1 ዎንተ ጋላስ፥ ዎንታ ጉራ እያሱይነ አሳይ ሴፅማ ጌተትያ በሳፈ ደንድድ፥ ዮርዳኖሰ ሻፋ ብድ፥ ፕኖና ያን ዱንካንዶሶና። 2 ሄ ጋላሳፐ ጉየ፥ ሀላቃት ኤንቲ ዱንካንዳ ጉታ ገልድ፥ 3 "ሌወ ኮቸ ግድዳ ካህነት ቶክዳ፥ ጎዳ፥ ህንተ ፆሳ ጫቆ ታቦትያ ህንተ በእዳ ዎደ ዱንካንዳ ጉታፐ ደንድድ ኤንታ ካልተ። 4 ህንተ ካሰ ሀ ኦግያራ ብድ ኤሮና ግሾ፥ ህንተ ባና ኦግያ ኤንቲ በሳና። ሽን ጫቆ ታቦትያኮ ሺቆፕተ። ህንተ ግዶንነ ጫቆ ታቦትያ ግዶን ናምኡ ሙኩሉ ዋ ግድያ ሃሆተ ደኦ" ያግድ ኦድዶሶና።

5 እያሱይ አሳኮ፥ "ጎዳይ ዎንቶ ህንተ ግዶን ማላልስያባ ኦና ግሾ፥ ህንተናተ ጌሽተ" ያግስ። 6 ቃስ ካህነታስ፥ "ጫቆ ታቦትያ ቶክድ፥ አሳፐ ስን አተ" ያግድ ኪትስ። ካህነት ጫቆ ታቦትያ ቶክድ፥ አሳፐ ስን አዶሶና።

7 ጎዳይ እያሱኮ፥ "ታኒ ሙሰራ ግድዳይሳዳ፥ ኔራካ ግዳናይሳ አሳ ኡባይ ኤራና መላ ሀች እስራኤለ ኡባ ስንን ነና ቁ ቁ ኦሶ ዶማና። 8 ኔን፥ ጫቆ ታቦትያ ቶክያ ካህነታስ፥ ‘ዮርዳኖሰ ሻፋ ዶና ጋክያ ዎደ ሃ ግዶ ገልድ ኤቅተ’ ጋዳ ኪታ" ያግስ።

9 እያሱይ እስራኤለ አሳኮ፥ "ሃ ይድ ጎዳ፥ ህንተ ፆሳ ቃላ ስእተ። 10 ደኦ ፆሳይ ህንተ ግዶን ደኤይሳ ህንተ ኤራናይ፥ ካናነታ፥ ህተታ፥ ህወታ፥ ፓርዘታ፥ ገርገሰታ፥ አሞረታነ ያቡሰታ ህንተ ስንፈ እ ጎድድ ከሰይሳና። 11 ቢታ ኡባ ጎዳ ጫቆ ታቦተይ ህንተፈ ስንትድ፥ ዮርዳኖሰ ሻፋ ፕናና። 12 ህዛ ታማነ ናምኡ እስራኤለ ዘረታፐ እስ እስ አስ ዶርተ። 13 ቢታ ኡባ ጎዳ ጫቆ ታቦትያ ቶክዳ ካህነታ ቶሆይ ዮርዳኖሰ ሃ የያ ዎደ ሃይ ኤቃና። ቆሞፈ ዱገ ጎግያ ዮርዳኖሰ ሃይ እስ ቦላ ሺቅድ ዶረታና" ያግስ።

14 አሳይ ዮርዳኖሰ ሻፋ ፕናናዉ ዱንካንዳ ጉታፐ ደንድያ ዎደ፥ ጫቆ ታቦትያ ቶክዳ ካህነት አሳ ስንን ቦሶና። 15 ካ ሺሽያ ዎደ ዮርዳኖሰ ሻፋይ መይሳዳ ክፅኮካ፥ ጫቆ ታቦትያ ቶክዳ ካህነት ዮርዳኖሰ ሻፋ ጋክድ፥ ኤንታ ቶሆይ ሃ ጋፃ የዳ ዎደ፥ 16 ቆሞፈ ዱገ ጎግያ ሃይ ኤቅስ። ዛርታና ማታን ደእያ አዳማ ካታማ ጋካናዉ ሺቅድ ዶረትስ። ዱገ ማፅነ አባኮ ጎግያ ሃይ ኤቅስ። ያንን፥ አሳይ እያርኮ ካታማ ፕንዶሶና። 17 እስራኤለ አሳይ መላ ቢታራ ፕንድ ዉራና ጋካናዉ ጎዳ ጫቆ ታቦትያ ቶክዳ ካህነት ዮርዳኖሰ ሻፋ ግዶን መላ ቢታን ኤቅዶሶና።