1 Abeet GODAWU!

Neni ta Xoossaa.

Tani nena

dhoqqu dhoqqu histtana;

ne sunththaaka sabbana.

Gaasoykka benippe qofettidayssa

malalisiza hano kumeththa

ammaneteththan ooththadasa.

2 Neni katamayo

shuchcha doore ooththadasa;

gimbettida katamayokka

laalladasa;

hayssafe sinththan gimbettida

allagata katamati deettenna;

Simmidi mulekka oosetettenna.

3 Hessa gishshas mino dereti

nena bonchchana;

menxe iita kawoteththati

nees yayyana.

4 Neni hiyeesatas zemppo;

Metotanchchatas meto wode

neni zemppo;

gote carkofe geemmi attizaso;

awa seelappe

kuwattizaso gidadasa.

Gaasoykka menxe iitata peenoy

keeththa godara icettiza

gote carko mala.

5 Bazzo biitta seela mala.

Allaga otoreteththa waaso

co7u ooththaasa.

Awa seelay shaaraa kuwan

irxxiza mala menxe iitata

mazamure sirphi gaana.

6 GODAY Ubbaafe Wolqqama Xoossay

hayssa zumaa bolla dere ubbaas

gidiza gita gibiraa,

lo7i kaxxida woyne ushshu,

lo7o ashonne doorettida

woyne ushshu giigsana.

7 Hayssa ha zumaan

dere ubbaa bollan

wodhdhida magalasha,

kawoteththata ubbaa goozi

oykkida goossaa izi dhayssana.

8 Hayqo izi mernaas mittana;

Ubbaa Haariza GODAY

asa ubbaa ayfeppe

afunththu quccana;

ba deraa kawushshateth

biitta ubbaafe diggana.

Hayssa GODAY haasaydes.

9 He gallas isttas, «Be7ite

nu Xoossay hayssa;

nuni izan ammanettidos;

izikka nuna ashshides;

Hayssi GODAA;

nuni izan ammanettidos;

izi ashshidayssan ufayettoos;

ufayssan hombocoos» gaana.

10 GODAA kushey

ha zumaa bolla shemppana.

Gido attiin uttulay

urqqan yedhettiza mala

Mo7aabeykka yedhettana.

11 Haaththa wadhdhizay

ba kushe micciza mala

iza giddon dizayti

bantta kushe miccana;

Xoossi istta gene ooso balettontta

istta otoreteththaa kawushshana.

12 Istti dhoqqu histti gimbida gimbeza

izi duge ziqqi histtana;

duge woththana;

kawushshidi duge

sa7an woththidi

gudulla bolla yeggana.