2 ካዎታ ማፃፋ 21

ይሁዳ ካዋ ምናሰ

1 ምናሰይ ካዎትያ ዎደ እያዉ ላይ ታማነ ናምአ፤ እ የሩሳላመን እሻታማነ እቻሹ ላይ ካዎትስ፤ እያ አየ ሱንይ ሄፍሴቦ።

2 ጎዳይ እስራኤለ አሳ ስንፈ ጎድድ ከስዳ አሳታ ደኡዋ ዎጋ ካልድ፥ ምናሰይ ጎዳ ስንን ኢታባ ኦስ። 3 እያ አዋይ ህዝቅያስ ላልዳ፥ ቃ ጎይኖ በሳታ እ ዛረድ ኬፅስ፤ እስራኤለ ካዎይ አካብ ኦዳይሳዳ፥ ባኣለ ፆሳስ ያርሾ በሳታነ አሼራ ፆሰ ምስለታ መስ። ቃስ ሳሎ ፆልንቶታ ኡባ ጎይንስ፤ ኤንታና ሀጋዝስ። 4 ጎዳይ፥ "ታኒ ታ ሱን የሩሳላመን ፄግሳና" ያግድ ኦድዳ ፆሳ ኬን ሀራ ፆሳታስ ያርሾ በሳታ ጊግስስ። 5 ፆሳ ኬን ደእያ ናምኡ ዳባባታን ሳሎ ፆልንቶታ ኡባስ ያርሾ በሳታ ጊግስስ። 6 ባ ናኣ ታማ ግዶራ አስ። እ ባ ሁጰን ብታንቾነ ሙሩንያ አስ ግድድ፥ ማሮታነ ሞይትለታ ዞረ ኦይችስ። ጎዳ ስንን ዳሮ ኢታባ ኦድ፥ እያ ሀንቀስ።

7 ማሰትድ ከይዳ አሼራ ፆሰ ምስልያ ኤህድ፥ ፆሳ ኬ ግዶን ኤስስ። ሄ ፆሳ ኬይ፥ ጎዳይ ዳዊታነ እያ ናኣ ሶሎሞነ፥ "እስራኤለ ዛረ ኡባ ግዶፈ ታኒ ዶርዳ ሀ ፆሳ ኬን የሩሳላመን ታኒ ታ ሱን መርናዉ ፄግሳና። 8 እስራኤለ አሳ ታኒ ኪትዳ ኪታ ኡባነ ታ አይለይ ሙሰይ ኤንታዉ እምዳ ህግያ ኡባ ናግድ ኦኮ፥ ታኒ ኤንታ ማይዛታስ እምዳ ቢታፈ ኤንታ ደንዳ ይስከ" ያግዳ ፆሳ ኬ። 9 ሽን አሳይ ስኦናን እፅስ፤ ጎዳይ እስራኤለ አሳ ስንፈ ይስዳ ሀራ ካዎተታፐ አድ ኢታ ኦና መላ ምናሰይ ኤንታ ባለስ።

10 ጎዳይ ባ አይለ ግድዳ ናበታ ባጋራ ሀይሳዳ ያግስ፤ 11 "ይሁዳ ካዎይ ምናሰይ ሀ ቱና ኦሱዋ ኦስ፤ ባፐ ካሰ ደእዳ አሞረ አሳ ኡባ ናጋራፐ አያ ኢታ ናጋራ ኦስ። ይሁዳ አሳ ባ መዳ ኤቃ ምስልያ ጎይንስድ፥ ናጋራ ኦስስስ። 12 ጎዳይ፥ እስራኤለ ፆሳይ ሀይሳዳ ያጌስ፤ ‘ሄኮ፥ ስእያ አሳ ኡባ ሀይስ ኢትያ ዮ የሩሳላመ ቦላነ ይሁዳ ቦላ ኤሀና ሀናይስ። 13 ሳማረ ቦላ የግዳ ዋ ዎዶሩዋ፥ የሩሳላመ ቦላ የጋና፤ አካባ ሶ አሳ ቦላ የድዳ ቱምብያ፥ የሩሳላመ ቦላ የዳና። እስ አስ ከረ ሜጭድ ጉፋንድ መልሰይሳዳ፥ ታኒ የሩሳላመ ቁቻዳ ጉፋንና። 14 ታ አሳፐ አትዳይሳታ ታኒ የጋ አጋና፤ ታኒ ኤንታ ኤንታ ሞርከታ ኩሸን አዳ እማና። ኤንታ ሞርከት ኡባይ ኤንታ ኦይካናነ ቦንቃና። 15 ኤንታ ማይዛት ግብፀፈ ከዮሶፐ ሀች ጋካናዉ፥ ኤንቲ ታ ስንን ኢታባ ኦዳ ግሾነ ታና ሀንቀዳ ግሾ፥ ታኒ ሀይሳ ኦና’ " ያግስ።

16 ምናሰይ ይሁዳ አሳ፥ ጎዳ ስንን ናጋራ ኦስስዳይሳ ቦላ ጉጅድ፥ ፅሎ አሳ ዎስ፤ የሩሳላመ ጋፃፐ ጋፃ ጋካናዉ፥ ሱን ኩንስ።

17 ምናሰይ ሀንዳ ሀራባይ፥ እ ኦዳባይ፥ እ ኦዳ ናጋራይ ይሁዳ ካዎታ ታርከ ማፃፋን ፃፈትስ። 18 ምናሰይ ሀይቅድ፥ ባ ማይዛታን ጋሄትስ፤ ባ ጋዋ ማታን ደእያ ኦዛ ጋደን ሞገትስ፤ እያ በሳን እያ ናአይ አሞን ካዎትስ።

ይሁዳ ካዋ አሞነ

19 አሞን ካዎትያ ዎደ፥ እያዉ ላይ ላታማነ ናምአ፤ እ የሩሳላመን ናምኡ ላይ ካዎትስ። እያ አየ ሱንይ ማሱላሞ፤ እያ ዮፅባ አድያ ሀሩሰ ናአ። 20 እያ አዋይ፥ ምናሰይ ኦዳይሳዳ፥ አሞነይካ ጎዳ ስንን ኢታባ ኦስ። 21 እ ባ አዋይ ሄመትዳ ኦግያን ሄመትስ፤ ባ አዋይ ኦዳ ኤቃታስ እካ ኦስ፤ ኤንታ ጎይንስ። 22 ጎዳ፥ ባ ማይዛታ ፆሳ አግስ፤ ጎዳ ኦግያን እ ሄመትቤና።

23 አሞነ ሹማት እያ ቦላ ማቀትድ፥ ካዎ ጋን እያ ዎዶሶና። 24 ሄሳፈ ጉየ፥ ይሁዳ አሳይ ካዋ አሞነ ቦላ ማቀትዳ ኡባታ ዎዶሶና። አሞነ በሳን እያ ናኣ እዮስያሳ ካዎዶሶና።

25 አሞን ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 26 አሞን ኦዛ ጋደን ባ ዱፉዋን ሞገትስ፤ እያ በሳን እያ ናአይ እዮስያስ ካዎትስ።