2 ካዎታ ማፃፋ 16

ይሁዳ ካዋ አካዛ

1 ራማላ ናአይ ፓቁሄይ ካዎትዳ ታማነ ላፑን ላይን፥ እዮአታማ ናአይ አካዝ ይሁዳን ካዎትስ። 2 እ ካዎትያ ዎደ ላይ እያዉ ላታማ፤ የሩሳላመን ታማነ ኡሱፑን ላይ ካዎትስ። እያ ማይዛይ ዳዊቲ ሱረባ ኦዳይሳዳ፥ ጎዳ ባ ፆሳ ስንን ሱረባ ኦቤና። 3 እ ካሰ ደእዳ እስራኤለ ካዎታ ኦግያን ሄመትስ። ቃስ ጎዳይ እስራኤለ አሳ ስንፈ ጎድድ ከስዳ አሳታ ዎጋ፥ እፀትዳ ኦግያ ካልድ፥ ባ አደ ናኣ ታማራ አድ ያርሽስ።✝16:3 ዛረ 12:31፤ 18:10. 4 አካዝ ቃ ጎይኖ በሳታን፥ ዙማታ ቦላነ ዳሻ ምታ ኡባ ጋርሳን ያርሾ ያርሽስ፤ እፃነ ጩይስስ።

5 ሄሳፈ ጉየ፥ አራመ ካዎይ ራአሶንነ ራማላ ናአይ፥ እስራኤለ ካዎይ ፓቁሄይ የሩሳላመ ኦላናዉ ይድ ተቅዶሶና፤ ሽን አካዛ ፆናናዉ ዳንዳእቦኮና።✝16:5 እሳ 7:1. 6 ሄ ዎደ አራመ ካዎይ ራአሶን ኤላታ ካታማ ዛር ኤክድ፥ ይሁዳ አሳ ጎድድ ከስስ። ያትን ኤዶመ አሳት ኤላታ ካታማ ይድ፥ ሀች ጋካናዉ ያን ደኦሶና።

7 ሄሳ ግሾ፥ አካዝ አሶረ ካዋ ተልገልተልፈልሶራኮ ኪታ የድድ፥ "ታኒ ነ ናአነ ነ አይለ። ሀያና ሃያ፤ ታና ኦልያ አራመ ካዋ ኩሸፐነ እስራኤለ ካዋ ኩሸፐ አሻ" ያግስ። 8 ቃስ አካዝ ፆሳ ኬነ ካዎ ጋን ሻሎ ምንጅያ በሳን ደእያ ብራነ ዎርቃ ኤክድ፥ አሶረ ካዋስ እሞታ ኦድ የድስ። 9 አካዛ ኦይሻ ኤክድ፥ አሶረ ካዎይ ዳማስቆ ካታማ ኦል ኦይክድ፥ አሳ ድእድ፥ ቂራ ኤፍስ፤ ካዋ ራአሶናካ ዎስ።

10 ካዎይ አካዝ አሶረ ካዋ ተልገልተልፈልሶራራ ጋሄታናዉ ዳማስቆ ብስ። ዳማስቆን ደእያ ያርሾ በሳ በእድ፥ እያ ዳንያ ያርሾ በሲ ኬፃና መላ፥ ሄ ያርሾ በሳ ምስልያነ ኬፅያ ሀኖታ ካህንያ ኡራያ ኪትስ። 11 ካዎይ አካዝ ዳማስቆፈ ስሚድ ያናስ፥ ካህነይ ኡራይ እያ ዳንያ ያርሾ በሲ ጊግስስ።

12 ካዎይ ዳማስቆፈ ስምዳ ዎደ፥ ያርሾ በሳይ ኦሰትድ ፖለትዳይሳ በእድ፥ ያርሾ በሳኮ ሺቅድ፥ 13 ፁሳ ያርሾነ ካ ያርሾ ያርሽስ። ቃስ ኡሻ ያርሹዋ ጉስስ፤ እስፈተ ያርሾ ሱካ ያርሾ በሳ ቦላ ርጭስ። 14 ናሰ ብራታፐ ኦሰትድ፥ ጎዳስ ዱማትድ ኡትዳ ያርሾ በሳይ፥ ኦራ ያርሾ በሳፈነ ፆሳ ኬፈ ግዶን ደኤስ። አካዝ ሄ ጋልአ ያርሾ በሳ ደንድ፥ ባ ኦስስዳ ኦራ ያርሾ በሳፈ ፑደሀ ባጋን ዎስ።✝16:14 ከሳ 27:1-2፤ 2 ታር 4:1.

15 ካዎይ አካዝ ካህንያ ኡራያ ሀይሳዳ ያግድ ኪትስ፤ "ሀ ግታ ያርሾ በሳን ዎንታ ፁሳ ያርሾ፥ ኦማርስ ሺሽያ ካ ያርሾ፥ ካዎይ ሺሽያ ፁሳ ያርሾነ ካ ያርሾ፥ አሳ ኡባይ ሺሽያ ፁሳ ያርሾ፥ ካ ያርሹዋነ ኡሻ ያርሹዋ ያርሾ በሳን ሺሻ። ናሰፐ ኦሰትዳ ሀንኮ ያርሾ በሳ ታኒ ታዉ ኦይችያ በሲ ኦና" ያግስ። 16 ኡራይ ካዎይ አካዝ ኪትዳይሳዳ ኦስ።

17 ካዎይ አካዝ ፆሳ ኬ ግዶን ጎኤትያ፥ ናሰ ብራታፐ ኦሰትዳ ጋረታ ሎቸ ብራታ ቃንፅድ፥ ምየፐ ድግድ ሜጨትያ ከረታ ጋረታ ቦላፈ ደንስ። ቃስ ግታ ከረታ፥ እያ ዘምፕስዳ ናሰ ብራታ ቦራ ምስለታ ቦላፈ ደንድ፥ ሹቻ ባሱዋ ቦላ ዎስ።✝16:17 1 ካዎ 7:23-39፤ 2 ታር 4:2-6. 18 አሶረ ካዋ ግሾ፥ አካዝ ሳምባታ ጋላስ ፆሳ ኬ ግዶን ካዋ አራታይ ምጨትያ ቁ ግዳ በሳነ ካዎይ ፆሳ ኬ ገልያ ካረ ኦግያ ጎርድድ፥ ዩይ አድ ገላና መላ ኦስ።

19 ካዎይ አካዝ ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 20 አካዝ ሀይቅድ፥ ባ ማይዛታን ጋሄትስ፤ ዳዊታ ካታማን ባ ማይዛታራ ሞገትስ፤ እያ በሳን እያ ናአይ ህዝቅያስ ካዎትስ።✝16:20 እሳ 14:28.