2 ካዎታ ማፃፋ 24

1 እዮአቄማ ዎደ ባብሎነ ካዎይ ናቡካዳናፆር ይሁዳ ቦላ ደንድስ። እዮአቄም እያዉ ሄ ላይ ሃረትዳፐ ጉየ፥ ናቡካዳናፆራ ቦላ ማካልስ።✝24:1 ኤርም 25:1-38፤ ዳነ 1:1-2. 2 ጎዳይ ካልዳወታ ፓኖታ፥ ሶረ ፓኖታ፥ ሞአበ ፓኖታነ አሞነ ፓኖታ እዮአቄማ ቦላ የድስ፤ ባ አይለታ ናበታ ባጋራ ጎዳይ ካሰ ኦድዳይሳዳ፥ ይሁዳ ቢታ ይሳናዳ ሀይሳታ የድስ። 3 ካዎይ ምናሰይ ኦዳ ናጋራ ጋሶን ጎዳይ ይሁዳ አሳ ባ ስንፈ ድጋናዉ ሀ ዩዋ የድስ። 4 እ ፅሎ አሳ ሱ ጉስድ፥ የሩሳላመን ኩንዳ ግሾ፥ ጎዳይ ምናሰስ ሄ ናጋራ አቶ ጋናዉ ኮይቤና።

5 እዮአቄም ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 6 እዮአቄም ሀይቅድ፥ ባ ማይዛታ ጋክስ፤ እያ በሳን እያ ናአይ ዮአክን ካዎትስ። 7 ግብፀ ካዎይ ናምአን ባ ቢታፈ ደንድድ፥ ኦላስ ይቤና፤ ግብፀ ሻፋፐ ዶምድ፥ ብድ ኤፍራፂሳ ሻፋ ጋካናዉ፥ ግብፀ ካዎይ ሃርዳ ቢታ ኡባ ባብሎነ ካዎይ ኤክስ።

ይሁዳ ካዋ ዮአክና

8 ዮአክን ካዎትያ ዎደ ላይ እያዉ ታማነ ሆስፑና፤ ዮአክን፥ የሩሳላመን ሄ አጌና ካዎትስ። እያ አየ ሱንይ ናስታ፤ እያ የሩሳላመ አድያ ኤልናታና ናአ። 9 ዮአክን ባ አዋይ ኦዳይሳዳ፥ ጎዳ ስንን ኢታባ ኦስ።

10 ሄ ዎደ ባብሎነ ካዋ ናቡካዳናፆራ ኦላንቾት የሩሳላመ ይድ፥ ካታማ ተቅዶሶና። 11 ባብሎነ ካዎይ ናቡካዳናፆር ሄ ካታማ ይስ። 12 ይሁዳ ካዎይ እዮአክና፥ እያ አይያ፥ እያ አይለት፥ እያ ሀላቃትነ ካዎ ጋ ሹማት ኡባይ ባብሎነ ካዋስ ኩሸ እምዶሶና።✝24:12 ኤርም 22:24-30፤ 24:1-10፤ 29:1-2.

ዮአክን ካዎትዳ ሆስፑን ላይን፥ ባብሎነ ካዎይ ዮአክና ቃችስ። 13 ፆሳ ኬነ ካዎ ጋን ደእያ ሻሉዋ ኡባ ሄ በሳፈ ደንድ ኤፍስ። ጎዳይ ካሰ ኦድዳይሳዳ ካዎይ ሶሎሞነይ ፆሳ ኬን ጊግስዳ ዎርቃ ሚሸታ ኡባ ባብሎነ ካዎይ ቃንፀረስ። 14 ናቡካዳናፆር የሩሳላመ አሳ፥ ሀላቃታ ኡባ፥ ኦላንቾታ ኡባ፥ ኩሸ ሂላንቾታነ ብራታ ቆፀይሳታ ኡባ፥ 10,000 አሳ የሩሳላመፐ ድእድ ኤፍን፥ ቢታን ማንቆ አሳ ፃላል አትስ።

15 ናቡካዳናፆር እዮአክና ድእድ፥ እያ አይዉ፥ እያ ማቸታ፥ እያ ሞርናትነ ቢታን ደእያ ግታ አሳ ኡባ ባብሎነ ኤፍስ።✝24:15 ህዝ 17:12. 16 ሄ አሳፐ 7,000 አሳት ኦላንቾታ፤ 1,000 አሳት ዱማ ዱማ ኩሸ ሂላንቾታ፤ ኤንቲ ኡባይ ምኖነ ኦላ ኦለታናዉ ዳንዳኤይሳታ። 17 ሄሳፈ ጉየ፥ ባብሎነ ካዎይ ዮአክና በሳን እያ አዋ እሻ ማታና ካዎስ፤ እያ ሱን ሰደቅያሳ ያግድ ላምስ።✝24:17 ኤርም 37:1፤ ህዝ 17:13.

ይሁዳ ካዋ ሰደቅያሳ

18 ሰደቅያስ ካዎትያ ዎደ፥ ላይ እያዉ ላታማነ እስኖ፤ እ ታማነ እስ ላይ የሩሳላመን ካዎትስ። እያ አየ ሱንይ አምፃሎ፤ እያ ልባና ካታማን ደእያ ኤርምያሳ ናአ።✝24:18 ኤርም 27:1-22፤ 28:1-17. 19 እዮአቄም ኦዳይሳዳ፥ ሰደቅያስ ጎዳ ስንን ኢታባ ኦስ። 20 ጎዳይ ሀንቀትዳ ግሾ፥ የሩሳላመ አሳ ቦላነ ይሁዳ አሳ ቦላ ሀይስ ሀንስ፤ ዉርሰን ኤንታ እ ባ ስንፈ ድግስ።

ሰደቅያስ ባብሎነ ካዋ ቦላ ማካልስ።✝24:20 ህዝ 17:15.