1 GODAY, «Ne qaalaa

dhoqqu histta waassa;

aykkoka ashshofa.

Ne cenggurssa zaye mala sissa.

Ta deraas istta makkallateththa,

Yaaqoobe keeththa asaasikka

istta nagaraa yoota.

2 Istti tana hach hach koyeettes;

ta ogeza eranaas

laamotiza misateettes.

Suure miish ooththida

kawoteththa malanne

ba Xoossaa azazo yeggi

aggontta dere mala,

istti tana

suure pirda oychcheettes;

Xoossi isttako shiiqanayssa

istti dosiza misatees» gees.

3 Istti shiiqidi, «Ne ekkonttaashin

nu aazas xoomidonii?

Ne wudu gonttaashin ays nuna

kawushshidonii?» gaana.

GODAY zaaridi isttas,

«Gidikkoka intte xoomiza gallas

intte wozina

qofa mala ooththeeta;

inttes ooththizaytappe

bonqqeeta.

4 Intte xoomay

ooshshaninne palaman,

gene oosoninne wadhetan polettees;

hayssafe sinththan

intte xoomizayssa mala

hachchife guye intte woosay

salon siyettana giidi

hidota ooththofte.

5 Tani dooriday hayssa mala xoomaa?

Asi bana kawushshanay

hayssa mala

gallas xallaa?

Shacca mala bana

ziqqi histteththee?

woykko maaqa may7idi

bidinththaa bolla bululeteththee?

Histtiin ne xooma ga

xeygizayssi hayssee?

GODAY hessa malan ufayettizee?

6 «Be7ite tani doorida xoomay,

un7ettidayta sansalata

intte duuththana mala,

qambara wodoro

intte birshana mala,

un7ettidayta intte

la7a yeddana mala,

tooho gidida qambara intte

menththana mala gidennee?

7 Qasseka ne qumaappe

gafidaades shaakkanaas,

toylattida manqoza

neso gelththanaas,

kallottida be7ada mayzanaas,

nees asho dabbozas ne sinththi

ne tukkontta mala gidennee?✝

8 Ne hessaththo ooththiko ne poo7oy

wontta xalqqe mala caarana;

paxateththi nees eeson gakkana;

xilloteththi neeppe

sinththara baana;

Xoossa bonchchoy

nena garadana.

9 He wode neni xeygana;

GODAYKKA nees koyana.

Neni maado

demmanaas waassana;

izikka, ‹Ta nees days› gaana.

«Ne neeppe metoththiza qambara,

iita haasayanne

biradhdhen malata

bessizayssa aggiko,

10 gafidaades ne qadhettiko,

qohettidayti kallana mala

ne histtiko

nees poo7oy dhuma

giddon poo7ana;

nees dhumidayssika

seeta gallassa mala gidana.

11 GODAY nena ubbatoo kaaleththana;

away xuuggida biittan

ne amo izi kunththana;

ne meqeththatakka

izi minththana.

Neni haath alada atakiltesohonne

mulekka to7ontta

pultto mala gidana.

12 Ne dabboti beni yochchata yeggana;

kase laalettidayta zaari keexxana;

neni laalettida gimbe

zaari ooraxissizaade,

wogga ogeti diza katamata

zaari giigsizaade geetettana» gees.

13 Qasseka, «Ne tohoti

sambata shaarontta mala

ne shempisikko dummatida

ta gallassaan

ne wozina qofa ooththontta aggiko,

sambata gallassaa ufays,

GODAAS dummatida gallassa

neni bonchcho gallas

ga xeygikko,

ne shene mala

ne ooththizayssafenne

hada yo7oppe ne naagettiko,

14 he wode ne GODAAN ufayettana.

Biitta bollan dhoqqasohotan

ta nena togisana;

ne aawa Yaaqoobe xinxxo

ne kalla maana mala ooththana»

giidi GODAY hayssa

ba doonan haasaydes.