1 አራመ ካዋስ ምኖ ቶራ ሞጮና ግድዳ ንእማን፥ ባ ጎዳን ዳሮ ዶሰትዳነ ቦንቸትዳ አስ። እያ ባጋራ ጎዳይ አራመ ኦላንቾታስ ፆኖ እሚስ። ንእማኔይ ቶራ ቃራ፤ ሽን ጎጋ ሀርገይ እያ ቦላ ደኤስ።

2 እስ ዎደ አራመ ቢታፈ ፓኖት እስራኤለ ቢታ ብድ፥ እስ ማጫ ናአ እስራኤለፐ ድእዶሶና። ሄ ናእያ ንእማነ ማቼስ አይለ ግዳሱ። 3 ሄ ናእያ ባ ጎዳተኮ፥ "ታ ጎዳይ ሳማረን ደእያ ናብያኮ ብዳ ግድያኮ፥ እ ፓፃናሽን" ያጋሱ።

4 ንእማን ባ ጎዳኮ ብድ፥ እስራኤለፐ ይዳ ናእያ ግዳይሳ እያዉ ኦድስ። 5 አራመ ካዎይ ንእማነኮ፥ "ባ፥ ታኒ እስራኤለ ካዋስ ዳብዳበ ፃፋና" ያግስ። ንእማን 3,000 ብራ ሳንትመ፥ 6,000 ዎርቃ ሳንትመ ታሙ ኩመ ማኦ ኤክድ ብስ። 6 እ፥ ኤክድ ብዳ ዳብዳበይ፥ "ሀ ጎጋ ሀርግያፈ ኔኒ ታ አይልያ፥ ንእማነ ፓና መላ ሀ ዳብዳብያራ ታኒ እያ ኔኮ የዳስ" ያግስ።

7 እስራኤለ ካዎይ ዳብዳብያ ናባብዳ ዎደ፥ ባ ማኡዋ ዳክድ፥ "ታኒ እያ ዎናዉነ ፓናዉ ፆሰዬ? ታኒ እስ አስ እያ ጎጋ ሀርገፈ ፓና መላ ሀ አደይ ታኮ አይስ ኪትዴ? እ ታራ ኦየታናዉ ጋሶ ኮየይሳ በእተ" ያግስ።

8 ፆሳ አስ ግድዳ ኤልስ እስራኤለ ካዎይ ባ ማኡዋ ዳክዳይሳ ስእዳ ዎደ አሰ ኪትድ፥ "ነ ማኡዋ አይስ ዳካዲ? እያ ሃ ታኮ የዳ፤ እስራኤለን ናበይ ደኤይሳ ታኒ እያ ኤርሳና" ያግስ።

9 ንእማን ባ ፓራታነ ፓራ ጋረታራ ብድ፥ ኤልሳ ካረን ኤቅስ። 10 ኤልስ፥ "ባዳ ዮርዳኖሰ ሻፋን ላፑን ቶሆ ሜጨታ፤ ነ ሀርግያፈ ኔኒ ፓፃናነ ጌያና" ያግድ ኦዳና መላ ባ አይልያ እያኮ ኪትስ።

11 ሽን ንእማን ሀንቀትድ፥ "እ ታኮ ይድ፥ ጎዳ ባ ፆሳ ሱን ፄግድ፥ ባ ኩሽያ ታ ማዱን ቦላ ዎድ፥ ታና ሀ ጎጋ ሀርግያፈ ፓስ ጋዳ ቆፓስ። 12 ዳማስቆ ሻፋት፥ አባንነ ፋርፋር እስራኤለን ደእያ ሻፋታፐ አኮናዬ? ያትን ታኒ ኤንታን ሜጨታዳ ጌይክና?" ያግድ ሀንቀትድ፥ ጉየ ስምስ።

13 እያ አይለት እያኮ ሺቅድ፥ "ኑ ጎዳዉ፥ ናበይ ግታባ ኦና መላ ነዉ ኦድዳኮ፥ ኔኒ ኦክዬ? እ ነና፥ ‘ባዳ ሜጨታዳ ጌይያ’ ግዳይስ አይስ ዴፅዴ?" ያግዶሶና። 14 እ ዱገ ዎድ፥ ፆሳ አደይ እያዉ ኦድዳይሳዳ ዮርዳኖሰ ሻፋን ላፑን ቶሆ ሙከትድ ሜጨትስ። እያ አሳተይ ናአ አሳተዳ ሀንስ፤ ፓፅድ ጌይስ።

15 ሄሳፈ ጉየ፥ ንእማንነ እያራ ይዳ አሳ ኡባይ ኤልሳኮ ጉየ ብዶሶና። ንእማን እያ ስንን ኤቅድ፥ "ሄኮ፥ እስራኤለ ፆሳፈ አትሽን፥ ሀራ ፆሲ ባይናይሳ ታኒ ሀእ ኤራስ። ሀያና ሀእ ታኒ፥ ነ አይለይ እምያ እሞታ ኤካ" ያግስ።

16 ኤልስ፥ "ታኒ እያዉ ኦያ ጎዳይ ኤርያ መላ፥ ታኒ ኔፐ አይባካ ኤክከ" ያግስ። ኤልስ እሞታ ኤካናዳ ንእማን ዎስን እፅስ።

17 ንእማን፥ "ኔኒ ኤኮና እፅኮ፥ ታዉ ናምኡ ባቁሎ ጫና ቢታ እማና መላ ታኒ ነና ዎሳይስ። ታኒ ነ አይለይ ሀችፈ ዶማዳ ፁሳ ያርሾ ነ ፆሳ ያርሻናፐ አትሽን፥ ሀራ ፆሳታስ ያርሽከ። 18 ሽን ጎዳይ ታዉ ነ አይልያስ እስባ አቶ ጎ። ታ ካዎይ እርሞና ኤቃ ጎይናናዉ ገልያ ዎደ፥ ታንካ እያ አጃባዳ ገላዳ ጎይናናዉ ኮሼስ። ጎዳይ ታዉ ነ አይልያስ ሄሳ አቶ ጎ" ያግስ።

19 ኤልስ፥ "ሳሮ ጋካ!" ያግስ። ንእማን ደንድድ ብስ።

እ ጉ ሃክድ ብሽን፥ 20 ፆሳ አስ ግድዳ ኤልሳ አይለይ ግያዝ፥ "ታ ጎዳይ፥ ኤልስ ሶረ ንእማን ኤህዳባፐ አይባካ ኤኮና ጮ የድስ። ጎዳይ ኤርያ መላ፥ ታኒ እያ ጌዶ ዎፃ ባዳ፥ እያፐ እስባ ኤካና" ያግድ ቆፕስ። 21 ሄሳ ግሾ፥ ግያዝ ንእማነ ካልስ። ባ ጌዶ ዎፅያ ንእማነ በእድ፥ እያራ ጋሄታናዉ ፓራ ጋርያፐ ዎድ፥ "አይበ፥ ሳሮ ግደኔ?" ያግድ ኦይችስ።

22 ግያዝ፥ "አይኮይ ባዋ፤ ሳሮ! ሽን ታና ታ ጎዳይ፥ ‘ደረይ ዳርያ ኤፍሬማ ቢታፈ ናበታ ባጋ ግድዳ ናምኡ ፓንት ታኮ ይዶሶና። ሀያና ኤንታዉ ሄ ሙኩሉ ብራ ሳንትመነ ናምኡ ኩመ ማኦ እማ’ ያግድ ኪትስ" ያግስ።

23 ንእማን፥ "ህዛ ሀያና ኡሱፑን ሙኩሉ ብራ ሳንትመ ኤካ" ያግስ። ንእማን ግያዛ ሾቢድ፥ ብራ ናምኡ ካርፂታን የግድ፥ ናምኡ ኩመ ማኦነ ናምኡ አይለታ ቶስድ፥ ግያዛፐ ስን የድስ። 24 ግያዝ ደእያ ዙማ ኤንቲ ጋክዳ ዎደ፥ ብራነ ማኡዋ ኤንታፈ ኤክድ፥ ሶ ገልስስ። ያትድ ኤንታ ሞይዝን፥ ኤንቲ ብዶሶና።

25 ሄሳፈ ጉየ፥ ሶ ገልድ፥ ባ ጎዳ ኤልሳ ስንን ኤቅስ። ኤልስ፥ "አዉ ባዲ?" ያግድ ኦይችስ።

ግያዝ፥ "ታኒ ነ አይለይ አዉካ ባብከ" ያግድ ዛርስ።

26 ሽን ኤልስ፥ "አደይ ኔራ ጋሄታናዉ ፓራ ጋርያፐ ዎያ ዎደ፥ ታ አያናይ ኔራ ደኤስ ግደኔ? ሀ ዎደይ፥ ሚሸነ ማኦ፥ ዎይኮ ሻማሆነ ዎይነ ጋደ፥ ዎይኮ ዶርሳ ዉደነ ሚዛ ዉደ፥ ዎይኮ አደነ ማጫ አይለ ኤክያ ዎዴ? 27 ሄሳ ግሾ፥ ንእማነ ኦይክዳ ጎጋ ሀርገይ ነናነ ነ ኮቻ ኡባ መርናዉ ኦይካና" ያግስ። ግያዝ ኤልሳ ስንፈ ከይድ ብሽን፥ ሄ ሀርገይ እያ ኦይክን፥ እያ ጎጋይ ሻቻዳ ቦፅስ።