1 አካብ ሀይቅዳፐ ጉየ፥ ሞአበ አሳይ እስራኤለ ቦላ ደንድዶሶና።

2 ሄ ዎደ ካዎይ አካዝያስ ሳማረ ካታማ ቦላ ደእያ ፖቅያ ባራንዳፈ ኩንድድ ደሸትስ። ሄሳ ግሾ አሳታኮ፥ "ብድ፥ ታኒ ሀ ሀርግያፈ ፓፃነኮ ፓፆናኮ ኤቅሮና ፆሳ ብኤል-ዘቡላ አነ ኦይችተ" ያግድ ኪትስ።

3 ሽን ጎዳ ኪታንቾይ ተስባ አድያ ኤልያሳ ሀይሳዳ ያግስ፤ "ፑደ ባዳ፥ ሳማረ ካዎይ ኪትዳ አሳታራ ጋሄታዳ፥ ‘ህንተ ኤቅሮና ፆሳ ብኤል-ዘቡላ ኦይቻናዉ ብዳይ፥ እስራኤለን ፆሲ ይነዬ?’ 4 ጎዳይ ሀይሳዳ ያጌስ፤ ‘ካዋዉ፥ ኔኒ ሀይቃናፐ አትሽን፥ ሀ ዝንእዳ ሂፃፐ ደንዳካ’ ያጌስ" ያጋ። ሄሳ ግሾ፥ ኤልያስ ብድ ኤንታዉ ኦድስ።

5 ኪተትዳ አሳት ካዋኮ ጉየ ስምን፥ "አይስ ስምደቲ?" ያግድ ኤንታ ኦይችስ።

6 ኤንቲ፥ "እስ አደይ ኑራ ጋሄታናዉ ይድ፥ ህንተና ኪትዳ ካዋኮ ስሚድ፥ ሀይሳዳ ያግድ ኦድተ። ጎዳይ ኔኮ፥ ‘ኤቅሮና ፆሳ ብኤል-ዘቡላ ኦይቻናዉ ኔኒ አሰ ኪተይ፥ እስራኤለን ፆሲ ይነዬ? ሄሳ ግሾ፥ ኔኒ ሀይቃናፐ አትሽን፥ ሀ ዝንእዳ ሂፃፐ ደንዳካ’ ያጌስ" ያግዶሶና።

7 ካዎይ፥ "ህንተራ ጋሄታናዉ ይድ፥ ሀይሳ ህንተዉ ኦድዳ አደይ አይ መላ አሴ?" ያግድ ኦይችስ።

8 ኤንቲ፥ "እክሰፐ ኦሰትዳ ማኦ ማእድ፥ ባ ፄሳን ዳፎ ዳንጬስ" ያግድ ዛርዶሶና።

ካዎይ፥ "ሄስ ተስባ አድያ ኤልያሳ" ያግስ።

9 ሄሳፈ ጉየ፥ ካዎይ እስ ቶራ ሞጮና እሻታሙ ዎታዳረታራ ኪትስ። ቶራ ሞጭናይ ደረ ሁጰን ኡትዳ ኤልያሳኮ ከይድ፥ "ፆሳ አሶ፥ ካዎይ ነና፥ ዱገ ዎዳ ሃያ" ያጌስ።

10 ሽን ኤልያስ ቶራ ሞጮናኮ፥ "ታኒ ፆሳ አስ ግድኮ፥ ታም ሳሎፐ ዎድ፥ ነናነ ነ ዎታዳረታ ሞ" ያግድ ዛርስ። ታም ሳሎፐ ዎድ፥ እያነ እያ ዎታዳረታ ምስ።

11 ካዎይ ሀራ ቶራ ሞጮና እሻታሙ ዎታዳረታራ ኤልያሳኮ ኪትስ። ቶራ ሞጮናይ ኤልያሳኮ፥ "ፆሳ አሶ፥ ካዎይ ነና ዱገ ዎዳ ሃያ" ያጌስ።

12 ኤልያስ፥ "ታኒ ፆሳ አስ ግድኮ፥ ታም ሳሎፐ ዎድ፥ ነናነ ነ ዎታዳረታ ሞ" ያግስ። ፆሳ ታም ሳሎፐ ዎድ፥ እያነ እያ ዎታዳረታ ምስ።

13 ካዎይ ሄን ሀራ ቶራ ሞጮና እሻታሙ ዎታዳረታራ ኤልያሳኮ ኪትስ። ቶራ ሞጮናይ ኤልያሳኮ ብድ፥ እያ ስንን ጉልባትድ፥ "ፆሳ አሶ፥ ሀያና ታውነ ታራ ደእያ አሳስ ቃታ፤ ኑ ሸምፑዋ ሀይቆፐ አሻ። 14 ሄኮ፥ ታም ሳሎፐ ዎድ፥ ካሰ ናምኡ ቶራ ሞጮናታነ ኤንታ ዎታዳረታ ምስ። ሽን ሀእ ታዉ ቃታ!" ያግድ ዎስስ።

15 ጎዳ ኪታንቾይ ኤልያሳኮ፥ "ያዮፋ! እያራ ዱገ ዎ" ያግስ።

ኤልያስ ደንድድ፥ እያራ ካዋኮ ዱገ ብስ። 16 "ጎዳይ ሀይሳዳ ያጌስ፤ ‘እስራኤለን ፆሲ ይነ፥ ኔኒ ኤቅሮና ፆሳ ብኤል-ዘቡላ ኦይቻናዉ አሰ ኪትዳይ? ኔኒ ሀይሳ ኦዳ ግሾ፥ ሀይቃና! ነ ዝንእዳ ሂፃፐ ደንዳካ’ " ያጌስ።

17 ኤልያስ ኦድዳ ፆሳ ቃላዳ አካዝያስ ሀይቅስ፤ አካዝያሳስ አደ ናእ ባይና ግሾ፥ እያ እሻይ እዮራም እያ በሳን ካዎትስ። ሄስ ሀንዳይ እዮሳፈፃ ናአይ እዮራም ይሁዳን ካዎትዳ ናምአን ላይና። 18 አካዝያስ ኦዳ ሀራባ ኡባይ እስራኤለ ካዎታ ታርከ ማፃፋን ፃፈትድ ደኤስ።