1 ጎይናናዉ ኤቃታ ኦፍተ፤ ቃስ ሀዉልተ ዎይኮ ኤቃ ቱሱ ዎይኮ ሹቻ ኤቃ ኤሶፍተ። ታኒ ጎዳ፥ ህንተ ፆሳ። 2 ታ ሳምባታታ ናግተ፤ ታ ጎይኖ በሳ ቦንችተ። ታኒ ጎዳ።

3 ህንተ ታ ህግያ ካልኮነ ታ ኪታ ናግኮ፥ 4 ታኒ ህንተዉ እራ ዎደን ዎደን እማና፤ ቢታይ ካ ዳርስድ ዶልሳና፤ ጋደን ደእያ ምይ አይፋና። 5 ህንተ ካ ሺሽድ ኦንጎና ደእሽን ዎይነ ማፅያ ዎደይ ጋካና፤ ዎይንያ ማፅድ ዉርሶና ካ ዘርያ ዎደይ ጋካና። ህንተ ካላና ጋካናዉ ካ ማና፤ ህንተ፥ ህንተ ቢታን ሳሮ ዳና።

6 ታኒ ቢታስ ሳሮተ እማና፤ ኦንካ ህንተና ያሽሶና ህንተ ዝንአና። ኢታ ዶአታ ታኒ ቢታፈ ይሳና፤ ህንተ ቢታን ናምአን ኦል ደንደና። 7 ህንተ ሞርከታ ህንተ የደና፤ ኤንቲ ህንተ ስንን ማሻን ሀይቃና። 8 ህንተፈ እቻሻይ ፄታ የደና፤ ቃስ ፄታይ ታሙ ሙኩላ የደና። ህንተ ሞርከት ህንተ ስንን ማሻን ሀይቃና።

9 ታኒ ህንተና ማሮታ አይፈን በአና፤ ህንተና አይፍሳና፤ ህንተና ዳርሳና፤ ታኒ ታ ጫቁዋ ህንተራ ምንና። 10 ህንተ ሻቻ ካ ምድ ዉርሶና ደእሸ፥ ዋቻ ካ ዎናዉ፥ ሻቻ ካ ድግድ በሰ ጊግሳና። 11 ታኒ ታ ደእያ በሳ ህንተ ግዶን ኦና፤ ታኒ ህንተና እፅከ። 12 ታኒ ህንተ ግዶን ሄመታና፤ ህንተ ፆሳ ግዳና፤ ህንተ ታ አሰ ግዳና። 13 ህንተ ግብፀታስ አይለ ግዶና መላ ሄ ቢታፈ ህንተና ከስዳ ጎዳይ፥ ታኒ ህንተ ፆሳ። ታኒ ህንተ አይለተ ቃምባራ መንስ፤ ህንተ ቁ ግድ ሄመታና መላ ኦስ።

14 ሽን ህንተ ታና ስኦና እፅኮነ፥ ታ ኪታ ፖሎና እፅኮ፥ 15 ታ ዎጋ ካኮ፥ ታ ኪታ ኡባ ፖሎና እፅድ ታ ጫቁዋ መንናዉ ታ ህግያ ቦርኮ፥ 16 ሄ ዎደ ታኒ ህንተ ቦላ ሀይሳ ኦና፤ ህንተ አኬኮና ደእሽን ያሽ፥ ግልቃተ፥ ህንተ አይፍያ ተልጁምስያነ ህንተ አሳተ መልስያ ምሻ ሀርገ ህንተ ቦላ የዳና። ህንተ ሞርከት ማና ግሾ ህንተ ዘርያ ዘረይ መላ ግዳና። 17 ታ ህንተና ኢታ አይፈን ፄላና፤ ህንተ ሞርከታ ስንን ህንተ ኩንዳና፤ ህንተና እፀይሳት ሃራና፤ ኦንካ የደና ህንተ ባቃታና።

18 ሄሳ ኡባ ኦንካ ህንተ ታና ስኦና እፅኮ፥ ታኒ ህንተ ናጋራ ግሾ ህንተ ሴራ ላፑን ዳኮ ኦና። 19 ታ ህንተ ኦቶሩዋ መንና፤ ሳሉዋ ብራታ፤ ሳአ ናሰ ብራታ ኦና። 20 ህንተ ቢታይ ካ፥ ህንተ ምይ አይፈ እሞና ግሾ ህንተ ዎልቃይ ጮ በሳን ዉራና።

21 ህንተ ታዉ እፃስ ጊኮነ ታና ስኦና እፅኮ፥ ህንተ ናጋራ መላ ላፑን ዳኮ ጋዶ ታኒ ህንተ ቦላ ኤሀና። 22 ታኒ ህንተ ቦላ ባዞ ዶአታ የዳና፤ ኤንቲ ህንተ ናይታ ቦንቃና። ህንተ መሄታ ይሳና፤ ህንተ ታይቡዋ ጉና፤ ሄሳ ጋሶን ህንተ ሄመትያ ኦገይ ሁሳታና።

23 ሄ ሴራ ኡባን ህንተ ታኮ ስሞና እፅኮ፥ 24 ሄ ዎደ ታካ ህንተዉ እፃስ ጋና። ህንተ ናጋራ ግሾ ታኒ ታ ሁጰን ህንተና ላፑን ዳኮ ሴራና። 25 ታ ጫቁዋ ህንተ መንዳ ግሾ፥ ኩሸ ዛራናዉ ማሻ ህንተ ቦላ ኤሀና። ህንተ፥ ህንተ ካታማታን ሺቅኮካ፥ ታኒ ህንተ ቦላ ጋዶ የዳና። ህንተ፥ ህንተ ሞርከታ ኩሸን አድ እመታና። 26 ህንተ ካ ታኒ ይስያ ዎደ ታሙ ማጫሳት እስ በሸን ኡይ ኡካና፤ ሄ ኡይ ምዛነን ሻክድ ኤካና፤ ህንተ ሄሳ ማና ሽን ካለከታ።

27 ሀ ኡባን ህንተ ታና ስኦና እፅኮነ ህንተ ኢታተን ጉጅድ ቢኮ፥ 28 ታ ህንተ ቦላ ሀንቆን ደንዳና። ህንተ ናጋራ ግሾ ታኒ ህንተና ላፑን ዳኮ ሴራና። 29 ህንተ፥ ህንተ አደ ናይታነ ህንተ ማጫ ናይታ አሹዋ ማና። 30 ታኒ፥ ህንተ ቃ ጎይኖ በሳታ ይሳና፤ ህንተ እፃነ ያርሽያ በሳ ላላና። ታኒ ህንተ አሀ ህንተ ኤቃታ አሀ ቦላ ሆላና፤ ታኒ ህንተና ፖሎ እፃና። 31 ታኒ ህንተ ካታማታ ባይሳ ኦና፤ ህንተ ጎይኖ በሳታ ይሳና፤ ህንተ ሳውያ ያርሹዋ ስንግከ። 32 ታኒ ህንተ ቢታ ይሳና፤ ሄ ቢታን ደእያ ሞርከት ሄሳን ማላለታና። 33 ታኒ ህንተና ካዎተታ ግዶን ላላና፤ ህንተ ቦላ ታ ማሻ ሾዳና። ህንተ ቢታይ ባይሳታና፤ ህንተ ካታማት ላለታና። 34 ህንተ ሞርከታ ቢታን ደእያ ዎደ፥ ባይሳ ጊግድ ደእያ ህንተ ቢታይ ባ ሳምባታ ቦንቻና። ሄ ዎደ ህንተ ቢታይ ሸምፓናነ ባ ሳምባታ ቦንችሸ ኡፋይታና። 35 ህንተ ሄ ቢታን ደእያ ዎደ ሳምባታታን ደምቦና ሸምፑዋ ሀእ ባይሳ ግድዳ ዎደ ደማና።

36 ህንተ ድኤትድ ብያ ዎደ ጉየ አትዳ አሳታ ዎዛናን ያሽ የዳና፤ ጫርኮይ ቃያ ቦንጮ ግርሳይ ኤንታ ዳጋንና፤ ኤንቲ ማሻፈ ባቃትያ መላ ባቃታና፤ ኤንታ ኦንካ የደና ኩንዳና። 37 ኦንካ የደና ኦላፐ ባቃትያዳ ባቃትሸ፥ እሶይ እሱዋራ በትድ ኩንዳና። ህንተ፥ ህንተ ሞርከታ ስንን ኤቃናዉ ህንተዉ ዎልቅ ያና። 38 ካዎተታ ግዶን ህንተ ያና፤ ህንተ ሞርከታ ቢታን ህንተ ምተትድ ያና። 39 ሞርከታ ቢታን አትዳይሳት ባንታ ናጋራ ግሾነ ባንታ አዋታ ናጋራ ግሾ ግልቅድ ያና።

40 ሽን ኤንቲ ባንታ ናጋራነ ታ ቦላ ማካልድ ስኦና እፅዳ ባንታ አዋታ ናጋራ ፓፅኮ፥ 41 ታ ኤንታ እፃናዳነ ኤንታ ሞርከታ ቢታ የደናዳ ኦዳ ባንታ ናጋራ አግኮነ ኤንታ ኪተቶና ዎዛናይ ስምኮ፥ 42 ታኒ ያይቆባራ፥ ይሳቃራነ አብራሃመራ ጫቅዳ ጫቁዋ ሀሳያና፤ ኤንታ ቢታ ዛራ ቆፓና። 43 ኤንታ ቢታይ ባይሳ አታና፤ ሄ ኤንቲ ይን ባይሳ ግድድ ደእዳ ዎደን ቢታይ ሳምባታ ቦንችሸ ኡፋይታና። ኤንቲ ታ ኪታ ካዳ ግሾነ ታ ዎጋ ለቅዳ ግሾ ባንታ ናጋራ ሴራ ኤካና።

44 ግዶሽን፥ ኤንቲ ባንታ ሞርከታ ቢታን ደእዳ ዎደ ኩመ ያና ጋካናዉ ኤንታራ ደእያ ታ ጫቁዋ መንከ፤ ኤንታ የግከ። ታኒ፥ ጎዳ ኤንታ ፆሳ። 45 ታኒ ኤንታ ፆሳ ግዳናዉ፥ ካዎተት ፄልሽን፥ ግብፀ ቢታፈ ከስዳ ኤንታ ማይዛታራ ታኒ ጫቅዳ ጫቁዋ ኤንታ ግሾ ሀሳያና። ታኒ ጎዳ።

46 ጎዳይ ሲና ዙማ ቦላ ሙሰ ባጋራ ባፐነ እስራኤለ አሳፐ ግዶን ዎዳ ዎጋት ኪታትነ ህገት ሀይሳታ።