1 ጎዳይ ሙሰኮ ሀይሳዳ ያግስ። 2 እስራኤለ አሳ ኡባስ ሀይሳዳ ያጋዳ ኦዳ፤ "ታኒ፥ ጎዳይ፥ ህንተ ፆሳይ፥ ጌሽ ግድያ ግሾ፥ ህንተካ ጌሽ ግድተ።

3 "ህንተፈ እሶይ እሶይ ባ አዋነ ባ አይዉ ቦንቾ፤ ታ ሳምባታ ቦንችተ። ታኒ ጎዳ፥ ህንተ ፆሳ።

4 "ታና አግድ ኤቃታ ጎይኖፍተ፤ ዎይኮ ብራታፐ ኦሰትዳ ፆሳታ ህንተዉ ኦፕተ። ታኒ ጎዳ፥ ህንተ ፆሳ።

5 "ህንተ እስፈተ ያርሾ ጎዳስ ያርሽያ ዎደ ሄ ያርሾይ ህንተ ግሾ ኤከታና መላ በሰይሳዳ ያርሽተ። 6 ሄ ያርሾይ ህንተ ያርሽዳ ጋላስ ዎይኮ ዎንተ ጋላስ ሜተቶ፤ ሄን ጋላስ ጋካናዉ አትዳይ ደእኮ ታማን ፁገቶ። 7 ሄን ጋላስ ሜተትኮ፥ ሄስ ቱንስያባ፤ ታኒ ሄሳ ኤክከ። 8 ሄሳ ምያ ኦንካ ጎዳስ ጌሽ ግድዳባ ቱንስዳ ግሾ ባ ናጋራን ኦይሸታና። ሄ ኡራይ ባ አሳ ግዶፈ ኩረቶ።

9 "ህንተ ጋደን ካፅዳ ካ ህንተ ጫክያ ዎደ ጋድያ ጋፃ ጋካናዉ ደኤይሳ ጫኮፍተ፤ ጫክ ስምን ደእያ ፖሽልያ ቆሮፕተ። 10 ነ ዎይነ አይፍያ ማፅያ ዎደ ም ቦላ ቆሰትድ አትዳይሳ ዎይኮ ሳአን ዎዳ ዎይነ አይፍያ ማፆፓ። ሄሳ ማንቆታስነ በተ አሳስ አጋጋ። ታኒ ጎዳ፥ ህንተ ፆሳ።

11 "ካይሶቶፕተ።

"ዎርዶቶፕተ።

"እሶይ እሱዋ ጭሞፍተ።

12 "ታ ሱንን ዎርዶ ጫቆፍተ፤ ህንተ ፆሳ ሱን ቱንሶፕተ። ታኒ ህንተ ጎዳ።

13 "ነ ሾሩዋ ቦላ ገነ ኦፋ፤ ዎይኮ እያ ቦንቆፋ።

"ኡነ ኦያ ኡራ ዳሞዝያ ድጋዳ፥ እስ ቃማካ ነ ማታን አይሶፓ።

14 "ቱልያ ጫዮፓ፤ ዎይኮ ቆቅያ ስንን በ ዎፋ፥ ሽን ኔኒ ፆሳስ ያያ። ታኒ ነ ጎዳ።

15 "ፕርዳ ጌላዮፕተ፤ ማንቁዋ እያ ማንቆተ ግሾ ማዳዳ ፕርዶፋ፤ ዱርያ እያ ዱረተ ግሾ ያያዳ አጎፋ። ሽን ነ ሾሩዋስ ሱረ ፕርዳ።

16 "ነ አሳ ግዶን ኢታ ዝግርስ ኤካዳ ዩዮፓ።

"ነ ሾሩዋ ሀይቆስ ጋያባ አይኮካ ኦፋ። ታኒ ነ ጎዳ።

17 "ነ እሻ ነ ዎዛናን እፆፋ። ነ ሾሩዋ ጋሶን ነ ናጋራ ኦና መላ እያ ሀንቃ።

18 "ሀሎ ከዮፓ፤ ነ አሳፐ እሱዋ ቦላካ ሽፎፓ። ሽን ነ ሾሩዋ ነ ሁጰዳ ዶሳ። ታኒ ነ ጎዳ።

19 "ታ ኪታታ ናጋ።

"እስ ቆሞ መሄ ሀራ ቆሞ መሄራ ብራይስሶፓ።

"እስ ሾቃን ናምኡ ቆሞ ዘረ ዘሮፓ።

"ናምኡ ቆሞፈ ኦሰትዳ ማኦ ማኦፋ።

20 "እስ አስ አዝናስ ኦይሸታዳ ደእሽን፥ ዎዞ ሚሸይ እመትድ ዉሮናሽን ዎይኮ ላአ ከዮናሽን፥ ሄ አይለራ አቅኮ ኤንቲ ሴረታናዉ በሴስ፥ ሽን ኤንቲ ሀይቃናዉ በሰና። 21 ግዶሽን፥ ሄ ኡራይ ባ ናቆ ያርሾስ ግድያ ማራዘ ጌሻ ዱንካንያ ፐንገን ጎዳ ስን ኤሆ። 22 ካህነይ ሄ ናቆ ያርሾ ማራዝያ ኤክድ፥ ኡራ ናጋራ አቶተስ ጎዳ ስንን ያርሼስ፤ እያ ናጋራይ አቶ ጌተታና።

23 "ህንተ ካናነ ቢታ ገልያ ዎደ አይፈ እምያ አይ ቆሞ ም ቶክኮካ፥ ሄ ም አይፈይ ሜተቶና መላ ድገትዳይሳ አኬክተ። ሄ ላይ ዉራና ጋካናዉ ሄ ም አይፈይ ሜተቶፎ። 24 ኦይዳን ላይን ሄ ም አይፈይ ጎዳስ ጋላታስ ሺቅያ ጌሻ ያርሾ ግዳና። 25 እቻሻን ላይን ሄ ም አይፍያ ሚተ። ህንተ ሄሳዳ ኦኮ፥ ህንተ ም አይፈይ ዳራና። ታኒ ጎዳ፥ ህንተ ፆሳ።

26 "ሱ እያ ግዶን ደእያ አሾ ሞፕተ። ማሮቶፕተ ዎይኮ ብቶፕተ።

27 "ህንተ ሁጰ ብናና ጋርሳራ ዩሽ አድ ጪሮፕተ፤ ህንተ ቡቻ ዩሽ አድ ሜዶፕተ።

28 "ሀይቅዳ አሳ ግሾ ህንተ አሳተ ጋሮፕተ፤ ዎይኮ ጫቻ ቤታ ህንተ አሳተ ቦላ መፍተ። ታኒ ነ ጎዳ።

29 "ቢትያ ላይማተንነ ቱናተን ኩሞና መላ ነ ማጫ ናእዉ ላይማተስ አ እማዳ ቱንሶፓ።

30 "ታ ሳምባታ ቦንችተ፤ ታ ጎይነትያ በሳ ቦንችተ። ታኒ ጎዳ።

31 "ሞይትለ ኦድስያ አሳኮ ዎይኮ ማሮታኮ ቦፕተ፤ ህንተ ቱኖና መላ ኤንታ ኮዮፕተ። ታኒ ጎዳ፥ ህንተ ፆሳ።

32 "ዶን አስነ ጭማ አስ በእያ ዎደ ኡትዳ በሳፈ ደንዳ ኤቃዳ ኤንታ ቦንቻ፤ ነ ፆሳስ ያያ። ታኒ ጎዳ።

33 "ህንተ ቢታን ደእያ በተ አሰ ሱጎፕተ። 34 ህንተ ቢታን ደእያ በተ አስ ህንተ ጋደ አሳዳ ፄልተ፤ እያ ህንተ ሁጰዳ ዶስተ። ህንተ ካሰ ግብፀ ቢታን በተ አስ ግድድ ደእደታ። ታኒ ጎዳ፥ ህንተ ፆሳ።

35 "ህንተ ዋያባን፥ ማክያባንነ ምዛነን ዎርዶቶፕተ። 36 ህንተ ምዛነይ፥ ህንተ ማክያባይነ ዋያባይ እስኖ ግዶ። ታኒ ህንተና ግብፀ ቢታፈ ከሳዳ ኤህዳ ጎዳ ህንተ ፆሳ።

37 "ህንተ ታ ህግያነ ታ ኪታ ኡባ ናግተነ ኦተ። ታኒ ጎዳ።"