1 Amoxe naa Isayaasi Yuhuda dere gishshassinne Yerusalaame katama gishshas be7ida ajjuutay hayssa.

2 Wode wurseththan Xoossa keeththi

iza bolla keexettida zumay

hara zuma ubbaafe

dhoqqi beettana.

Zumbullata ubbaafe dhoqqu

dhoqqu gaana;

ubbaa kawoteththati

hee goochchana.

3 Daro asay yiidi,

«Wogay Xiyooneppe,

GODAA qaalay Yerusalaameppe

keziza gishshas haa yiite!

GODAA zumaa,

Yaaqoobe Xoossaa Keeth

ane pude kezoos.

Izi koyzayssaththo

nuni baana mala

izi nuna ba oge tamaarsana» gaana.

4 Izi kawoteththata giddon pirdana;

daro asata garsan diza palama

izi diggana.

Istti bantta giththa

mashsha maarasha,

bantta toorakka

baaca qoxxi kessana.

Derey dere bolla

mashsha denththenna;

hessafe guye

istti ola tamaarettenna.✝

5 Intteno Yaaqoobe zaretoo!

Haa yiite!

Ane GODAA poo7on simerettoos.

6 GODAWU! Neni ne asaa

Yaaqoobe zareta aggadasa.

Istti arshey mokkiza baggara diza

asata mala bitan kumida;

Filisxeeme asaa mala

muurenneettes.

Istti allagara issife zuppeteettes.

7 Istta biittan biraynne

worqqay kumides;

istta dureteththas zaway baawa;

istta biittan paray kumides;

istta para-gaaretas

zaway deenna.

8 Istta biittan eeqa xoossati kumida;

bantta kushen ooththi kessida

miishshas goynneettes.

9 Hessa gishshas asi ubbay

ziqqi gaananne kawuyana.

Istta qoho atto gooppa.

10 Yashissiza GODAA hanqofenne

iza teemappe attanaas

zaallatakko biidi

biitta giddon qotettite!✝✝

11 Otoranchcha ayfey gukkana;

moodhettizayti kawuyana;

he wode GODAY xalla

dhoqqu dhoqqu gaana.

12 Ubbaafe wolqqama GODAY

Otoranchchata,

moodhettizaytanne

ceeqettizayta kawushshanaas

gallas bari woththides.

13 Adussinne dhoqqa gidida

Libaanoose zigatanne

Baasaane wolata ubbaa,

14 Gita zumatanne

dhoqqa zumbullata ubbaa,

15 katama naagiza

adussa miixatanne

katamaa yuushon diza

mino gimbeta ubbaa,

16 Tarseese markabetanne

bonchcho wogolota ubbaa

izi kawushshana wodey dees.

17 Moodhettizaadey kawuyana;

otoranchchay kundana;

he gallas GODAY xalla

dhoqqu dhoqqu gaana;

18 Eeqa xoossati ubbay

mulera dhayana.

19 GODAY hayssa biittaa

qaaththanaas dendiza wode

Yashissiza GODAA hanqofenne

iza teemappe attanaas

asay qotettanaas

shuchcha garsinne

ollay dizaso baqatana.

20 He gallas asay goynnanaas

medhdhida bantta bira,

worqqa misleta

girossinne kafotas olana.

21 GODAY ha biittaa qaaththanaas

dendiza wode

iza yashiseththaafenne

iza teemaappe dendidayssan

shuchcha gongoloynne

zaalla za7ay dizaso baqatana.

22 Shemppoy siidhera keziin

aha gidiza asan ammanettofte;

asi ay maaddanee?