አይሰይሳታ ማፃፋ 13

ሳምሶና የለተ

1 እስራኤለ አሳይ ጎዳ ስንን ቃስካ ኢታባ ኦዶሶና። ያትን፥ ጎዳይ ኤንታ ኦይታሙ ላይ ፍልስፄመ አሳ ኩሸን አድ እሚስ።

2 ሄ ዎደ ፆርአ ካታማን ማኑሄ ጌተትያ እስ አደይ ደኤስ። እ ዳነ ኮቸ፤ እያ ማችያ ማይን ግድዳ ግሾ እያዉ ናአ የላቡኩ። 3 እስ ጋላስ ጎዳ ኪታንቾይ ሄ ማጫሴስ ቆንጭድ፥ "ኔኒ ማይን፤ ነዉ ናእ ባዋ፤ ሽን ነ ቃንታና፤ አደ ናአካ የላና። 4 ሄሳ ግሾ፥ ዎይነ ዎይኮ ማይያ ኡሽ ኡዮና መላነ ቱናባ አይባካ ሞና መላ ናገታ። 5 ነ ቃንታዳ አደ ናአ የላና። ናአይ የለትዳ ዎድያፐ ዶምድ ፆሳስ ዱማትዳ ናዝራወ ግድያ ግሾ እያ ሁጵያ ሜዶፓ። እ እስራኤለ ፍልስፄመታ ኩሸፐ አሾ ዶማና" ያግስ።

6 ማጫስያ ባዳ፥ ባ አዝናስ ሀይሳዳ ያጋዳ ኦዳሱ፤ "እስ ፆሳ አስ ታኮ ይስ፤ እያ መይ ፆሳ ኪታንቾ መላ ዳሮ ያሼስ። እ አዉፐ ይዳኮ ታኒ እያ ኦይቻብከ፤ እካ ባ ሱን ታዉ ኦድቤና። 7 ሽን እ ታኮ፥ ‘ነ ቃንታና፤ አደ ናአ የላና። ናአይ የለትዳ ዎደፐ ዶምድ ሀይቃና ጋካናዉ ፆሳስ ዱማትዳ ናዝራወ ግድያ ግሾ ዎይነ ዎይኮ ማይያ ኡሽ ኡዮፓ፤ ቱናባካ ሞፓ’ ያግስ" ያጋሱ።

8 ሄሳፈ ጉየ፥ ማኑሄይ፥ "አቤት ጎዳዉ፥ ናአይ የለትያ ዎደ አይ ኦናዉ ኮሽያኮ ኤርሳና መላ ኔኒ ኪትዳ ፆሳ ኡራይ ኑኮ ስሚድ ያና መላ ኦርክ" ያግድ ጎዳ ዎስስ።

9 ፆሳይ ማኑሄ ዎሳ ስእስ። ማችያ ጋደን ኡትዳሽን ፆሳ ኪታንቾይ ናምአን ይስ፤ ሽን ሄ ዎደ እ አዝናይ ማኑሄይ ኢራ ዴና። 10 ማችያ ኤለሳዳ ባ አዝናኮ ባዳ፥ "ሄደ ታኮ ይዳ አደይ ሀች ታዉ ቆንጭስ" ያጋሱ።

11 ማኑሄይ ኡትዳ በሳፈ ደንድድ፥ ባ ማችዉ ካል ብድ ኡራኮ፥ "ታ ማቸራ ኦደትዳይ ነኔ?" ያግድ ኦይችስ።

ኡራይ፥ "ኤ፥ ታና" ያግስ።

12 ማኑሄይ፥ "ኔኒ ኦድዳ ቃላይ ፖለትያ ዎደ የለታና ናኣ ደኡዋስነ ኦሱዋስ ዎጋይ አይቤ?" ያግድ እያ ኦይችስ።

13 ጎዳ ኪታንቾይ፥ "ነ ማችያ ታኒ ኦድዳ ኡባፈ ናገቶ። 14 ዎይነ ምፈ በንትያባ አይባካ ሞፖ፤ ዎይነ ዎይኮ ማይያ ኡሽ ኡዮፖ፤ ቱና ግድዳባ ሞፖ። ታኒ እዉ ኦድዳ ኡባ ኦ" ያግስ።

15 ማኑሄይ ጎዳ ኪታንቹዋኮ፥ "ኑኒ ነዉ እስ ኡርገ ዴሽ ሹክድ ጊግሳና ጋካናዉ ሀያና ጉ ጋምአርክ" ያግስ።

16 ጎዳ ኪታንቾይ፥ "ታኒ ጋምእያኮካ ነ ካ ሚከ። ሽን ኔኒ ፁሳ ያርሾ ጊግሳናዉ ኮይኮ፥ ጎዳስ ያርሻናዉ ዳንዳኣሳ" ያግስ። እ ጎዳ ኪታንቾ ግደይሳ ማኑሄይ ኤርቤና።

17 ማኑሄይ ጎዳ ኪታንቹዋኮ፥ "ኔኒ ኦድዳ ቃላይ ፖለትያ ዎደ ኑኒ ነና ቦንቻና መላ ነ ሱንይ ኦኔ?" ያግድ ኦይችስ።

18 ጎዳ ኪታንቾይ፥ "ነ ታ ሱን አይስ ኦይቻይ? ታ ሱንይ ማላልሰይሳ"*13:18 ማላልሰይሳ፦ ታ ሱን ነ ኤራናዉ ዎይኮ ኦይካናዉ ዳንዳኦና ግሾ ታ ሱንይ ማላልሰይሳ ያግድ እያ ሱንይ ማላልስያ ኦሶን ቆንጨይሳ በስስ። ያግድ ዛርስ።

19 ማኑሄይ ኡርገ ዴሽነ ካ ያርሹዋ ኤክድ ሹቻ ቦላ ጎዳስ ያርሽስ። ማኑሄይነ እያ ማችያ ፄልሽን፥ ጎዳይ ማላልስያባ ኦስ። 20 ያርሾ በሳፈ ታማ ላጮይ ፑደ ላፅድ ከይሽን፥ ጎዳ ኪታንቾይ ታማ ላጩዋ ግዶራ ሳሎ ከይስ። ማኑሄይነ እያ ማችያ ሄሳ በእድ ሶምኦራ ሳአን ጉፋንዶሶና። 21 ጎዳ ኪታንቾይ ማኑሄስነ እያ ማቼስ ዛር በንቶና አግን፥ ማኑሄይ እ ጎዳ ኪታንቾ ግድዳይሳ ሄ ዎደ አኬክስ።

22 ማኑሄይ ባ ማቸኮ፥ "ኑኒ ፆሳ በእዳ ግሾ ሀይቃና" ያግስ።

23 ሽን እያ ማችያ፥ "ጎዳይ ኑና ዎናዉ ኮይዳባ ግድያኮ፥ ፁሳ ያርሹዋነ ካ ያርሹዋ ኑፐ ኤከና ዎይኮ ሀ ኡባ ኑና በሰና ዎይኮ ሀይሳ ኑስ ኦደና" ያጋዳ ዛራሱ።

24 ማችያ አደ ናአ የላሱ፤ እያ ሱን ሳምሶና ጋዳ ፄጋሱ። ናአይ ድጭስ፤ ጎዳይካ እያ አንጅስ። 25 ናአይ ፆርአፈነ ኤሽታኦላፐ ግዶን ደእያ ዳነ ጉታን ደእሽን ጎዳ አያናይ እያ ደን ዶምስ።