1 እስራኤለ አሳስ ያይዳ ግሾ፥ እያርኮ ካታማ ግምበ ድርሳ ፐንገት ጎርደትዶሶና። ኦንካ ካታማ ገላናዉነ ከያናዉ ዳንዳኤና። 2 ጎዳይ እያሱኮ፥ "እያርኮ ካታማ እያ ካዉራነ እያ ምኖ ኦላንቾታራ ነ ኩሸን አ እማስ። 3 ኔራነ ነ ኦላንቾታራ ሳልፕድ፥ ጋላሳን እስ ቶሆ ኡሱፑን ጋላስ ጋካናዉ፥ ካታማ ግምበ ድርሳ ዩሹዋ ዩይተ። 4 ላፑን ካህነት እሶይ እሶይ ሞይዘ ኦይክድ፥ ጎዳ ጫቆ ታቦትያ ስንን ቦ። ላፑን ጋላስ ካህነት ሞይዘ ፑንያ ዎደ ህንተ ካታማ ላፑን ቶሆ ዩይተ። 5 ካህነት ሞይዘ ጎችድ ፑኑዋ ህንተ ስእያ ዎደ፥ አሳ ኡባይ ኤለስድ ባንታ ቃላ ቁ ኦድ ዋሶ። ሄሳፈ ጉየ፥ ካታማ ግምበ ድርሳይ ኩንዳና። ሄ ዎደ አሳ ኡባይ ግዶ ላዉሁ ግድ ገላና" ያግስ።

6 ናወ ናአ እያሱ ካህነታ ፄግድ፥ "ጎዳ ጫቆ ታቦትያ ቶክተ። ህንተፈ ላፑን ካህነት ሞይዘ ኦይክድ፥ ጫቆ ታቦትያፐ ስን አድ ቦ" ያግስ። 7 አሳኮ ቃስ፥ "ብድ፥ ካታማ ዩሹዋን ዩይተ፤ ኦላንቾት ጎዳ ጫቆ ታቦትያ ስንን ሄመቶና" ያግድ ኪትስ።

8 እያሱይ ኦድዳይሳዳ፥ ላፑን ካህነት ላፑን ሞይዘ ፑንሸ ጎዳ ስንን ሄመትዶሶና፤ ቃስ ጎዳ ጫቆ ታቦተይ ኤንታ ካልስ። 9 ኦላስ ዳንጭዳይሳት ሞይዘ ፑንያ ካህነታ ስንን ሄመቶሶና። ካህነት ቃንፆና ሞይዘ ፑንያ ዎደ ደረይ ታቦትያፐ ጉየራ ካሌስ። 10 ሽን እያሱይ፥ "ታ ህንተና ዋሶ ጎናሽን ዋሶፍተ ዎይኮ ህንተ ቃላ ስሶፍተ፤ ሀር አቶሽን እስ ቃላካ ኦደቶፍተ። ታ ህንተና ዋሶ ግያ ሄ ጋላስ ዋስተ" ያግድ አሳ ኪትስ። 11 ሄሳ ግሾ፥ ጎዳ ጫቆ ታቦተይ ሄ ካታማ እስ ቶሆ ዩያናዳ ኦስ። ያትድ አሳይ ባንታ ዱንካንዳ ጉታ ስሚድ፥ ያን አቅዶሶና።

12 ዎንተ ጋላስ እያሱይ ጉርድ ደንድስ፤ ካህነትካ ጎዳ ጫቆ ታቦትያ ቶክዶሶና። 13 ላፑን ሞይዘታ ኦይክዳ ላፑን ካህነት ባንታ ሞይዝያ ቃንፆና ፑንሸ ጫቆ ታቦትያ ስንን ቦሶና። ሞይዘይ ቃንፆና ፑነትያ ዎደ ኦላንቾት ካህነታፐ ስንን ቃስ ደረይ ታቦትያፐ ጉየራ ካሌስ። 14 ናምአን ጋላስ ካታማ እስ ቶሆ ዩይድ፥ ባንታ ዱንካንዳ ጉታ ስምዶሶና። ኡሱፑን ጋላስ ጋካናዉ ሄሳዳ ኦዶሶና።

15 ላፑን ጋላስ ጎንተይ ዋሽን ደንድድ፥ ካሰይሳዳ ካታማ ላፑን ቶሆ ዩይዶሶና። ሄ ጋላሳ ፃላላ ካታማ ላፑን ቶሆ ኤንቲ ዩይዶሶና። 16 ላፑን ዩሹዋን፥ ካህነት ሞይዘ ፑንያ ዎደ፥ እያሱይ አሳኮ፥ "ጎዳይ ሀ ካታማ ህንተዉ አድ እምዳ ግሾ፥ ዋስተ" ያግድ ኪትስ።

17 "ካታማይነ እያ ግዶን ደእያባ ኡባይ ጎዳስ ቃንገትዳባ ግድድ ያናዉ በሴስ። ኑኒ ቢታ ፆሞሳና መላ የድዳ አሳታ ቆሳዳ አሽዳ፥ ላይምያ ራባነ እ ሶን ደእያ አሳ ፃላል አታናዉ በሴስ። 18 ሽን ህንተ መቶነ ቆሆ እስራኤለ ጉታ ቦላ ኤሆና መላ ያናዉ በሲያባፐ አይባካ አሞትድ ኤኮናዳ ህንተ ሁጰስ ናገትተ። 19 ብራይነ ዎርቀይ፥ ናሰ ብራታፐ ኦሰትዳ ሚሸት ኡባይ፥ ጎዳስ ዱማትዳባ ግዶ። ኤንቲ ጎዳ ሚሽያ ምንጅያ ሻልያን ደኦ" ያግስ።

20 ሄሳ ግሾ፥ ሞይዘይ ፑነትስ፤ አሳይ ዋስስ። ደረይ ሞይዘ ፑኑዋ ስእዳ ዎደ ባንታ ቃላ ቁ ኦ ዋስን፥ ካታማ ግምብያ ድርሳይ ኩንድስ። ሄ ሳተን አሳይ ላዉሁ ግድ ገልድ ካታማ ኦይክዶሶና። 21 ባንታ ማሻ ደንድ፥ ማጫ አደ፥ ናአ ጭማ፥ መሄ፥ ዶርሰ፥ ሀረነ ካታማን ሸምፖራ ደእያባ ኡባ ዎዶሶና።

22 እያሱይ ቢታ ፆሞሳናዉ ኪተትዳ ናምኡ አሳታኮ፥ "ላይመ ራብ ሶ ብድ፥ ካሰ ህንተ እዉ ጫቅዳይሳዳ፥ እዮነ እ ሶ አሳ ኡባ ከስተ" ያግስ። 23 ኤንቲ ብድ፥ ራቦ፥ እ አዋ፥ እ አይዉ፥ እ እሻታነ እ ዳቦታ ኡባ እስራኤለ አሳይ ዱንካንዳ ጉታፐ ጋፃ ከስድ ዎዶሶና። 24 ያት ስሚድ ካታማነ እያ ግዶን ደእያባ ኡባ ፁግዶሶና። ሽን ብራነ ዎርቃ፥ ናሰ ብራታፐ ኦሰትዳ ሚሸታ ጎዳ ሚሽያ ምንጅያ ሻልያን ዎዶሶና። 25 ሽን ላይምያ ራባ እያርኮ ፆሞሳና መላ ኪተትዳ አሳታ ቆሳዳ አሽዳ ግሾ፥ እያሱይ እዮ፥ እ አዋ ሶ አሳነ ኢራ ደእያ ዳቦታ ኡባ ሀይቆፐ አሽስ። እ ኮቻት ሀች ጋካናዉ እስራኤለ ቢታን ደኦሶና።

26 ሄ ዎደ እያሱይ፥

"እያርኮ ካታማ ዛር ኬፃናዉ ደንድያ ኦንካ፥

ጎዳ ስንን ባደትዳባ ግዶ።

ቡሮ ባስያ ዎደ እያ ባይራ ናአይ ሀይቆ፥

ፐንግያ አያ ዎደ እያ ተሾ ናአይ ሀይቆ"

ያግድ ባድስ።

27 ጎዳይ እያሱራ ግድዳ ግሾ፥ እያ ሱንይ ቢታ ኡባ ጋክስ።