ ጉየ ግድን በንትቤና። 6 እ ጎዳራ ኦይከትስ፤ ጎዳ ካሎ አግቤና፤ ጎዳይ ሙሰ ኪትዳ ኪታታ ናግስ። 7 ጎዳይ እያራ ግድስ፤ እ ኦያባ ኡባይ እያዉ እንጀትስ። እ አሶረ ካዋ ቦላ ማካልድ፥ እያዉ ሃረቶና እፅስ። 8 እ፥ ፍልስፄመ አሳ ኦልድ ጉ ሞታፐ ብድ፥ ግታ ካታማ ጋካናዉ፥ ጋዛነ እያ ዩሾን ደእያ ቢታት አቶና ኤንቲ ደእያ በሳታ ኡባ ፆንስ።
9 ካዎይ ህዝቅያስ ካዎትዳ ኦይዳን ላይን፥ ኤላ ናአይ እስራኤለ ካዎይ፥ ሆሰይ ካዎትዳ ላፑን ላይን፥ አሶረ ካዎይ ሳልምናሶር እስራኤለ ቦላ ደንድድ፥ ሳማረ ካታማ ተቅስ። 10 ሄን ላይ ሳማረ ካታማ ፆንስ። ያትን፥ ህዝቅያስ ካዎትዳ ኡሱፑን ላይን፥ እስራኤለ ካዎይ ሆሰይ ካዎትዳ ኡዱፉን ላይን፥ ሳማረ ካታማይ ፆነትስ። 11 አሶረ ካዎይ እስራኤለ አሳ አሶረ ቢታ ኤፍድ፥ ኤንታፈ ባጋ አላሀንነ አቦራ ካታማታን፥ ባጋ አጎዛ ሻፋ ማታን ባጋ ቃስ ሜዶና ካታማታን ዎስ። 12 ሄስካ ኤንቲ ጎዳስ ባንታ ፆሳስ ኪተቶና እፅድ፥ ጎዳ ጫቁዋ፥ ጎዳ አይለይ፥ ሙሰይ ኪትዳ ኪታ ኡባ መንዳ ግሾሳ። ኤንቲ እያ ኪታ ስአናዉነ ኪተታናዉ ኮይቦኮና።
አሶረ ማንደ
(2 ታር 32:1-19፤ እሳ 36:1-22)
13 ካዎይ ህዝቅያስ ካዎትዳ ታማነ ኦይዳን ላይን፥ አሶረ ካዎይ ሳናክሬም ግምበትዳ ይሁዳ ካታማታ ኡባ ኦልድ ኦይክስ። 14 ያትን፥ ይሁዳ ካዎይ ህዝቅያስ ላክሶ ካታማን ደእያ አሶረ ካዋ ሳናክሬማስ ኪታ የድድ፥ "ታኒ ባላስ፤ ሀያና ታ ቢታ የዳዳ ከያ። ኔኒ ታና ኦይችዳባ አይባካ ታ ነዉ እማና" ያግስ።
አሶረ ካዎይ፥ ይሁዳ ካዋ ህዝቅያሳኮ፥ "ኔኒ 10,000 ክሎ ግራመ ብራነ 1,000 ክሎ ግራመ ዎርቃ ታዉ የዳ" ያግስ። 15 ህዝቅያስ ፆሳ ኬን፥ ካዎ ጋን ሻሎ ምንጅያ በሳን ደእያ ብራ ኡባ እያዉ የድስ። 16 ሄ ዎደ ይሁዳ ካዎይ ህዝቅያስ፥ ፆሳ ኬ ፐንግያ ሳንቃታ ትይዳ ዎርቃነ እ ባ ሁጰን ፐንገ ቱቀታ ትይዳ ዎርቃ ቃርድ፥ አሶረ ካዋስ የድስ።
17 አሶረ ካዎይ፥ ታርታና፥ ራፌሳነ ራስፋቅሳ ጌተትያ ሄ ቶራ ሞጮናታ፥ ዳሮ ኦላንቾታራ ላክሶ ካታማፐ ካዋ ህዝቅያሳኮ የሩሳላመ የድስ። ኤንቲ ብድ፥ የሩሳላመ ጋክድ፥ ማኦ ሜጭያ አድያ ጋደ ኤፍያ ኦግያፐ ቆሞ ባጋራ ደእያ፥ ዳጋትዳ ሃይ ጎግያ ዛራ ላንቀን ኤቅዶሶና። 18 ኤንቲ ካዋ ፄግን፥ ካዎ ጋ አዋተን አይስያ ካልቀ ናአይ ኤልያቄም፥ ዋና ፃፈይ ሳምናስነ አሳፋ ናአይ ታርከ ፃፈይ ዮኣስ እያኮ ካረ ከይዶሶና።
19 አሶረታ ሀላቃይ፥ "ህዝቅያሳስ ሀይሳዳ ያግድ ኦድተ። አሶረ ካዎይ፥ ዎልቃማይ ነና ሀይሳዳ ያጌስ፤ ‘ኔኒ አይብን አማነታዲ? 20 ኦላ ኦለታናዉ ነዉ ጭንጫተነ ዎልቅ ደኤስ ያጋሳ። ሽን ኔኒ አይብን አማነታዳ ታ ቦላ ሀይሳ ማካላዲ? 21 ሄኮ፥ ኔኒ ግብፀ ካዎይ ማዳና ጋዳ ቆፕያባ ግድኮ፥ መቅዳ ማይረ ፃምአን ካትያ አሳ መላ። ፃምአይ መቅን፥ ፕንጮይ ኩሸ ጫደስነ ማዱንፅሴስ። ግብፀ ካዎይ ባናን አማነትያ አሳ ኡባስ ሄሳ መላ’ " ያግስ።
22 ሽን ኔኒ፥ "ኑኒ ጎዳን ኑ ፆሳን አማነቶስ" ያግኮ፥ ህዝቅያስ፥ ይሁዳ አሳነ የሩሳላመ አሳ፥ "ህንተ የሩሳላመን ደእያ ያርሾ በሳን ጎይናናዉ ኮሼስ" ግድ፥ ቃ ጎይኖ በሳታነ ያርሾ በሳታ ድግዳይ እያ ግደኔ?
23 ሀእ ሃያ፤ ታ ጎዳ አሶረ ካዉዋራ ማንደታ። ኔኒ ቶጋናዉ ዳንዳእያ፥ ግድያ አስ ደምኮ፥ ናምኡ ሙኩሉ ፓራታ ታኒ ነዉ እማና። 24 ኔኒ፥ "ግብፀት ፓራ አሳታነ ፓራ ጋረታ ታዉ የዳና" ጋዳ አማንኮ፥ ታ ጎዳ ቶራ ሞጮናታፐ እስ ጉካ ዛራናዉ ዳንዳአካ። 25 ሄሳ ቦላ ቃስ፥ ታኒ ሀእ ቱማ ጎዳ ኪት ባይና ሀ ቢታ ይሳናዉ ኮያድና? ጎዳይ ባ ሁጰን ታና፥ "ሄ ቢታ ባዳ፥ ኦላዳ ይሳ" ያግስ።
26 ሄሳፈ ጉየ፥ ካልቀ ናአይ ኤልያቄም፥ ሳምናስነ ዮኣስ አሶረታ ቶራ ሞጮናኮ ሀይሳዳ ያግዶሶና፤ "ኑኒ ብርሸ ኤርያ ግሾ፥ ሀያና ኑስ ነ አይለታስ አራምከ ዶናን ኦዳ። ድርሳ ግምብያ ሁጰ ሶን ደእያ አሳይ ስኦና መላ፥ እብራወ ዶናን ኦዶፓ" ያግዶሶና። 27 ሽን ቶራ ሞጮናይ ዛሪድ፥ "ሀ ቃላ ታኒ ህንተዉነ ህንተ ጎዳ ፃላላስ ኦዳናዉ ታ ጎዳይ ታና ኪትደዬ? ህንተራ እስፈ ባንታ ሽአ ማናዉነ ባንታ ሼሻ ኡያናዉ ደእያ፥ ሀ ድርሳ ግምብያ ቦላ ኡትዳ አሳ ኡባሳ ግደነዬ?" ያግስ።
28 አሶረ ቶራ ሞጮናይ ደንድ ኤቅድ፥ ባ ቃላ ቁ ኦድ፥ እብራወ ዶናን ሀይሳዳ ያግስ፤ "አሶረ ካዎይ ዎልቃማይ ህንተና ግያባ ስእተ! 29 ካዎይ ህንተኮ ሀይሳዳ ያጌስ፤ ‘ህዝቅያስ ህንተና ጭሞፎ፤ እ ህንተና ታ ኩሸፐ ከስ ኤካናዉ ዳንዳኤና። 30 ጎዳይ ቱማ ኑና አሻና፤ ሀ ካታማይካ አሶረ ካዋ ኩሸን ገለና’ ያግድ ህንተ ጎዳን አማነታና መላ ኦፎ" ያጌስ።
31 ህንተ ህዝቅያስ ኦድያባ ስኦፕተ። አሶረ ካዎይ፥ "ታራ ስገትተ፤ ሃ ታኮ ከይተ። ህንተ ኡባይ ህንተ ዎይንያፐነ ህንተ ባላስያፐ ማና፤ ህንተ ቦክዳ ኦላፈ ሃ ኡያና። 32 ታኒ ያዳ፥ ህንተና ህንተ ቢታ ዳንያ ቢታ ኤፋና። ሄ ቢታይ ካነ ዎይነይ፥ ኡይነ ዎይነ ጋደይ ኩምዳ ቢታ፤ ሻማሆ ዛይተይነ ኤስ ኩምዳ ቢታ። ህንተ ታዉ ኪተትኮ፥ ደኦን ዳና፤ ሀይቀከታ። ህዝቅያስ፥ ‘ጎዳይ ኑና አሻና’ ያግድ ህንተና ጭመይሳ ስኦፕተ። 33 ሀራ ካዎተታ ፆሳታፐ ባ ቢታ አሶረ ካዋ ኩሸፐ አሽዳ ፆሲ ደኢ? 34 ሀማታ ፆሳትነ አርፋዳ ፆሳት አዉን ደኦና? ሳፋርዋይማ፥ ሄናነ እዋ ፆሳት አዉን ደኦና? ኤንቲ ሳማረ ታ ኩሸፐ ከስ ኤክዶና? 35 ሀ ቢታታ ፆሳታ ኡባ ግዶን፥ ባ ቢታ ታ ኩሸፐ አይ ፆሲ አሽዳሽን፥ ጎዳይ የሩሳላመ ታ ኩሸፐ አሻኔ?" ያግስ።
36 ካዎይ ካሰ፥ "ኤንታዉ አይኮካ ዛሮፕተ" ያግድ ኦድዳ ግሾ፥ አሳይ እስ ቃላካ ዛሮና ስእ ግዶሶና። 37 ካልቀ ናአይ ካዎ ጋ አዋተን አይስያ ኤልያቄም፥ ዋና ፃፈይ ሳምናስነ ታርከ ፃፈይ አሳፋ ናአይ ዮኣስ ባንታ ማኡዋ ዳክድ፥ ህዝቅያሳኮ ብድ፥ አሶረታ ቶራ ሞጮናይ ግዳባ ኡባ እያዉ ኦድዶሶና።