1 ጎዳይ ሙሰኮ ሀይሳዳ ያግስ። 2 እስራኤለ አሳስ ሀይሳዳ ያጋዳ ኦዳ፤ "እስራኤለ አሳፐ ግድን፥ ዎይኮ ህንተ ግዶን ደእያ አላጋ አሳፐ ግድን፥ ኦንካ ባ ናአ ሞሎካ ጌተትያ ኤቃስ አድ እምኮ፥ እ ሀይቆ፤ እስራኤለ አሳይ እያ ሹቻን ጫድድ ዎ። 3 ባ ናኣ ሞሎካ ጌተትያ ኤቃስ እምድ ታ ዱንካንያ ቱንሰይነ ታ ጌሻ ሱን ካዉሸይ ታ ስንን እፀትዳባ ግዳና። ታ አሳ ግዶፈ ሻካዳ ታኒ እያ ይሳና። 4 ሽን ሄ ኡራ እስራኤለ አሳይ በእሸ ቀል ግድ አኮነ ዎና እፅኮ፥ 5 ታኒ ሄ አድያነ እያ ሶ አሳ ሞርካና፤ እያነ ሞሎካ ካልዳይሳታ ኤንታ ደርያ ግዶፈ ሻካዳ ይሳና።

6 "ኦንካ ታና አማነቶና እፅድ ሞይትለ ፄግኮነ ማሮ ሶ ቢኮ፥ ታኒ እያዉ ሞርከ ግዳና፤ አሳ ግዶፈ እያ ይሳና።

7 "ታኒ፥ ጎዳይ፥ ህንተ ፆሳ ግድያ ግሾ፥ ህንተ ህንተና ዱማይተ፤ ጌሽ ግድተ። 8 ታ ዎጋ ናግተ፤ እያ ፖልተ። ታኒ ህንተና ጌሽያ፥ ህንተ ጎዳ።

9 "ኦንካ ባ አዋ ዎይኮ ባ አይዉ ጫይኮ ሀይቆ። እ ባ አዋ ዎይኮ ባ አይዉ ጫይዳ ግሾ፥ እያ ሱ አጮይ እያ ቦላ ግዶ።

10 "እስ አስ ባ ሾሩዋ ማችዉ ፃልኮ፥ ኤንቲ ናምአይ ሀይቆ። 11 እስ አስ ባ አዋ ማችዉ ፃልኮ፥ እ ባ አዋ ካዉሽስ፤ ኤንቲ ናምአይ ሀይቆ። ኤንታ ሱ አጮይ ኤንታ ቦላ ግዶ። 12 እስ አስ ባ ናኣ ማችዉ ፃልኮ፥ ኤንቲ ናምአይ ሀይቆ። ኤንቲ ቱናባ ኦዶሶና፤ ኤንታ ሱ አጮይ ኤንታ ቦላ ግዶ።

13 "እስ አደይ ማጫሳራ ጋሄተይሳዳ አደራ ጋሄትኮ፥ ኤንቲ ናምአይ እፀትዳባ ኦዳ ግሾ ሀይቆ። ኤንታ ሱ አጮይ ኤንታ ቦላ ግዶ። 14 እስ አስ ናእዉነ አይዉ ማቾ ኤክኮ፥ ሄስ ቱናባ። ህንተ ግዶን ቱናተ ዶና መላ እነ ኤንቲ ታማን ፁገቶ።

15 "እስ አስ መሄራ ጋሄትኮ፥ እ ሀይቆ፤ ሄ ሚዝዉ ዎተ። 16 እስ ማጫስ መሄራ ጋሄትኮ ሄ ማጫስያነ ሄ መሄይ ናምአይ ሀይቆ፤ ኤንታ ሱ አጮይ ኤንታ ቦላ ግዶ።

17 "እስ አስ ባ አዋ ናእዉ ዎይኮ ባ አየ ናእዉ ማቾ ኤክኮ፥ ሄስ ቱናባ። ኤንቲ ባንታ አሳ ግዶፈ ሻከትድ ሀይቆ። እ ባ ምችዉ ካዉሽዳ ግሾ፥ ባ ናጋራን ባዉ ኦይሸቶ። 18 እስ አስ ኩሸ መቶራ ደእያ ማጫሳራ አቅኮ፥ እ ቀ ቃርዳ ግሾ፥ ኤንቲ ናምአይ ባንታ አሳ ግዶፈ ኩረቶ።

19 "ነ አየ ምችዉ ዎይኮ ነ አዋ ምችዉ ፃሎፋ፤ ሄሳ ኦይ ባ ማታ ዳቦተ ካዉሼስ። ኤንቲ ናምአይ ባንታ ናጋራን ኦይሸቶ። 20 እስ አስ ባ አዋ እሻ ማችዉ ፃልኮ፥ እ ባ አዋ እሻ ካዉሽስ። ኤንቲ ባንታ ናጋራን ባንታዉ ኦይሸቶ፤ ኤንቲ ናምአይ ናአ የሎና ሀይቃና። 21 እስ አስ ባ እሻ ማችዉ ኤክኮ፥ ሄስ ቱና። እ ባ እሻ ካዉሽስ፤ ኤንቲ ናምአይ የሎ ያና።

22 "ህንተ ዳና መላ ታ ህንተና ገልስያ ቢታይ ህንተና ጩቶና መላ ህንተ ታ ህግያነ ታ ኪታ ናግተ። 23 ታኒ ህንተ ስንፈ ይስያ አሳ ደኡዋ ዎጋ ካሎፍተ። ኤንቲ ሄሳ ኡባ ኦዳ ግሾ፥ ታ ኤንታ እፃስ። 24 ህንተ ኤንታ ቢታ ላታና፤ ማነ ኤስ ጎገይ ቢታ ህንተዉ እማና። ታኒ ህንተና ሀራ አሳፐ ዱማያዳ ከስዳ፥ ጎዳ ህንተ ፆሳ።

25 "ሄሳ ግሾ፥ ህንተ ቱናነ ቱና ግዶና መሄታነ ካፎታ ሻክድ ኤርተ። ታኒ ሄሳት ህንተዉ ቱና ጋዳ ዎዳ መሄታ፥ ካፎታነ ቢታን ቃፅያባታ ኡባን ህንተና ቱንሶፕተ። 26 ታኒ ጎዳይ ጌሽ ግድያ ግሾነ ህንተ ታባ ግዳና መላ ህንተና ሀራ አሳፐ ዱማይዳ ግሾ፥ ህንተካ ታዉ ጌሽ ግድተ።

27 "አደይ ዎይኮ ማጭ ሞይትለራ ሃሳይኮ ዎይኮ ማሮትኮ፥ ኤንቲ ሀይቃናዉ በሴስ። ኤንቲ ሹቻን ጫደትድ ሀይቆ፤ ኤንታ ሱ አጮይ ኤንታ ቦላ ግዶ።"