ይሁዳ ካዋ እዮኣሳ
(2 ታር 24:1-16)
1 እዩይ፥ እስራኤለ ቢታን ካዎትዳ ላፑን ላይን፥ እዮኣስ ይሁዳን ካዎትስ፤ እ የሩሳላመን ኦይታሙ ላይ ካዎትስ። እያ አየ ሱንይ ሳቦ፤ እያ በርሳበ ማጫስ። 2 ካህነይ ዮዳሄይ፥ እያ ታማርስዳነ ዞርዳ ግሾ፥ እ ደእዳ ላይ ኡባን እዮኣስ ጎዳ ስንን ሱረባ ኦስ። 3 አሳይ ሄ በሳን ያርሾነ እፃነ ጩይሰ አግቦና ግሾ፥ ቃ ጎይኖ በሳታ ይስቤና።
4 እዮኣስ ካህነታ ፄግድ፥ "ፆሳ ኬ ያ ጌሻ ሚሸ ኡባ ሺሽተ። ሄስካ ሁጰ ታይቡዋ ዎደ እመትያ ሚሽያነ አሳይ ባ ሸነን ፆሳ ኬ ኤህያ ሚሽያ።12:4 ከሳ 30:11-16. 5 ካህነት ኡባይ ሄ ሚሽያ ኤህያ አሳፐ ባንታ ግሹዋ ግሹዋ ኤክድ፥ ፆሳ ኬ ግዶን ኢትዳ ኡባ ሎይና" ያግስ።
6 ሽን ካዎይ እዮኣስ ካዎትዳ ላታማነ ሄን ላይ ጋካናዉ፥ ካህነት ፆሳ ኬ ኦራቦኮና። 7 ካዎይ እዮኣስ ካህንያ ዮዳሄነ ሀራ ካህነታ ፄግድ፥ "ፆሳ ኬ ግዶን ኢትዳ በሳታ አይስ ኦራከቲ? ሚሸ ፆሳ ኬ ኦራናዉ እምተፐ አትሽን፥ ህንተዉ እመትያ ሚሽያ ህንተ ኩሸን ኦይኮፍተ" ያግስ።
8 ካህነት፥ "አሳፐ ሀራ ሚሸ ኤኮኮ፤ ፆሳ ኬ ግዶን ኢትዳ በሳ ኦራና" ያግድ ዛርዶሶና።
9 ያትን፥ ካህንያ ዮዳሄይ እስ ሳፅነ ኤክድ፥ እያ ካማ ሉክድ፥ ያርሾ በሳ ማታን ፆሳ ኬ ገልያ ፐንግያ ኡሻቻ ባጋራ ዎስ። ፐንግያ ናግያ ካህነት ፆሳ ኬ ይዳ ሚሽያ ኡባ ሳፅንያን የጎሶና። 10 ኤንቲ ሳፅንያን ዳሮ ሚሸይ ዳጋየትዳይሳ በእዳ ዎደ ኡባን፥ ካዎ ፃፈይነ ካህነ ሀላቃይ ይድ፥ ሚሽያ ታይብድ፥ ካርፂታን ቆሎሶና።
11 ታይበትዳ ሚሽያ ሳላእዳፐ ጉየ፥ ፆሳ ኬ ኦሱዋ ፄላና መላ ሱንትዳ አሳስ እሞሶና። ኤንቲ ሚሽያ ኤክድ፥ ፆሳ ኬን አናፀታስነ ግምበይሳት እሞሶና። 12 ሚሽያ ሹቹ ማሰይሳታስነ ቆኤይሳታስ ቃንፃናዉ፥ ፆሳ ኬ ኦራናዉ፥ ሳንቃ፥ ሹቹነ ኮሽያ ሀራባታ ሻማናዉ ጎኤቶሶና። 13 ፆሳ ኬ ይዳ ሚሽያፐ ፆሳ ኬ ብራ ቡርጩኮታ፥ ቃጰታ፥ ከረታነ ሞይዘታ ዎይኮ ዎርቃነ ብራ ሚሸታ ኦናዉ ከስቦኮና። 14 ሄ ሚሸ ኡባይ ፆሳ ኬ ኦራያ አሳስ ቃንፀትስ። 15 ፆሳ ኬ ኦሱዋ ፄላናዉ ሱንትዳ አሳት አማነትዳ አስ ግድዳ ግሾ፥ "ሚሽያን አይ አይ ኦደቲ?" ያግድ ኦይችዳ አስ ኦንካ ባዋ።12:15 2 ካዎ 22:7. 16 ናቆ ያርሾነ ናጋራ ያርሾስ ቃንፀትያ ሚሸይ ካህነታስ ገለስፐ አትሽን፥ ፆሳ ኬ ኦራያ ሚሸ ሳፅንያን ገለና።12:16 ሌወ 7:7.
17 ሄ ዎደ አራመ ካዎይ አዛሄል ብድ፥ ጋተ ካታማ ኦልድ ኦይክስ። ካልድ የሩሳላመ ኦላናዉ ስምስ። 18 ሽን ይሁዳ ካዎይ እዮኣስ እያፐ ካሰ ካዎትዳ ይሁዳ ካዎት እዮሳፈፅ፥ እዮራምነ አካዝያስ ጎዳስ ዱማይዳ ሚሸታ፥ ባ እሞታ፥ ፆሳ ኬ እሞታነ ካዎ ጋ ሻሎ ምንጅያ በሳን ደእያ ዎርቃ ኡባ ኤክስ። አራመ ካዋስ አዛሄላስ የድን፥ አዛሄል የሩሳላመ ኦላናዉ ደንዶይሳ አጋግስ።
19 ካዎይ እዮኣስ ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 20 ሄሳፈ ጉየ፥ እያ ሞርናት እያ ቦላ ማቀትድ፥ ሲላ ኤፍያ ኦግያን ሚሎ ጌተትያ ኬን ዎዶሶና። 21 እያ ዎዳ ኦሳንቾት ስምአታ ናኣ ዮዛካራነ ሾሜራ ናኣ ዮዛባታ። እዮኣስ ዳዊቲ ካታማን ባ ማይዛታ ዱፎን ሞገትስ፤ እያ በሳን እያ ናአይ አማስያስ ካዎትስ።