2 ካዎታ ማፃፋ 2

ኤልያስ ሳሎ ኤከትስ

1 ጎዳይ ኤልያሳ ጎተን ሳሎ ኤፋናዉ ሀንያ ዎደ፥ ኤልያስነ ኤልስ ጋልጋላፐ ደንድድ ብዶሶና። 2 ኤልያስ ኤልሳኮ፥ "ጎዳይ ታና ቤተለ ኪትዳ ግሾ፥ ሀያና ኔኒ ሀይሳን ጋምኣሻ" ያግስ።

ሽን ኤልስ፥ "ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ" ያግስ። ኤንቲ ዱገ ቤተለ ዎዶሶና።

3 ቤተለን ደእያ ናበታ ጩጋይ ኤልሳኮ ከይድ፥ "ጎዳይ ሀች ነ ጎዳ ኔፐ ሻክድ ኤፋና ሀነይሳ ኤራይ?" ያግድ ኦይችዶሶና።

ኤልስ፥ "ኤ ኤራይስ፤ ሽን ህንተ ስእ ጊተ" ያግድ ዛርስ።

4 ኤልያስ ኤልሳኮ፥ "ጎዳይ ታና እያርኮ ኪትዳ ግሾ፥ ሀያና ኔኒ ሀይሳን ጋምኣሻ" ያግስ።

ሽን ኤልስ፥ "ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ" ያግድ ዛርስ። ሄሳ ግሾ፥ ኤንቲ እያርኮ ብዶሶና።

5 እያርኮን ደእያ ናበታ ጩጋይ ኤልሳኮ ከይድ፥ "ጎዳይ ሀች ነ ጎዳ ኔፐ ሻክድ ኤፋና ሀነይሳ ኤራይ?" ያግድ ኦይችዶሶና።

እ፥ "ኤ ኤራይስ፤ ሽን ህንተ ስእ ጊተ" ያግድ ዛርስ።

6 ኤልያስ ኤልሳኮ፥ "ጎዳይ ታና ዮርዳኖሰ ሻፋ ኪትዳ ግሾ፥ ሀያና ኔኒ ሀይሳን ጋምኣሻ" ያግስ።

ኤልስ፥ "ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ" ያግስ። ኤንቲ ናምአይ እስፈ ብዶሶና።

7 ናበታፐ እሻታሙ አሳት ኤንታ ካልድ፥ ዮርዳኖሰ ሻፋ ጋካናዉ ብዶሶና። ኤልያስነ ኤልስ ሻፋ ዶናን ኤቅዳሽን፥ ናበት ኤንታፈ ጉ ሃክድ ኤቅዶሶና። 8 ሄ ዎደ ኤልያስ ባ አፍላ ኤክድ ፃፅድ፥ እያራ ሃ ሾጭን፥ ሃይ ያነ ሃነ ሻከትን መላ ቢታራ ፕንዶሶና። 9 ኤልያስ ኤልሳኮ፥ "ታኒ ኔፐ ኤከታናፐ ስን፥ ነዉ አይ ኦና መላ ኮያይ?" ያግስ።

ኤልስ፥ "ነ አያናይ ታ ቦላ ናምኡ ኩሸ ግዳና መላ፥ ታኒ ነና ዎሳይስ" ያግድ ዛርስ።

10 ኤልያስ፥ "ኔኒ ዋይስያ ኦይሾ ኦይቻዳሳ። ሽን ታኒ ኔፐ ኤከትያ ዎደ ኔኒ ታና ፄልያባ ግድኮ፥ ሄስ ነዉ ሀናና። ነ በኦና እፅኮ ሀነና" ያግስ።

11 ኤንቲ እስፈ ኦደትሸ ሄመትሽን፥ ታማ ፓራትነ ታማ ጋረት ኤንታ ናምኣፈ ግዶን ገልድ፥ ሻክስ። ኤልያስ ጎተን ሳሎ ከይስ። 12 ኤልስ ሄሳ በእድ፥ "ታ አዋዉ፥ ታ አዋዉ! እስራኤለ ፓራቶነ ፓራ ጋረቶ!" ያግድ ዋስስ። ሄሳፈ ስምን፥ እ ኤልያሳ ዛሪድ በእቤና።

ኤልስ አዛንድ፥ ባ ማኡዋ ናምአ ከስድ፥ ዳክስ። 13 ኤልያሳፐ ዎዳ ማኡዋ ደንድ፥ ጉየ ስሚድ፥ ዮርዳኖሰ ሻፋ ዶናን ኤቅስ። 14 ኤልያሳፐ ዎዳ ማኡዋ ኤክድ፥ እያራ ሃ ሾጭድ፥ "ጎዳይ ኤልያሳ ፆሳይ አዉን ደኢ?" ያግስ። ኤልስ ሃ ሾጭዳ ዎደ፥ ሃይ ያነ ሃነ ሻከትን፥ ሻፋ ፕንስ።

15 እያርኮ ይዳ ናበታ ጩጋይ ኤልሳ በእዳ ዎደ፥ "ኤልያሳ አያናይ ኤልሳ ቦላ ሸምፕስ" ያግዶሶና። ኤንቲ እያራ ጋሄታናዉ ይድ፥ እያ ስንን ጉፋንዶሶና። 16 ኤንቲ፥ "ኑኒ ነ አይለት እሻታሙ ምኖ አሳት ሀይሳን ደኦስ። ሀያና ኑኒ ነ ጎዳ ኮያናዉ ባና። ኦን ኤር፥ ጎዳ አያናይ እያ ኤክድ፥ እስ ዙማ ሁጰን ዎይኮ ዛንጋራ ግዶን የጎና አገና" ያግዶሶና።

ኤልስ፥ "አካይ፥ ቦፕተ" ያግስ። 17 ሽን አካይ ጉሳይ እያ ዬላያና ጋካናዉ፥ ኤንቲ እያ ዎስድ አጎና እፅን፥ "ቢተ" ያግስ። ኤንቲ እሻታማይ ብድ ሄ ጋላስ ኩመ ኮይድ፥ እያ ደምቦኮና። 18 ኤልስ እያርኮን ደእሽን፥ ኤንቲ እያኮ ስሚድ ይዶሶና። እ፥ "ታኒ ህንተና ‘ቦፕተ’ ያጋብክና?" ያግስ።

19 ሄሳፈ ጉየ፥ እያርኮን ደእያ አሳት ኤልሳ፥ "ኔኒ ኑ ጎዳይ በኤይሳዳ ሀ ካታማይ ዱሳስ ሎኦ። ሽን ሃይ ኢታ፤ ቃስ ቢታይካ አይፈና" ያግዶሶና።

20 እ፥ "አነ ኦራ ከረን ማፅነ የግድ፥ ኤክ ዪተ" ያግድ ኪትን፥ እያዉ ኤህዶሶና። 21 ኤልስ ፑልቱዋኮ ብድ፥ ማፅንያ እያን የግድ፥ "ጎዳይ፥ ‘ታኒ ሀ ሃ ፓስ፤ ህዛፐ ሀ ሃይ ሀይቆስ ጋሶ ግደና፤ ቢታይካ አይፋና’ ያጌስ" ያግስ። 22 ኤልስ ኦድዳይሳዳ ሀች ጋካናዉ፥ ሄ ሃይ ፅሎ ግድስ።

23 ኤልስ ያፐ ደንድድ፥ ፑደ ቤተለ ከይስ። እ ኦገ ቦላ ደእሽን፥ ያላጋ አደ ናይት ካታማፐ ከይድ፥ "ላ ሀ ቦአዉ፥ ከያ! ላ ሀ ቦአዉ፥ ከያ" ያግድ እያ ቀልቅስዶሶና።

24 ኤልስ ጉየ ስም ፄልድ፥ ኤንታ ጎዳ ሱንን ባድስ። ያትን፥ ናምኡ ማጫ ባባንት ከይድ፥ ናይታፐ ኦይታማነ ናምኡ ያላጋታ ፑዘረድ ዎዶሶና። 25 ኤልስ ያፐ ደንድድ፥ ቃርመሎሳ ዙማ ቦላ ከይስ፤ ያፐ ቃስ ሳማረ ስምስ።