2 ካዎታ ማፃፋ 17

እስራኤለ ካዋ ሆሰ

1 ይሁዳ ካዎይ አካዝ ካዎትዳ ታማነ ናምአን ላይን፥ ኤላ ናአይ ሆሰይ እስራኤለ ቦላ ሳማረን ካዎትስ፤ እ ኡዱፉን ላይ ካዎትስ። 2 እ፥ ጎዳ ስንን ኢታባ ኦስ፤ ግድኮካ፥ እያፐ ካሰ ደእዳ እስራኤለ ካዎት ኦዳይሳ መላ ኢታባ ኦቤና።

3 አሶረ ካዎይ ሳልምናሶር ይድ፥ እያራ ኦላ ጋሄትን፥ ሆሰይ ፆነትድ፥ እያዉ ጊርስ። 4 ሽን ጉ ላይፈ ጉየ፥ ካዎይ ሆሰይ፥ ግብፀ ካዋ ሰጎራስ ኪታ የድድ፥ ባና ማዳና መላ ኦይችስ። ካሰይሳዳ አሶረ ካዋስ ጊራ እመይሳ አጋግስ። ካዎይ ሳልምናሶር ሄሳ ስእዳ ዎደ እያ ኦይድ፥ ቃሾ ኬ ገልስስ።

5 አሶረ ካዎይ እስራኤለ ቢታ ኡባ ቦላ ደንድድ፥ ሄ ላይ ጋካናዉ ሳማረ ካታማ ተቅስ። 6 ሆሰይ ካዎትዳ ኡዱፉን ላይን አሶረ ካዎይ ሳማረ ካታማ ኦይክስ፤ እስራኤለ አሳ ኤክድ፥ አሶረ ቢታ ኤፍስ። ኤንታፈ ባጋ አላሀንነ አቦራን፥ ባጋ ቃስ ጎዛና ሻፋ ማታን፥ አትዳይሳታ ሜዶና ካታማታን ዎስ።

ኤቃ ጎይኖ ጋሶን ድኤተ

7 ሀይስ ኡባይ ሀንዳይ፥ እስራኤለ አሳይ ጎዳ ባንታ ፆሳ ቦላ፥ ኤንታ ግብፀፈ፥ ግብፀ ካዋ ኩሸፐ ከስዳይሳ ቦላ ናጋራ ኦዳ ግሾሳ። ቃስ ኤንቲ ሀራ ፆሳታስ ጎይንድ፥ 8 ጎዳይ ኤንታ ስንፈ ጎድድ ከስዳ ሀራ ካዎተታ ዎጋ ካልዳ ግሾሳ። ሄሳ ቦላ ቃስ እስራኤለ ካዎት ዶምዳ ኢታ ዎጋ ካልዳ ግሾሳ። 9 እስራኤለ አሳይ ጎዳ ባንታ ፆሳ ቦላ ጌማን ኢታባ ኦዶሶና፤ ጉ ሞፈ ብድ፥ ግታ ካታማ ጋካናዉ ደእያ በሳ ኡባን ባንታዉ ቃ ጎይኖ በሳታ መዶሶና። 10 ቃስ ኤንቲ ኤቃ ሹቻታነ አሼራ ጌተትያ ፆሰ ምስለታ ዙማ ሁጰ ኡባንነ ዳሻ ም ኡባ ጋርሳን ኤስዶሶና። 11 ጎዳይ በን ኤንታ ስንፈ ጎድድ ከስዳ አላጋ አሳይ ኦዳይሳዳ፥ ቃ በሳ ኡባን እፃነ ጩይስዶሶና። ኤንቲ ኢታባ ኦድ ጎዳ ሀንቀዶሶና። 12 ጎዳይ ኤንታ፥ "ጎይኖፍተ" ያግዳ ኤቃ ጎይንዶሶና። 13 ጎዳይ እስራኤለ አሳነ ይሁዳ አሳ ባ ናበታ ባጋራነ ቆንጨ በእያ ኡባ ባጋራ፥ "ህንተ ኢታ ኦግያፐ ስምተ፤ ታኒ ናበታ፥ ታ አይለታ ባጋራ፥ ህንተ አዋት ኪተታናዳ እምዳ ህግያን ፃፈትዳ ዎጋነ አዋጁዋ ናግተ" ያግስ። 14 ሽን ኤንቲ ስኦና እፅዶሶና። ጎዳ ባንታ ፆሳ አማነትቦና ባንታ አዋታዳ ሞርገ ምንዶሶና። 15 ኤንቲ እያ ዎጋ፥ እ ኤንታ አዋታራ ጫቅዳ ጫቁዋነ እያ ናግሱዋ ካዶሶና። ኤንቲ ላፋ ኤቃታ ጎይንድ፥ ባንታ ሁጰንካ ላፋ ግድዶሶና።

ጎዳይ ኤንታ፥ "ህንተ ዩሹዋን ደእያ አላጋ አሳይ ኦይሳዳ ኦፍተ" ያግዳ ኪታ እፅድ፥ ኤንታ ደኡዋ ዎጋ ካልዶሶና። 16 ጎዳ ባንታ ፆሳ ኪታ ኡባ አጋግዶሶና። ማር ዳንያ፥ ናምኡ ጎይኖ ምስለታነ አሼራ ጌተትያ ኤቃ ምስልያ መዶሶና። ሳሎን ደእያ ፆልንቶ ኡባ ጎይንዶሶናነ ባኣለ ኤቃ ሀጋዝዶሶና። 17 ኤንቲ ባንታ አደ ናይታነ ማጫ ናይታ ታማ ግዶራ አዶሶና። ማሮታነ ሞይትለ ፄገይሳታ ዞረ ኦይችዶሶና። ሄሳ መላ ኢታባ ኦናዉ ባንታና ባይዝድ፥ ጎዳ ሀንቀዶሶና። 18 ሄሳ ግሾ፥ ጎዳይ እስራኤለ ቦላ ሀንቀትድ ኤንታ ባ ስንፈ ድግን፥ ይሁዳ ኮቻ ፃላል አትስ።

19 ቃስ ይሁዳ አሳይካ፥ ጎዳ ባንታ ፆሳ ኪታ ናግቦኮና፤ ኤንቲ እስራኤለ አሳ ዎጋ ካልዶሶና። 20 ሄሳ ጋሶን፥ ጎዳይ እስራኤለ ኮቻታ ኡባ አጋግስ። እ ኤንታ ኡንኤድ፥ ባ ስንፈ ድጋና ጋካናዉ፥ ቦንቅያ አሳ ኩሸን የግስ።

21 ጎዳይ እስራኤለ አሳ ዳዊታ ኮቻ ካዎተፈ በን ሻክዳ ዎደ፥ እስራኤለ አሳይ ናባፃ ናኣ እዮርባማ ባንታዉ ካዎዶሶና። ሄሳፈ ጉየ፥ እስራኤለ አሳይ ጎዳ ካሎናዳ እዮርባም ድግስ፤ እ ኤንታ ግታ ናጋራ ኦስስስ። 22 እስራኤለ አሳይ እዮርባም ኦዳ ናጋራ ኡባ ኦዶሶና፤ እያፐ ስምቦኮና። 23 ጎዳይ ናበታ፥ ባ አይለታ ኡባ ባጋራ ካሰ ኦድዳይሳዳ ኤንታ ባ ስንፈ ድግስ። እስራኤለ አሳይ ባንታ የለትዳ ቢታፈ ድኤትድ፥ አሶረ ቢታ ብድ፥ ሀች ጋካናዉ ያን ደእዶሶና።

አሶረት እስራኤለ ቢታን

24 አሶረ ካዎይ ባብሎነ ቢታን ደእያ ኩታ፥ አዋና፥ ሀማታነ ሳፋርዋይማ ካታማታን ደእያ አሳ ኤህድ፥ እስራኤለ አሳ በሳን፥ ሳማረ ካታማታን ዎስ። ኤንቲ ሄ ካታማታ ኦይክድ፥ ያን ደእዶሶና።

25 ኤንቲ ኮይሮ ያን ዱሱ ዶምዳ ዎደ፥ ጎዳ ጎይንቦኮና። ሄሳ ጋሶን፥ ጎዳይ ኤንታ ግዶ ጋሞታ የድን፥ ጋሞት ኤንታ ግዶፈ ባጋታ መንረድ ዎዶሶና። 26 ያትን፥ አሶረ ካዋስ፥ "ኔኒ ኤሀዳ ሳማረ ካታማታን ዎዳ አሳይ፥ ሀ ቢታ ፆሳ ዎጋ ኤሮኮና። ሄኮ፥ ያትን፥ ኤንታ መንረ ዎያ ጋሞታ ኤንታ ቦላ የድስ" ያግድ ኦድዶሶና።

27 አሶረ ካዎይ፥ "ህንተ ሳማረፐ ድእድ ኤህዳ ካህነታፐ እሱዋ ዛሪድ፥ ያ የድተ። እ ያ ብድ፥ ሄ ቢታ ፆሳ ዎጋ ኤንታ ታማርሶ" ያግድ ኪትስ። 28 ሄሳ ግሾ፥ ሳማረፐ ድእድ ኤህዳ ካህነታፐ እሶይ ቤተለን ዳናዉ ይድ፥ ጎዳ ጎይኖ ዎጋ ኤንታ ታማርስስ።

29 ግዶሽን፥ ሳማረን ኡትዳ አሳይ ባንታዉ ጎይንያ ኤቃ ምስለታ ባ ደእያ በሳን በሳን መዶሶና። ኤንቲ ደእያ ካታማታን፥ ካሰ ባንታዉ ኬፅዳ ቃ ጎይኖ በሳታን ኤፍድ ዎዶሶና። 30 ሄሳዳ ኦድ፥ ባብሎነ አሳይ ሱኮት-ባኖባ ጌተትያ ኤቃ ምስለታ መዶሶና። ኩታ አሳይ አርጋላ ጌተትያ ኤቃ ምስለታ መዶሶና። ሀማታ አሳይ እስማታ ጌተትያ ኤቃ ምስለታ መዶሶና። 31 አዋዋ አሳይ አልባዛራነ ታርታቃ ጌተትያ ኤቃ ምስለታ መዶሶና። ሳፋርዋይማ አሳይ ቃስ አድራመለክነ አናመለካ ጌተትያ ባንታ ፆሳታስ ባንታ ናይታ ታማን ፁግድ ያርሽዶሶና። 32 ኤንቲ ጎዳ ጎይንዶሶና፤ ሽን ባንታ ግዶፈ ዱማ ዱማ አሳ ዶርድ፥ ቃ ጎይኖ በሳታን ካህነ ኦድ ሹምዶሶና። 33 ኤንቲ ጎዳ ጎይንዶሶና፤ ግድኮካ፥ ባንታ ይዳ ቢታ ቢታ አሳ ሜዝያ ካልድ፥ ባንታ ፆሳታካ ጎይንዶሶና። 34 ኤንቲ ሀች ጋካናዉ ካሰ ሜዘትዳይሳዳ ኦሶና።✝17:34 መ 32:28፤ 35:10.

ኤንቲ ቱማ ጎዳ ጎይኖኮና ዎይኮ ጎዳይ እስራኤለ ግድ ሱንዳ ያይቆባ ዘረስ እምዳ አዋጁዋነ ዎጋ፥ ህግያነ ኪታ ናጎኮና። 35 ጎዳይ እስራኤለ አሳራ በን ጫቅዳ ዎደ፥ ኤንታ ሀይሳዳ ያግድ ኪትስ፤ "ሀራ ፆሳታ ጎይኖፍተ፤ ኤንታዉ ጉልባቶፕተ፤ ኤንታዉ ኦፍተ ዎይኮ ኤንታዉ ያርሾፍተ።✝17:35 ከሳ 20:5፤ ዛረ 5:9. 36 ሽን ግብፀፈ ህንተና ባ ግታ ዎልቃንነ ባ ምጨትዳ ኩሸን ከስዳ ጎዳስ ኦተ፤ እያዉ ጉልባትተ፤ እያዉ ያርሾ ያርሽተ።✝17:36 ዛረ 6:13. 37 ጎዳይ ህንተዉ ፃፍዳ አዋጁዋነ ዎጋ፥ ህግያነ ኪታ ኡባ ዎደ ናግተ፤ ሀራ ፆሳታ ጎይኖፍተ። 38 ታኒ ህንተራ ጫቅዳ ጫቁዋ ዶጎፕተ፤ ሀራ ፆሳታ ጎይኖፍተ። 39 ሄሳ አግድ፥ ጎዳ ህንተ ፆሳ ጎይንተ። ህንተ ሞርከታ ኡባፈ ህንተና አሻናይ ታና" ያግድ ኪትስ። 40 ሽን ኤንቲ እያዉ ኤሮ ጎና እፅድ፥ ካሰ ባንታ ሜዝያ ካልዶሶና። 41 ሄ አሳት ጎዳ ጎይንሸካ፥ እስ ባጋራ ባንታ ኤቃ ምስለታ ጎይኖሶና። ሀች ጋካናዉ ኤንታ ኮቻይ ኤንታ አዋት ጎይነይሳዳ ጎይንሸ ደኦሶና።